கடந்த மாதம் காஷ்மீரின் பஹல்காம் பகுதியில் 25 அப்பாவி சுற்றுலாப் பயணிகளை தீவிரவாதிகள் படுகொலை செய்தது ஒட்டுமொத்த இந்தியாவையும் கொந்தளிக்க வைத்தது. இதற்குப் பின்னணியில் இருந்தது பாகிஸ்தான் ராணுவம்தான் என்பது செல்போனுக்குள் இருக்கும் சிம்கார்ட் போல் உலகறிந்த விஷயம். 

இப்படித்தான் பாகிஸ்தான் காலம் காலமாக நடந்து கொள்கிறது. பாராளுமன்ற தாக்குதல், தில்லி மார்க்கெட் குண்டுவெடிப்பு, மும்பை தாஜ் ஹோட்டல் தாக்குதல், புல்வாமா என நீளும் பட்டியலே இதற்கு சாட்சி.

இந்தியாவுடன் அமைதிக்கான எந்த நிமித்தமும் அவர்களால் - ராணுவத்தால் - எதிர்க்கப்படும். புட்டோ முதல் இம்ரான்கான் வரை தொடரும் பாரம்பரியம் இது.ராணுவத்தில் இருந்து வந்த முஷாரப், அரசாங்கத்தில் மிலிட்டரியின் செல்வாக்கை நிரந்தரமாக்க பல முயற்சிகளை மேற்கொண்டார். 

ஆனால், அவருமே இந்தியாவுடன் நல்லுறவு என்ற திசை நோக்கி போகிறார் என ராணுவம் கருத ஆரம்பித்ததுமே தனது அதிகாரத்தை இழந்தார். நாட்டை விட்டு வெளியேற வேண்டிய சூழலும் அவருக்கு உருவானது.பாகிஸ்தானின் உளவுத்துறையின் தலைவரை, அந்நாட்டு அரசாங்கம் நியமிப்பதில்லை. மாறாக ராணுவம்தான் நியமிக்கிறது.