சுமார் 131 ஆண்டுகால சர்வதேச ஒலிம்பிக் கமிட்டி வரலாற்றில் முதல்முறையாக பெண் ஒருவர் தலைவராகத் தேர்வு செய்யப்பட்டுள்ளார்.அவர் பெயர் கிறிஸ்டி கோவென்ட்ரி. ஜிம்பாப்வே நாட்டைச் சேர்ந்தவர். 

இதற்கு முன்பு ஒன்பது பேர் தலைவர் பதவியை வகித்துள்ளனர். அவர்கள் அனைவருமே ஆண்கள். அதுமட்டுமல்ல. இந்த உயரிய பதவிக்கு ஆப்ரிக்கா கண்டத்திலிருந்து வந்திருக்கும் முதல் நபரும் கிறிஸ்டி கோவென்ட்ரிதான்.

ஜிம்பாப்வேயின் தலைநகர் ஹராரேவில் பிறந்தவர் கிறிஸ்டி கோவென்ட்ரி. சிறுவயதிலேயே நீச்சலில் மிகுந்த ஆர்வம் கொண்டிருந்தார். பள்ளியில் படிக்கும்போதே நீச்சலில் திறமையை வளர்த்திருக்கிறார். அப்படியாக உயர்நிலைப் பள்ளியில் பயிலும்போதே அவருக்கு ஒலிம்பிக்கிற்கான டிக்கெட் கிடைத்துவிட்டது. 

2000ம் ஆண்டு ஆஸ்திரேலியாவின் சிட்னி நகரில் நடந்த ஒலிம்பிக்கில் பங்கேற்றார். இதில் அரையிறுதிக்குத் தகுதிபெற்றார். ஆனால், எந்த மெடலும் அவரால் பெறமுடியவில்லை. இருந்தும் நீச்சலில் அரையிறுதி வரை சென்ற முதல் ஜிம்பாப்வே வீராங்கனை என்ற பெயரைப் பெற்றார். அந்தாண்டு ‘ஜிம்பாப்வே ஸ்போர்ட்ஸ் வுமன் ஆஃப் த இயர்’ என்ற பெருமைக்குரியவர் ஆனார்.

தொடர்ந்து 2005ம் ஆண்டு நடந்த உலக சாம்பியன்ஷிப் 100 மற்றும் 200 மீட்டர் பேக் ஸ்ட்ரோக்கில் தங்கமும், 200 மற்றும் 400 மீட்டர் ஐ.எம் பிரிவில் வெள்ளியும் வென்றார்.

அப்படியாக 7 ஒலிம்பிக் பதக்கங்களைத் தன்வசப்படுத்தியுள்ளார் கிறிஸ்டி கோவென்ட்ரி. இப்போதுவரை ஜிம்பாப்வே நாடு ஒலிம்பிக்கில் வென்ற பதக்கங்கள் 8. இதில் ஹாக்கியை தவிர்த்துவிட்டால் மற்ற ஏழும் கிறிஸ்டி வென்றவைதான்!

 இதனுடன் ஆப்ரிக்கா விளையாட்டுப் போட்டிகளில் நிறைய தங்கம், வெள்ளிப் பதக்கங்களை வென்றுள்ளார் கிறிஸ்டி. இதனால்தான் அவரை ஜிம்பாப்வேயினர் ‘எங்களின் தங்கப் பெண்’ எனக் கொண்டாடி மகிழ்கின்றனர்.

இதற்கிடையே அவர் சர்வதேச ஒலிம்பிக் கமிட்டியின் தடகள ஆணையத்திற்கு தேர்ந்தெடுக்கப்பட்டார். 

கூடவே ஜிம்பாப்வே ஒலிம்பிக் கமிட்டியின் துணைத் தலைவராகவும்

தவிர, 2036ம் ஆண்டு ஒலிம்பிக் போட்டியை நடத்த இந்தியா தீவிரமாக முயற்சித்து வருகிறது. அந்த ஒலிம்பிக்கை எந்த நாடு நடத்தும் என்பதை தீர்மானிக்கும் குழுவிலும் அவர் இருக்கிறார். தற்போது அவர், இந்த 2036ம் அண்டு ஒலிம்பிக்கை நடத்தும் உரிமை யாருக்கு என்பது குறித்து வரும்நாட்களில் கருத்து தெரிவிப்பதாகக் கூறியுள்ளார்.  

சர்வதேச விளையாட்டில் ஒலிம்பிக் கமிட்டி தலைவர் பதவி என்பது அதிகாரமிக்கது. இதனால் கிறிஸ்டி கோவென்ட்ரிக்கு பல்வேறு சவால்கள் காத்திருக்கின்றன. ஒரு பெண்ணாகவும், ஒலிம்பிக் பதக்க வீராங்கனையாகவும் அதனை எப்படி எதிர்கொள்வார் என்பதைப் பொறுத்திருந்து பார்க்க வேண்டும்.