திரைப்படத் துறைக்கு ஆஸ்கர் விருது, தொலைக்காட்சித் துறைக்கு எம்மி விருது, நாடகத் துறைக்கு டோனி விருது போல வருடந்தோறும் இசைத் துறையில் சிறப்பாகச் செயல்பட்டவர்களுக்கு ‘கிராமி விருது’ வழங்கப்படுகிறது. 

அதுவும் இசைத்துறையின் பல்வேறு பிரிவுகளில் இந்த விருது வழங்கப்படுகிறது. சமீபத்தில் லாஸ் ஏஞ்சல்ஸில், 67வது கிராமி விருது வழங்கும் விழா நடந்தது. இதில் ‘பெஸ்ட் நியூ ஏஜ், ஆம்பியன்ட் ஆர் சான்ட் ஆல்பம்’ என்ற கிராமி விருதைத் தட்டியிருக்கிறார் சந்திரிகா டாண்டன் என்கிற அமெரிக்க வாழ் இந்தியர்.

சென்னையில் பிறந்து, வளர்ந்தவர் சந்திரிகா. ‘பெப்சி’ நிறுவனத்தின் தலைமைச் செயல் அதிகாரியாக இருந்த இந்திரா நூயியின் சகோதரி இவர். சந்திரிகாவின் அம்மா ஓர் இசைக் கலைஞர்; தந்தை வங்கியில் வேலை செய்தார். 

சந்திரிகாவுக்கு ஒரு சகோதரரும் இருக்கிறார். குடும்பத்தில் முதல் மகள் என்பதால், 18 வயதிலேயே சந்திரிகாவுக்குத் திருமண ஏற்பாடுகள் நடந்தன. ஆனால், சந்திரிகாவுக்கு மெட்ராஸ் கிறிஸ்டியன் கல்லூரியில் சேர்ந்து படிக்க வேண்டும் என்பது ஆசை.

இளங்கலைப் படிப்பை முடித்த பிறகு, தாத்தாவைப் போல சட்டப்படிப்பு படிக்க வேண்டும் என்று விருப்பப்பட்டார். ஆம்; சந்திரிகாவின் தாத்தா நீதிபதியாக இருந்தவர். ஆனால், சந்திரிகாவுக்குப் பாடம் எடுத்த பேராசிரியர் ஒருவர், அகமதாபாத்தில் உள்ள ஐஐஎம்மில் சேர்ந்து படித்து, பிசினஸில் ஈடுபடச் சொல்லியிருக்கிறார். 

பேராசிரியரின் வழிகாட்டல் சந்திரிகாவின் வாழ்க்கையையே மாற்றிவிட்டது. ஐஐஎம்மில் சேர்வது அவ்வளவு சுலபமல்ல. ஆயிரக்கணக்கானோர் ஐஐஎம், அகமதாபாத்தில் சேர்வதற்கு விண்ணப்பித்து, அதற்கான நுழைவுத்தேர்வை எழுதினார்கள்.

நன்றாகப் படித்து, 1975ல் ஐஐஎம்மில் பட்டப்படிப்பை முடித்தார். லெபனானின் தலைநகரான பெய்ரூட்டில் அமைந்திருந்த சிட்டி பேங்கில் வேலை கிடைத்தது. 

அப்போது லெபனானில் உள்நாட்டுப்போர் நடந்து கொண்டிருந்தது குறிப்பிடத்தக்கது. இதற்குப் பிறகு நியூயார்க்கில் உள்ள புகழ்பெற்ற நிறுவனமான ‘மெக்கன்சி அண்ட் கம்பெனி’யில் உயர் பதவி வகித்தார். விரைவிலேயே அந்நிறுவனத்தில் பங்குதாரரும் ஆனார்.