உலகளவில் இப்போது ஓராண்டுக்கும் மேலாக நடைபெற்றுக்கொண்டிருப்பவை இரண்டு போர்கள். ஒன்று உக்ரைன் - ரஷ்யா இடையிலானது. மற்றொன்று காஸா - இஸ்ரேல் இடையிலானது.

ஆனால், கடந்தவாரம் உலகையே சூடுபிடிக்க வைத்த போர் ஒன்று இருக்கிறது. அது பிரதேசத்துக்கானதல்ல, நிலத்துக்கான உரிமை அல்ல. மாறாக இரு தனி மனிதர்களுக்கு இடையிலானது.

ஏனெனில் இவ்விரு மனிதர்களால் அவர்கள் வசிக்கும் அமெரிக்கா மட்டுமல்ல உலகத்தையே மாற்றும் வாய்ப்பிருக்கிறது. எனவேதான் மொத்த உலகமும் இப்பிரச்னையை உன்னிப்பாக கவனிக்கிறது.புரிந்திருக்குமே... அவ்விரு தனிமனிதர்கள் அமெரிக்க அதிபரான டொனால்ட் டிரம்ப்பும் உலகப் பணக்காரர்களில் ஒருவருமான எலான் மஸ்க்கும்.

எந்த ‘எக்ஸ்’ தளம் வழியாக அமெரிக்க அதிபராக டிரம்ப் வெற்றிபெற எலான் மஸ்க் உதவினாரோ... அதே ‘எக்ஸ்’ தளம் வழியாக டிரம்ப்பை அதிர்ச்சியூட்டும் வார்த்தைகளில் விமர்சித்தார்.

இதற்கு பதிலடி தரும்விதமாக எலான் மஸ்க் நிறுவனங்களுக்கு அமெரிக்க அரசு கொடுத்து வரும் ஆதரவை நிறுத்தும் என பதிலடி கொடுத்தார் டிரம்ப்.

இது அமெரிக்க பொருளாதாரத்தில் எதிரொலிக்கத் தொடங்கவே, அமெரிக்காவின் துணை அதிபர் ஜே.டி வான்ஸ், வெள்ளை மாளிகை தலைமைப் பணியாளர் சூசிவைல்ஸ் மற்றும் கிரிப்டோ ஆலோசகர் டேவிட்சாக்ஸ் ஆகியோர் எலான் மஸ்க்கை அழைத்து இந்தப் பிரச்னையை சரி செய்யுமாறு எடுத்துச் சொன்னார்கள். 

இதனையடுத்து, எலான் மஸ்க் அமெரிக்க அதிபர் டிரம்ப்புடன் தொலைபேசியில் பேசியதுடன் வருத்தம் தெரிவித்ததாக செய்திகள் கசிகின்றன. அத்துடன் ‘எக்ஸ்’ தளத்தில் டிரம்ப்பை எதிர்த்து, தான் பதிவிட்ட அனைத்துப் பதிவுகளையும் எலான் மஸ்க் நீக்கிவிட்டார்.

இப்போது சரிந்த எலான் மஸ்க் நிறுவன பங்குகள் ஏறுமுகத்தை நோக்கி நகரத் தொடங்கியுள்ளன.டிரம்ப்பும் முறுக்கிக்கொள்ளவில்லை. ‘எலான் மஸ்க், தான் பேசியதற்கு வருந்துகிறார் என்று நினைக்கிறேன். 

அவருக்கு மன்னிப்பு உண்டு’ என செய்தியாளர்களிடம் தெரிவித்துவிட்டார். இச்சூழலில்தான் உலகெங்கும் அனைத்து மொழிகளிலும் ஒரு விஷயம் அலசப்பட்டு வருகிறது. அது... எலான் மஸ்க் ஹீரோவா வில்லனா என்ற விவாதம்தான்.

இப்படி மஸ்க் மேற்கொண்ட எண்ணற்ற தொழில்நுட்ப முயற்சிகள்தான் அவரை அமெரிக்காவின் தொழில்நுட்பப் புரட்சியாளராக மாற்றியது.

விஷயத்துக்கு வருவோம். வீடியோ கேம், ஸ்டார்ட் அப், பேபால் என்று சிறுகச் சிறுக முன்னேறிய மஸ்க் அமெரிக்காவில் குடியேறிய பிறகு விதைத்த இரண்டு பெரிய தொழில்நுட்பத் திட்டங்கள் முக்கியமானவை. அவை டெஸ்லா எலக்ட்ரானிக் கார் மற்றும் ஸ்பேஸ் எக்ஸ் எனும் ராக்கெட் திட்டம். 

ஸ்பேஸ் எக்ஸ் திட்டம் பற்றி மஸ்க்கிடம் கேட்கப்பட்டபோது, ‘உலகம் சீக்கிரம் அழிந்துவிடும். அப்போது முதியோரும், நோயாளிகளையும் காப்பாற்ற இப்பொழுதே செவ்வாய்க் கிரகத்தை ஆக்கிரமிக்க வேண்டும். இதற்குத்தான் ராக்கெட் தொழில்நுட்பம்’ என்றார்.

மஸ்க்கின் ஒவ்வொரு தொழில்நுட்பத் திட்டத்தின் ஆரம்பமும் நன்றாகத்தான் இருக்கும். ஆனால், உள்ளே நோண்டிப் பார்த்தால் பெரிய பாதிப்பு அல்லது நஷ்டம் இருக்கும் என்கிறார்கள் விமர்சகர்கள். 

உதாரணமாக சுற்றுச்சூழலைக் கெடுக்காத டெஸ்லா எலக்ட்ரானிக் காருக்கு அமெரிக்க நடுத்தர மக்களிடையே பெரிய வரவேற்பு இருந்தாலும் அந்தக் காருக்கான பேட்டரியை தயாரிக்கத் தேவையான கனிமங்களை பூமியிலிருந்து எடுக்கும்போது பெரிய ஆபத்துகள் நிகழும் என்கிறார்கள் சுற்றுச்சூழல் ஆய்வாளர்கள். காங்கோவில் இதனால் பல குழந்தைகள் மடிந்துபோனதை இதற்கு ஆதாரமாக சுட்டிக் காட்டுகிறார்கள்.

இல்லை என்கிறார்கள். எடுத்துக்காட்டாக டுவிட்டர் சமூகவலைத்தளத்தை வாங்கி, ‘எக்ஸ்’ என பெயர் சூட்டினார். இத்தளத்தால் மக்களுக்கு என்ன பயன்? சொல்லப்போனால் கருத்து சுதந்திரம்தான் பறிக்கப்பட்டிருக்கிறது. வெளிப்படையாக டுவிட் செய்யும் பதிவுகள் உடனுக்குடன் நீக்கப்படுகின்றன. 

போலவே சென்ற ஆண்டு நடைபெற்ற அமெரிக்க அதிபர் தேர்தலில் டிரம்ப்பை ஆதரித்தார் மஸ்க். அத்துடன் தேர்தல் செலவாக சுமார் 288 மில்லியன் டாலரை (இந்திய மதிப்பில் எவ்வளவு வரும் என கூகுளைப் பார்த்து தெரிந்துகொள்ளுங்கள். வெளிப்படையாக இங்கு எழுதினால் படிப்பவர்களுக்கு மட்டுமல்ல... இக்கட்டுரையை எழுதுபவருக்கும் ஹார்ட் அட்டாக் வரும்!) வாரி வழங்கினார்.

அதேபோல், பொதுப் போக்குவரத்தை எல்லாம் மூடிவிடவேண்டும்... அதற்குப் பதிலாக பூமிக்கடியில் போகும் அதிவேக ரயில், விமானங்களைப் பயன்படுத்தவேண்டும் என்கிறார் மஸ்க்.

ஏன் என ஒருவர் கேட்கவே, ‘பொதுப் போக்குவரத்தில் பல சீரியல் கில்லர்கள் நடமாடுகிறார்கள். இது மக்களுக்கு ஆபத்தானது’ என்றார்! கடைசியாக மஸ்க்கின் திருவாய் முத்துக்கு முத்தாய்ப்பான ஒன்று... ஈ.வி.எம் எனும் எலக்ட்ரானிக் வோட்டிங் மெஷினில் திருட்டு நடப்பது பற்றிக் கேட்கப்பட்டபோது மஸ்க் என்ன சொன்னார் தெரியுமா?