மாஸ் + கமர்சியல் + ஆக்‌ஷன்! இது சக்தி திருமகன் சீக்ரெட்ஸ்...

15 வருஷத்துக்கு முன்னாடி செகரடேரியட்ல டீ வித்துச்சி, இன்னைக்கு... A Gangster, A Hustler, A Trickster... அவன் பேரு கிட்டு (எ) ‘சக்தி திருமகன்’’’...- என டிரெய்லர் வார்த்தைகளுடன் வந்து விழுகின்றன விஜய் ஆண்டனியின் பெயர். நடிகராக அவருடைய 25வது படம். மிகப்பெரும் ஊழல், அரசியல், அதனுள் கெத்தாக, அமைதியாக வரும் விஜய் ஆண்டனி என டிரெய்லர் பெரும் எதிர்பார்ப்பை உருவாக்கியிருக்கிறது.

‘அருவி’, ‘வாழ்’... என தனது வித்தியாசமான கோணத்தில் கதை சொல்லும் திறமையால் தமிழ் சினிமாவில் தனியிடம் பிடித்தவர் இயக்குநர் அருண் பிரபு புருஷோத்தமன். அவர் இயக்கத்தில் இப்பொழுது விஜய் ஆண்டனி. பரபரப்பான போஸ்ட் ப்ரொடக்‌ஷன் வேலைகளுக்கு இடையே படம் குறித்து பல சுவாரஸ்ய தகவல்களை பகிர்ந்து கொண்டார்.

‘சக்தி திருமகன்’..?

என்னுடைய முந்தைய படங்கள்ல இருந்து முற்றிலும் வேறு மாதிரி அதிக ஜனரஞ்சகமாகவும் அரசியல் திரில்லராகவும் இருக்கும். படத்தில் விஜய் ஆண்டனி சாருடைய பெயர்தான் ‘சக்தி திருமகன்’. நம்மில் இருந்து ஒருத்தன் எப்படி அவ்வளவு பெரிய அரசியல் மேடைக்குப் போறான் என்பதுதான் கதை. இதுக்கு நடுவுல அவன் சந்திக்கும் சம்பவங்கள், எதிர்ப்புகள், இழப்புகள் இதெல்லாம் சேர்ந்துதான் இந்தப் படம்.

விஜய் ஆண்டனியுடன் 25வது படம்... அவருடன் வேலை செய்த அனுபவம்..?

பலரும் விஜய் ஆண்டனி சாருடைய பாசிட்டிவ் குணம் பற்றி சொல்லி இருக்காங்க. இப்போ நேரில் பார்ப்பதற்கான வாய்ப்பு கிடைச்சது. தொடர்ச்சியாக விபத்து, இழப்பு... இப்படி அத்தனையும் கடந்து கூட அவருடைய அமைதியை அசைக்கவே முடியல. அவருக்கு நடந்த பிரச்னை எல்லாம் நமக்கு வந்திருந்தா நிச்சயம் உடைஞ்சு போயிருப்போம். இவர் எப்படி இவ்வளவு பாசிட்டிவா இருக்கார்னு தெரியலை.