‘‘பேரியர் ஃப்ரீ என்விரான்மென்டிற்காக யு.என்னில் இந்தியா 7வது நாடாக கையெழுத்திட்டுள்ளது. 

நம் தமிழ்நாடு அதைச் செயல்படுத்துகிறது. மாற்றுத்திறனாளிகள் அதிகமாகக் கார் ஓட்டுவதும், சமவாய்ப்பு பெறுவதும் தமிழகத்தில்தான் அதிகம்...’’ எனப் பேச ஆரம்பித்த சங்கர் ஜெய் கிஷன், 38 ஆண்டுகளுக்கு மேலாக மாற்றுத் திறனாளிகள் காரை ஓட்டுவதற்கான வாகன மாடிஃபிகேஷன் வேலை (retrofit) செய்துகொடுத்தும், காரை ஓட்ட பழக்கிக் கொடுத்தும் வருகிறார்.

‘‘சிறுவயதில் இருந்தே என் வயது மாற்றுத் திறனாளி நண்பனோடு கூடவே படித்து விளையாடி வளர்ந்தவன் நான். அவன் பெயர் வெங்கட். என்னைவிட அவன் புத்திசாலி. ஆனால், என்னால் முடிந்ததை அவனால் செய்ய முடியாமல் ரொம்பவே சிரமப்படுவான். 

நான் பயணிக்கும் இடமெல்லாம் அவனையும் என் வண்டியின் பின்னால் உட்கார வைத்து அழைத்துச் செல்வேன். அப்படியே டெக்னிக்கல் விஷயங்களிலும் ஆர்வம் இருந்ததால், கையில் கிடைப்பதையெல்லாம் திறந்து பார்த்து, எப்படி வேலை செய்கிறது, என்னவெல்லாம் உள்ளே இருக்கென ஆராய்ச்சி செய்வேன்.

தவழும் நிலையில் இருந்த என் மாற்றுத் திறனாளி நண்பனுக்காக ட்ரை வீலர் ஒன்றை வடிவமைத்து இமயமலை வரை அவனோடு சென்று வந்தேன். இந்தச் செய்தி ஊடகங்களில் வெளியாக, இதைப்பார்த்த மாற்றுத் திறனாளிகள் பலரும் என்னைத் தொடர்பு கொள்ளத் தொடங்கினர். 

என் நண்பனைப் போல அவர்களும் குடும்பத்தோடு மகிழ்ச்சியாக வலம் வரட்டுமே என முடிவெடுத்து, சிறிய அளவிலான ஒர்க் ஷாப் ஒன்றை வாடகை இடத்தில் தொடங்கியபோது, ரயில்வே துறையில் நான் பணியில் இருந்தேன்.ஒரு கட்டத்தில் இதுவே எனக்கான எனர்ஜியாக மாற, ரயில்வே துறை வேலையை உதறிவிட்டு இதையே முழுநேரத் தொழிலாக மாற்றத் தொடங்கினேன்.

தருணத்தில்தான் பேரானந்தம் என்ன என்பதை உணர ஆரம்பித்தேன்.

குடும்பத்தில் ஒருவர் மாற்றுத்திறனாளி குழந்தையாக இருந்தால், யாருக்கு கார், பைக் போன்ற வாகனங்கள் இருக்கிறதோ இல்லையோ கண்டிப்பாக அந்தக் குழந்தைக்கு மொபிலிட்டி வசதி செய்து கொடுத்துவிட வேண்டும். அப்போதுதான் தடையின்றி கல்வி, விளையாட்டு, வேலையென அவர்கள் நகர்வார்கள்.

இல்லையெனில் கடைசிவரை காட்சிப் பொருளாகவே வீட்டிற்குள் இருப்பார்கள்...’’ என்கிற சங்கர், ‘‘காரின் அளவை டிசபிளிட்டியோடு தொடர்பு படுத்திப் பார்க்கவேகூடாது. இனோவா, பார்ச்சுனர், ஆல்கஷார், எஸ்யூவி போன்ற பெரிய சைஸ் கார்களை அசால்ட்டாக ஓட்டும் மாற்றுத் திறனாளி நண்பர்கள் இருக்கிறார்கள்.

‘‘இது ஒன்றும் மிகப் பெரிய ராக்கெட் டெக்னாலஜி கிடையாது. வாகனத்தை ஓட்ட வைப்பது மூளைதான். மூளையிடும் கட்டளையை செய்வதே கை மற்றும் கால்கள். எனவே கால்கள் செயல்திறன் இல்லாதவர்களுக்கு கைகளிலே இயக்கவும், இடது கை செயலிழந்தவர்களுக்கு வலது கை, வலது கை செயலிழந்தவர்களுக்கு இடது கை என மாற்றத்தை செய்து கொடுக்கிறோம்.