சமீபத்தில் கனடா பிரதமர் ஜஸ்டின் ட்ரூடோ பதவி விலகுவதாக அறிவித்தார். லிபரல் கட்சியின் தலைவராக கடந்த 2015ம் ஆண்டில் கனடாவின் பிரதமராகப் பதவியேற்றவர் அவர். அப்போதிலிருந்து தொடர்ந்து பத்து ஆண்டுகளாக பிரதமராக இருந்து வருகிறார். 

இந்த ஆண்டு தேர்தல் நடக்கவுள்ள நிலையில் உட்கட்சியிலேயே அவருக்கு செல்வாக்கு சரிந்த காரணத்தினாலும், நாடு முழுவதும் ஆதரவு குறைந்து வருவதாலும் அவர் பிரதமர் பதவியிலிருந்து விலகும் முடிவை எடுத்துள்ளார்.

இந்நிலையில் அடுத்த பிரதமர் யார் என்ற கேள்வி எழ, இப்போது தமிழக வம்சாவளியைச் சேர்ந்த அனிதா ஆனந்த் பெயர் முன்னணியில் அடிபட்டு வருகிறது. யார் இந்த அனிதா ஆனந்த் என்பதே இணையத்தில் லேட்டஸ்ட் வைரல்!  தற்போது கனடாவின் போக்குவரத்து மற்றும் உள்நாட்டு வர்த்தகத் துறை அமைச்சராக இருப்பவர்தான் அனிதா ஆனந்த். 

இதற்குமுன்பாக தேசிய பாதுகாப்புத் துறை அமைச்சராகவும், பொது சேவை மற்றும் கொள்முதல் துறை அமைச்சராகவும் சிறப்பாகப் பணியாற்றியவர். அதனாலேயே பிரதமராக தேர்ந்தெடுக்கப்படும் வாய்ப்பு அவருக்குக் கிட்டியிருக்கிறது.

கடந்த 1967ம் ஆண்டு கனடாவின் நோவா ஸ்கோட்டியா மாகாணத்தின் கென்ட்வில் நகரில் பிறந்தவர் அனிதா ஆனந்த். தந்தை எஸ்.வி.ஆனந்த் தமிழகத்தைச் சேர்ந்தவர். பொதுநல மருத்துவர். தாய் சரோஜ் தௌலத் ராம், பஞ்சாப்பை பூர்வீகமாகக் கொண்டவர். 

மயக்க மருந்தியல் நிபுணர். அனிதா ஆனந்திற்கு ஓர் அக்காவும் ஒரு தங்கையும் உள்ளனர். அக்கா கீதா ஆனந்த் கனடாவில் தொழிலாளர் வழக்கறிஞராகவும், தங்கை சோனியா ஆனந்த் மருத்துவப் பேராசிரியராகவும் இருக்கின்றனர். அனிதா ஆனந்தின் குடும்பம் 1960களில்தான் கனடா சென்றுள்ளது. அதாவது, 1960களின் தொடக்கத்தில் அனிதாவின் அப்பா ஆனந்தும், அம்மா சரோஜ் தௌலத்ராமும் நைஜீரியாவில் வசித்து வந்தனர்.

இங்கேதான் அனிதா தனது கணவர் ஜானைச் சந்தித்தார். 1995ம் ஆண்டு இவர்கள் இருவரும் திருமணம் செய்துகொண்டனர். இவர்களுக்கு தற்போது நான்கு குழந்தைகள் உள்ளனர். இதற்கிடையே டொரொன்டோ பல்கலைக்கழகத்தில் சட்ட மேற்படிப்பும் முடித்தார். தொடர்ந்து இதே பல்கலைக்கழகத்தில் சட்ட பேராசிரியராகப் பணியாற்றினார்.

ஆரம்பத்தில் கனடாவின் சர்வதேச கார்ப்பரேட் சட்ட நிறுவனமான டோரிஸில் தனது வழக்கறிஞர் வாழ்க்கையை ஆரம்பித்து, பின்னர் ஆன்டோரியாவில் உள்ள வெஸ்டர்ன் பல்கலைக்கழகத்தில் உதவி பேராசிரியராக பணியில் சேர்ந்துள்ளார் அனிதா. அமெரிக்காவின் யேல் பல்கலைக்கழகத்தின் வருகை தரும் பேராசிரியராகவும் விளங்கினார்.

ஆம். அது நாடாளுமன்றத்திற்கான பொதுத் தேர்தல் நேரம். அப்போது லிபரல் கட்சியின் சார்பில் ஆன்டோரியா மாகாணத்தின் ஓக்வில் நாடாளுமன்ற தொகுதியிலிருந்து 2015ல் வெற்றி பெற்றிருந்த ஜான் ஆலிவர், 2019ம் ஆண்டு தேர்தலில், தான் போட்டியிடப் போவதில்லை என அறிவித்தார்.  

இதனால், அனிதா ஆனந்திற்கு அந்த சான்ஸ் கிடைத்தது. லிபரல் கட்சி சார்பில் போட்டியிட்டு வெற்றியை ஈட்டி முதல்முறையாக கனடாவின் நாடாளுமன்றத்திற்குள் நுழைந்தார். அவரின் பின்புலத்தால் அவருக்கு பொது சேவைகள் மற்றும் கொள்முதல் துறை அமைச்சர் பதவி வழங்கப்பட்டது.

இதனால், பிரதமர் ஜஸ்டின் ட்ரூடோவின் நம்பிக்கைக்கு உரியவராக ஆனார். பின்னர் 2021ல் மீண்டும் பொதுத்தேர்தல் நடக்க அதிலும் வெற்றி பெற்றார் அனிதா ஆனந்த். இப்போது அவருக்கு தேசிய பாதுகாப்புத் துறை அளிக்கப்பட்டது. அந்தத் துறையின் அமைச்சராக அவர் ராணுவ பாலியல் முறைகேடு வழக்குகளை விசாரிக்கச் செய்தார். 

அத்துடன் கனடா ஆயுதப் படைகளில் நீடித்த கலாசார மாற்றத்தை உருவாக்குதல், இராணுவ செலவினங்களை உயர்த்துவதன் மூலம் கனடாவின் இராணுவத்தை சிறந்த முறையில் ஆயத்தப்படுத்துதல், கனடா தனது இராணுவ நிலைப்பாடுகள் மூலம் உலகம் முழுவதும் அமைதி மற்றும் ஸ்திரத்தன்மைக்கு தொடர்ந்து ஆதரவளிப்பதை உறுதி செய்தல் என மூன்று முக்கிய விஷயங்களுக்கு முன்னுரிமை அளித்தார்.

எல்லா பொறுப்புகளையும் சிறப்பாக மேற்கொண்டார். கூடவே குடும்பத்தையும் பேலன்ஸாக கொண்டு சென்றார். எந்தச் சூழ்நிலையையும் சிறப்பாகக் கையாண்டு பணியாற்றியது பலரின் கவனத்தை ஈர்த்தது.

முக்கியமாக அரசாங்கப் பணிகளில் அவரின் அனுபவமும், அவற்றிலுள்ள சிக்கல்களை அணுகும் முறையும், அவரின் வலுவான சட்டப் பின்னணியும், தலைமைத்துவமும் இன்று பிரதமர் பதவிக்கான வலுவான வேட்பாளராக அவரை முன்னிறுத்தி இருக்கிறது. கனடாவின் அடுத்த பிரதமராக 57 வயதான அனிதா ஆனந்த் தேர்ந்தெடுக்கப்பட வாய்ப்புள்ளதாகத் தெரிவிக்கின்றன தகவல்கள்.