முதல்முறையாக அமெரிக்க அதிபராக பொறுப்பேற்றபோதே கல்வித் துறையைக் கலைக்கும் பணிகளை டிரம்ப் மேற்கொண்டார். ஆனால், அமெரிக்க காங்கிரஸ் இந்த நடவடிக்கைக்கு ஒப்புக் கொள்ளவில்லை.

இந்த நிலையில், இரண்டாவது முறையாக அதிபராக பொறுப்பேற்றுள்ள டிரம்ப், கடந்த வாரம் அமெரிக்க மாகாண ஆளுநர்கள் மற்றும் கல்வி ஆணையர்கள் பங்கேற்ற கூட்டத்தில் கலந்துகொண்டபோது, கல்வித் துறையைக் கலைக்கும் ஆவணங்களில் கையெழுத்திட்டுள்ளார்.

மாணவர்களுக்கு மத்தியில் அமர்ந்து கையெழுத்திட்ட டிரம்ப், ‘அதிகளவிலான நிதியை செலவழித்தும் 8ம் வகுப்பு மாணவருக்கு வாசிக்கவும், கணக்குகள் போடுவதிலும் சிரமம் இருக்கிறது. இதனால், கல்வித் துறை மாகாணங்களின் பொறுப்புகளுக்கே மீண்டும் அளிக்கப்படுகிறது. 

தோல்வியடைந்த ஓர் அமைப்பிடம் இருந்து குழந்தைகளும் பெற்றோர்களும் விடுவிக்கப்படுகிறார்கள்...’ என்றார்.அமெரிக்க கல்வித்துறையின் கீழ் 1,00,000 அரசுப் பள்ளிகள் மற்றும் 34,000 தனியார் பள்ளிகள் இயங்கி வருகின்றன. இந்தப் பள்ளிகளின் 85 சதவிகித செலவீனங்களை மாகாண அரசுகள் வழங்குகின்றன.