அண்ணன பார்த்தியா... அப்பத்தே தே... தேனா..!

நாயர்... போனவாரம் வரைக்கும் ‘கயாடு கயாடு’னு கத்திட்டு இருந்த ஒருத்தனகூட காணோம்... எங்கதான் போயிருப்பானுங்க?

 ‘அண்ணன பாத்தியா... அப்பத்தே... தேனா... ஆஹ்... பாத்தியா..?  அப்பத்தே தே... தே... கூட்’னு பாடிக்கிட்டு தாய்லாந்து நோக்கி படையெடுத்து போய்ட்டானுங்க மேடம்...
 அது தாய்லாந்து இல்ல... இந்தோனேசியா முருகேசா..! அட உண்மைதாம்ப்பா... ‘டிராகன்’ நாயகி கயாது லொஹார் கனவில் இருந்து இவர்கள் எப்போது எழுந்தார்கள் என்று தெரியவில்லை. அதற்குள் இந்தோனேஷியா பக்கமாக உலாவிக் கொண்டிருக்கிறார்கள் நமது நெட்டிசன்கள்.

இந்தோனேஷியாவின் பாடல் ஒன்று திடீர் வைரலாக... தொடர்ந்து அதைப் பாடிய பெண் இணையத்தில் மட்டுமல்ல நெட்டிசன்களின் இதயத்திலும் இடம் பிடித்துவிட்டார்.
சில்வி குமலசரி (Silvy Kumalasari)... கொரியா பார்பி பொம்மை போன்ற அழகு இவரின் ஸ்பெஷல். நம்ம ஊர் ஃபேஷன் ஃபேர்னஸ் கிரீம் விளம்பரங்களில் சொல்லப்படும் அத்தனை அழகுக்கான வார்த்தைகளையும் இவருக்கு பயன்படுத்தலாம்.

அப்பழுக்கற்ற சருமம், பார்லர் போன்ற பிரகாசம், சூரியன் வெட்கப்படும் அழகு... உடலை வருத்தி , எனர்ஜியை பிழிந்து எல்லாம் நடனம் கிடையாது, அழகான மெல்லசைவுகள், சீரான டெம்போ நடனம், ‘ஜானி’ படத்தின் ‘ஆசையக் காத்துல தூது விட்டு...’ என முதல் வரியை பாடி முடித்தவுடன் ‘டின்டிடி டின், டின்டிடி டின்...’ என நடிகை சுபாஷினி மற்றும் குழுவினர் ஒரு டெம்போ நடனம் ஆடுவார்களே... அதே ஸ்டைல்தான். வாசிப்பு கருவிகள் கூட அந்தப் பாடலில் பயன்படுத்திய வகை பழங்குடி ஸ்டைல்தான்.

யார் இந்தப் பொண்ணு? இந்தோனேஷியாவில் இருந்து இந்தியா வர எதும் வாய்ப்பிருக்கா? நம்மூர் இயக்குநர்களுக்கு ஐடியா ஏதும் வருமா? ‘ஒரு வழியச் சொல்லித்
தொலை’ என நம்ம டிஜிட்டல் கிளி கூகுளைத் தட்டினால் பெயரைத் தவிர அத்தனையும் இந்தோனேஷிய மொழியில் வந்து விழுகிறது. சரி... ‘ஐயா ChatGPT நீயாவது ஒரு வழி சொல்லுப்பா’ என்றதும் அந்த கேட்டும் அடைபட்டுக் கிடக்க கடைசியில் இந்தோனேஷிய மொழி டூ ஆங்கில மொழிபெயர்ப்புதான் கைகொடுத்தது.