நம் தேசம் சுதந்திர தினத்தை கோலாகலமாக கொண்டாடிக் கொண்டிருந்த அதே வேளையில் நமக்கு அருகாமையில் இன்னொரு நாடு தனது சுதந்திரத்தை இழந்தது. ஆம். ஆப்கானிஸ்தானில் தலிபான்கள் ஆட்சியைப் பிடித்து மூன்று ஆண்டுகள் நிறைவு செய்ய உள்ளது. 

ஆப்கனின் அதிபராக இருந்த அஷ்ரப் கனியை அகற்றிவிட்டு, தலிபான்கள் மீண்டும் ஆட்சியைக் கைப்பற்றிய நாள் ஆகஸ்ட் 15, 2021. தலிபான்கள் ஆட்சிக்கு வந்த இந்த 3 ஆண்டுகளில் நாட்டின் பொருளாதாரம் மிகப்பெரும் சரிவை சந்தித்திருக்கிறது. மக்கள் போதுமான சுதந்திரமின்றி நெருக்கடியின் பிடியில் உள்ளனர்.

 பல லட்சம் மக்கள் வெறும் ரொட்டியும், தேநீரும் மட்டும் உண்டு வாழ்வதாக ஐக்கிய நாடுகள் சபை தெரிவித்துள்ளது. இதில் மிகப்பெரிய நெருக்கடி அக்காலம் முதல் இக்காலம் வரையிலும் பெண்களுக்குத்தான்.

1996ம் ஆண்டு தலிபான்கள் ஆட்சியைப் பிடித்து 2001ம் ஆண்டு வரை இவர்கள் பெண்களுக்கு செய்த கொடுமைகளை உலகம் மறக்காது. மீண்டும் 2021ம் ஆண்டு அமெரிக்க படை ஆப்கனிலிருந்து வெளியேறியதையடுத்து மீண்டும் தலிபான் ஆட்சி அமலுக்கு வந்தது. தொடர்ந்து பெண்களின் சுதந்திரமும் முழுமையாக பறிக்கப்பட்டு அடிப்படை உரிமைகளும் கூட அவர்களுக்கு மறுக்கப்பட்டன. 

பெண்கள் 6ம் வகுப்புக்கு மேல் படிக்கக் கூடாது, முகம் உட்பட உடல் முழுவதையும் மறைக்கும் ஆடை அணிய வேண்டும், ஆண் துணை இல்லாமல் பொது இடங்களுக்கு செல்லக் கூடாது, திருமணத்தைக் கடந்த உறவுக்கு உயிர் போகும் வரை கல்லடி... என்பது உட்பட பணியிடங்களிலும் கடுமையான தடைகள் பிறப்பிக்கப்பட்டுள்ளன.

‘‘என் பெயர் குல்ஜான். முதியவள். சாலையோரங்களில் புத்தகங்களை விற்கிறேன். மீண்டும் வீடு வந்து சேர்வேன் என்ற நம்பிக்கையில்லாமல்தான் ஒவ்வொரு நாளும் மாலை வீட்டை விட்டு புத்தகங்களை விற்க கிளம்புகிறேன். இப்படி எண்ணற்ற பெண்கள் தங்கள் உயிரைப் பணயம் வைத்து செயல்படுகிறார்கள்.

என் நாடு நாளுக்கு நாள் பின்தங்கிக் கொண்டிருக்கிறது. இளைஞர்கள் படிப்பறிவில்லாமல் உலக நடப்பு தெரியாமல் வாழ்ந்து கொண்டிருக்கிறார்கள். அவர்களுக்கு குறைந்தபட்சம் இந்த நாவல்கள் மற்றும் உலகத் தலைவர்களின் வரலாறு, சமூக நெறி கதைகள் என என்னால் முடிந்த புத்தகங்களை மிகக் குறைந்த விலையில் கொண்டு போய் சேர்க்கிறேன். இதில் என்னுடைய வாழ்வாதாரமும் அடங்கி இருக்கிறது...’’ கண்கள் கலங்குகிறார் குல்ஜான்.

2021ம் ஆண்டு தலிபான் ஆட்சியைப் பிடித்தபோது இஃபாத்துக்கு வயது 18. பள்ளிப் படிப்பை முழுமையாக முடித்து காபுல் பல்கலைக்கழகத்தில் சைக்காலஜி படிப்பிற்காக பதிவு செய்தார். அதற்கான அனுமதி சீட்டும் கிடைத்துவிட்டது. 

ஆனால், தலிபான் அடக்கு முறையால் ஒரு பெண் தனியாக வாழ்வதற்கோ அல்லது தனியாக பயணிப்பதற்கோ உரிமை மறுக்கப்பட்ட நிலையில் விமான நிலையத்திலேயே நிறுத்தி வைக்கப்பட்டார் இஃபாத். சைக்காலஜி படித்து மருத்துவராக இருக்க வேண்டிய இஃபாத் தற்போது தனது வாழ்வில் பெரும்பகுதியை இணையதளத்தில் கழித்துக் கொண்டிருக்கிறார்.

தலிபான்களின் ஆட்சியும் எக்ஸ், யூடியூப் உள்ளிட்ட இணையதளங்கள் வாயிலாகத்தான் செயல்பட்டுக் கொண்டிருக்கிறது. எனவேதான் முழுமையான அல்லது கட்டுப்பாடுகள் நிறைந்த இணையதளத்தை இன்னமும் தலிபான் ஆட்சி கொண்டுவரவில்லை அல்லது கொண்டுவர முடியவில்லை. 

இதனால் மட்டும்தான் அங்கே பெண்களும் அவர்கள் விருப்பப்படி இணையதளத்தை இன்னமும் பயன்படுத்த முடிகிறது. ஆனால், கூடிய விரைவில் நவீன கட்டுப்பாடுகள் நிறைந்த இணையதள சேவையை ஆப்கானிஸ்தானில் கொண்டு வருவோம் என்கிறார் தலிபான்களின் தலைவர் ஹிபத்துல்லாஹ் அகுந்த்சடா.

‘‘முழுமையான கட்டுப்பாடுகள் வரும் வரையிலாவது எங்களின் வாழ்வாதாரத்தில் முடிந்தவரை வாழ்ந்து கொள்கிறோம்...’’ வேதனைகள் வார்த்தைகளில் தெரிய தினமும் உடல் முழுவதும் துணிகளால் மறைத்துக் கொண்டு மங்கலான வெளிச்சத்தில் இருக்கும் ஒரு அடித்தள கடையில் துணிகள் விற்கிறார் செதிகா. 

அவருக்கு வயது 23. பேச்சுத் துணைக்குக் கூட நண்பர்கள் இல்லாமல் தன்னந்தனியாக நாள் முழுவதும் கடையில் வேலை செய்ய வேண்டிய நிலையில் தற்போது செயற்கை நுண்ணறிவு AI சாட்பாட் கிபியுடன் பொழுதைக் கழித்துக் கொண்டிருக்கிறார் செதிகா. செதிகாவின் ஆங்கில மொழி ஆசிரியரும் இந்த ஏஐதான்.

இந்த செயலி ஆப்கானிஸ்தான் மற்றும் ஈரான், ஈராக் உள்ளிட்ட போர்க்கள பூமியில் அதீத பிரபலம். காரணம் இதனை மிகச் சாதாரண மொபைலிலும் கூட இலவசமாக பயன்படுத்த முடியும்.

ஆனால், pi நெட்வொர்க் மூலம் பெரிய வருமானம் கிடைத்ததற்கான சான்றுகள் இதுவரை கிடையாது. முழுமையாக பணத்தை அடிப்படையாகக் கொண்டு இயங்கும் இந்த இணையதளம் இப்போது வரை கற்றலுக்கான நெட்வொர்க்காக மட்டுமே பயன்படுவதாக அங்கு இருக்கும் பெண்கள் தெரிவிக்கின்றனர். 

மற்ற டிரேடிங் செயலி போல் இந்த நெட்வொர்க்கில் பணம் சம்பாதிப்பது என்பது இப்போது வரை சாத்தியமில்லை. ஆனால், ஒரே சமயத்தில் பல பெண்கள் சேர்ந்து பெட்டிங் முறைப்படி இந்த நெட்வொர்க்கை பயன்படுத்தும் பொழுது ஒரு சில பெண்களுக்கு இதன் மூலம் மிகச் சிறிய தொகை கிடைக்கும் வாய்ப்புகள் உண்டு.

22 வயது ஃபர்யல், தினமும் கூகுள் மீட் மூலம் பத்துக்கும் மேற்பட்ட மாணவிகளுக்கு ஊடக உரிமை (media rights) மற்றும் குற்றப்பிரிவு சட்டங்கள் (criminal  laws) குறித்த வகுப்புகள் எடுத்து வருகிறார். இவருக்கான கூகுள் மீட் ஆன்லைன் வகுப்பறையை வெளிநாடு வாழ் ஆப்கானிஸ்தான் தன்னார்வலர்கள் உருவாக்கிக் கொடுத்திருக்கிறார்கள். 

தினமும் அவர்கள் கூகுள் மீட்டைத் துவங்கி விபிஎன் மூலம் இணைப்பு கொடுத்து அதன் மூலம் வகுப்பெடுக்கிறார் ஃபர்யல். வெளிநாட்டில் இருந்து செயல்படுத்தப்படும் இந்த இணையதளத்தை தலிபான் அதிகாரிகளால் முழுமையாக கட்டுப்படுத்த முடியவில்லை. எனினும் உள்ளூர் காவலர்கள் மூலம் அவ்வப்போது ஆன்லைன் வகுப்புகள் ஏதேனும் நடக்கின்றனவா என்பதை உறுதி செய்ய வீட்டை விட்டு வெளியேறும் பெண்களின் மொபைல் ஃபோன்களை சோதனையிடும் முறையும் நிகழ்ந்து வருகிறது.

எனவே ஃபர்யல் வீட்டை விட்டு வெளியேறும்பொழுது மொபைல் போனை எடுத்துச் செல்வதில்லை. 27 வயது சதியா, ஆன்லைனில் உடைகள் விற்கும் தொழில் செய்து வருகிறார். ஆனால், தனது உடைகளை காட்சிப்படுத்த எந்த மாடல் பெண்களும் தயாராக இல்லாத நிலையில் அவரது தொழிலும் சரிவை சந்தித்துக் கொண்டிருக்கிறது. 

இதற்கிடையில் அவ்வப்போது மதத்திற்கு எதிராக அவர் செயல்படுவதாக தலிபான் ஆதரவு ஆண்களின் அடக்குமுறைகள் வார்த்தைகளாகவும் இணைய தடை செயல்பாடுகளாகவும் அவரது தொழிலுக்கு இடையூறு செய்வதாகவும் தெரிவிக்கிறார்.