‘‘இந்தியாவில் குழந்தைப் பிறப்பு விகிதம் குறைந்து வருகிறது; முதியவர்களின் எண்ணிக்கை அதிகரித்துக்கொண்டே செல்கிறது...’’ என்பதுதான் சமீபத்திய ஹாட் டாக். கடந்த 2023ம் வருடத்தின் கணக்கெடுப்பின்படி, உலகம் முழுவதும் 60 வயது அல்லது 60 வயதுக்கும் அதிகமானோரின் எண்ணிக்கை, 110 கோடியைத் தாண்டிவிட்டது. 

அதாவது, 2023ன் கணக்கெடுப்பின்படி உலக மக்கள் தொகையில் 14.16 சதவீதத்தினர் முதியவர்கள். 2050ம் வருடம் முதியவர்களின் எண்ணிக்கை, 221 கோடியாக உயரும். அதாவது, 2050ல் உலகில் வாழும் மொத்த மக்களில் 22 சதவீதம் பேர் முதியவர்களாக இருப்பார்கள்.

மட்டுமல்ல, முதியவர்களைக் கவனித்துக்கொள்வதும், அவர்களின் நல்வாழ்வும் இந்தியாவின் முன்னுரிமையாக மாறப்போகிறது. ஆம்; மற்ற நாடுகளைப் போல இந்தியாவிலும் முதியவர்களின் எண்ணிக்கை அதிகரித்துக்கொண்டே செல்கிறது. 

அதே நேரத்தில் குழந்தைப் பிறப்பு விகிதம் குறைந்து வருகிறது. இப்போது இந்தியாவில் 60 வயது மற்றும் 60 வயதுக்கும் மேலானவர்களின் எண்ணிக்கை, 14.9 கோடி. அதாவது, இந்தியாவின் மொத்த மக்கள் தொகையில் முதியவர்களின் எண்ணிக்கை, 10.5 சதவீதம்.

2050ல் இந்தியாவில் முதியவர்களின் எண்ணிக்கை இரட்டிப்பாகி, 35 கோடியாக இருக்கும். அதாவது, மொத்த மக்கள் தொகையில் முதியவர்களின் எண்ணிக்கை 20.8 சதவீதமாக இருக்கும். ஃபிரான்ஸில் முதியவர்களின் எண்ணிக்கை இரட்டிப்பாக 120 ஆண்டுகளானது; ஸ்வீடனில் 80 ஆண்டுகளானது. 

ஆனால், இந்தியாவில் 26 வருடங்களில் முதியவர்களின் எண்ணிக்கை இரட்டிப்பாகப் போகிறது என்பதுதான் இதில் ஹைலைட். இன்றைய தேதியில் இந்தியாவில் வாழும் முதியவர்களில் 40 சதவீதம் பேர் ஏழ்மையான நிலையில் உள்ளனர்; மீதி 40 சதவீதம் பேர் கடுமையான ஏழ்மையிலும், 20 சதவீதம் பேர் ஓரளவுக்கு வசதி மற்றும் நல்ல வசதியுடன் இருக்கின்றனர்.

ஆந்திராவின் கருத்தரிப்பு விகிதமும், ஸ்வீடனின் கருத்தரிப்பு விகிதமும் ஒரே அளவில் இருக்கின்றன. ஆனால், ஸ்வீடனின் தனி நபர் வருமானத்துடன் ஒப்பிடும்போது, ஆந்திராவில் 28 மடங்கு குறைவு. இந்த ஒப்பீடு கருத்தரிப்பு விகிதத்தில் ஐரோப்பாவுடன் போட்டி போட்டாலும் கூட, பொருளாதார முன்னேற்றத்தில் மிகவும் பின் தங்கியிருக்கிறோம் என்பதையே காட்டுகிறது.

‘‘ஒரு தேசத்தில் கருத்தரிப்பு விகிதம் தொடர்ந்து குறைந்துகொண்டே சென்றால், அந்நாட்டின் மக்கள் தொகை பெரியளவில் வீழ்ச்சியடையும்...’’ என்கிறார் மக்கள் தொகை ஆய்வாளரான டிம் டைசன். இந்தியாவில் இப்போதிருக்கும் கருத்தரிப்பு விகிதமே தொடர்ந்தால், 2050ல் 1.29 என்ற விகிதத்தை அடையும். 2100ல் 1.04 என்ற அளவில் கருத்தரிப்பு விகிதம் இருக்கும்.

தவிர, தள்ளிப்போகும் திருமணங்கள், வேலையில் முன்னேற்றத்திற்காக காத்திருத்தல் போன்றவையும் குழந்தை பிறப்பைக் குறைக்கின்றன. முக்கியமாக பொருளாதாரம் சார்ந்த பிரச்னைகளும் ஒரு காரணம்.

ஆம்; நகரங்களில் வாழ அதிக பணம் தேவையாக இருக்கிறது, நிறைய குழந்தைகளைப் பெற்றுக்கொண்டால் பொருளாதார ரீதியாக சமாளிப்பது கடினம் போன்றவற்றாலும் பல குடும்பங்கள் ஒரு குழந்தையோடு நிறுத்திவிடுகின்றனர். குழந்தையே வேண்டாம் என்று கூட பல தம்பதிகள் வாழ்ந்து கொண்டிருக்கின்றனர் என்பதையும் இந்த இடத்தில் குறிப்பிடுவது நல்லது.l