அமெரிக்க அதிபராக தேர்வு செய்யப்பட்டுள்ள டொனால்ட் டிரம்ப் 20ம் தேதி பதவியேற்கிறார். அன்று மார்ட்டின் லூதர் கிங் ஜூனியர் பிறந்த நாளை நினைவுகூரும் நாள் என்பதால் இந்தப் பதவியேற்பு விழா கூடுதல் சிறப்பைப் பெறுவதாக அவரின் ஆதரவாளர்கள் உற்சாகம் பொங்க மெச்சுகின்றனர். அதேவேளையில் அவரின் சமீபத்திய பேச்சுக்கள் உலக அளவிலான அரசியல் களத்தில் கடும் விமர்சனங்களையும் சலசலப்பையும் ஏற்படுத்தியுள்ளன. 

அதிரடி அரசியலுக்குப் பெயர் போனவர் டிரம்ப் என்பது எல்லோருக்கும் தெரியும். கடந்த 2016ம் ஆண்டு முதல்முறையாக அமெரிக்க அதிபராக பதவியேற்றபோது அனுபவமே இல்லாமல் இருந்தார். என்றாலும் பல்வேறு அதிரடி நடவடிக்கைகளை செய்தார். இதனால் ஒருகட்டத்தில் அவரின் ஆதரவாளர்களே அவருக்கு எதிராக மாறினர்.   

அவர் வீட்டில் நடந்த செய்தியாளர் சந்திப்பில், பனாமா கால்வாயையும், கிரீன்லாந்தையும் கையகப்படுத்த வேண்டும் என்றும், கனடாவை அமெரிக்காவுடன் இணைத்து அமெரிக்காவின் 51வது மாநிலமாக மாற்ற வேண்டும் என்றும் குறிப்பிட்டார். சமீபமாகவே இது தொடர்பாக அவர் தொடர்ந்து பேசி வருகிறார்.  

இத்துடன் நிற்கவில்லை டிரம்ப். மெக்ஸிகோ வளைகுடாவை அமெரிக்க வளைகுடா என பெயர் மாற்ற வேண்டும் என்றும் கூறினார். இதற்கு உடனடியாக எதிர்ப்பு தெரிவித்த மெக்ஸிகோ அதிபர் கிளாடியா ஷீன்பாம் பர்டோ, ‘என்னுடைய சொந்த கருத்து என்னவென்றால் வடஅமெரிக்கா என்பதை மெக்ஸிகோ அமெரிக்கா எனப் பெயர் மாற்றலாம்’ எனப் பதிலடி கொடுத்து டிரம்ப்பின் வாயை மூடினார்.

டிரம்ப், கனடாவை அமெரிக்காவுடன் இணைத்து 51வது மாநிலமாக மாற்றவோம்... இல்லையெனில் கனடாவிற்கு பொருளாதார அழுத்தம் தருவேன் என்கிறார். கனடா பிரதமர் ட்ரூடோவை கனடாவின் கவர்னர் எனக் கேலி செய்தும் வருகிறார். 

‘அமெரிக்காவின் தயவில்தான் கனடா இருக்கிறது. நாம் அவர்களுக்கு நிதி உதவி கொடுக்கிறோம். நிறைய சலுகைகள் கொடுக்கிறோம். ஏற்றுமதி, இறக்குமதி வாய்ப்பு தருகிறோம். ராணுவ ஒத்துழைப்பு வழங்குகிறோம்.

கிரீன்லாந்து, கனடாவின் வடகிழக்கில் பனிக்கட்டியால் மூடப்பட்டுள்ள உலகின் மிகப்பெரிய தீவு. இதில், 60 ஆயிரம் பேர் வசித்து வருகின்றனர். இது டென்மார்க் நாட்டின் தன்னாட்சி பெற்ற பிரதேசமாக விளங்குகிறது.

இதற்கு தேர்ந்தெடுக்கப்பட்ட அரசாங்கமும் இருக்கிறது.ஐரோப்பா, ரஷ்யா, அமெரிக்கா இடையே கிரீன்லாந்து உள்ளதால் பொருளாதார மற்றும் பாதுகாப்புக் காரணங்களுக்காக இதை ஒரு முக்கிய இடமாக அமெரிக்கா கருதுகிறது. குறிப்பாக ஆர்க்டிக் கடல் பனி உருகுவதால் புதிய கப்பல் பாதைகள் திறக்கப்பட்டுள்ளன.

கிரீன்லாந்தின் வடக்குப் பகுதியில் அமெரிக்காவின் ராணுவ தளமும் உள்ளது. இந்நிலையில், ‘தேசிய பாதுகாப்பிற்காக கிரீன்லாந்து எங்களுக்குத் தேவை. ரஷ்யா மற்றும் சீனாவின் கப்பல்கள் உலகம் முழுவதும் உள்ளன. 

இனி நாங்கள் அதை நடக்கவிடமாட்டோம்’ என்கிறார் டிரம்ப். ஏனெனில், கிரீன்லாந்தின் மின்தேவையை சீனா பூர்த்தி செய்கிறது. தவிர ரஷ்யா, கிரீன்லாந்து இடையேயான வடக்கு கடல்வழியை ரஷ்யா வணிகக் கப்பல் மூலம் கடந்துவிட்டது. ரஷ்யாவும், சீனாவும் இதைப் பயன்படுத்துவது மேற்கத்திய நாடுகளுக்குக் கவலை அளித்தன.