‘ஃபோர்ப்ஸ்’ நிறுவனம் 2025ம் ஆண்டிற்கான உலகின் 10 சக்திவாய்ந்த நாடுகளின் பட்டியலை வெளியிட்டுள்ளது. அமெரிக்கா முதலிடத்திலும், சீனா இரண்டாவது இடத்திலும் உள்ளன. இஸ்ரேல் பத்தாவது இடத்தைப் பிடித்துள்ளது. 

இந்தப் பட்டியல் பல முக்கிய காரணிகளை அடிப்படையாகக் கொண்டது. ஆனால், அதிக மக்கள் தொகை, நான்காவது பெரிய ராணுவம் மற்றும் ஐந்தாவது பெரிய பொருளாதாரம் கொண்ட இந்தியாவை பட்டியலில் சேர்க்காதது பல கேள்விகளையும், விவாதங்களையும் கிளப்பியுள்ளது.

இருப்பினும், இந்தப் பட்டியல், ஐந்து முக்கிய காரணிகளை அடிப்படையாகக் கொண்டு தயாரிக்கப்பட்டது என்று ‘ஃபோர்ப்ஸ்’ தெளிவுபடுத்தியுள்ளது. அவை இவைதான்: தலைமைத்துவம், பொருளாதார செல்வாக்கு, அரசியல் செல்வாக்கு, வலுவான சர்வதேசக் கூட்டணிகள் மற்றும் ஒவ்வொரு நாட்டின் இராணுவ வலிமை.

WPP என்ற உலகளாவிய சந்தைப்படுத்தல் மற்றும் தகவல் தொடர்பு நிறுவனத்தின் ஒரு பிரிவான BAV குரூப் மற்றும் பென்சில்வேனியா பல்கலைக்கழகத்தின் வார்டன் பள்ளியைச் சேர்ந்த பேராசிரியர் டேவிட் ரீப்ஸ்டீன் தலைமையிலான ஆராய்ச்சியாளர்கள், யுஎஸ் நியூஸ் & வேர்ல்ட் ரிப்போர்ட்டுடன் இணைந்து இந்த தரவரிசை மாதிரியை உருவாக்கியதாக ‘ஃபோர்ப்ஸ்’ தெரிவித்துள்ளது.