மணமுறிவுக்குப் பிறகும் தவிர்க்க இயலாத காரணங்களால் ஒரே கூரையின்கீழ் வாழும் இணையர்கள் குறித்து ‘த கார்டியன்’ ஆங்கிலப் பத்திரிகையில் கட்டுரை வெளியாகி யிருக்கிறது. அதிலுள்ள செய்திகள், நிஜக் கதைகள் சுவாரசியமானவை மட்டுமல்ல... இக்கால ஆண், பெண் உறவுநிலை குறித்த பல வினாக்களையும் எழுப்புகின்றன.  

ஒரே கூரையின் கீழ் ஆணும் பெண்ணும் வாழ ‘தவிர்க்க முடியாத காரணம்’ குழந்தைகளும் பொருளாதாரச் சிக்கல்களும்தான். ஒரு தம்பதியினருக்குப் பதின் வயதில் மகள் இருக்கிறாள். இருவரும் சேர்ந்து வாங்கிய வீடு அடமானத்தில் உள்ளது. அதற்கு வட்டி கட்டவேண்டும்.

ஒரு சாதாரண வேலையில் இருந்துகொண்டு சிறிய வீட்டில் வசிப்பதால் காதலியுடன் கொஞ்சிக் குலாவுவதற்கு இடமில்லை. 

அந்தரங்கமாக உரையாடுவதற்கோ இரவு தங்குவதற்கோ தனியறை இல்லாததால் அவளைத் தன் வீட்டுக்கு அழைத்துக்கொண்டு வர முடிவதில்லை. ஆகையால் வாரம் இருமுறை காதலியின் வீட்டுக்கே சென்றுவிடுகிறான். புதிய காதலன் வீட்டுக்கு வரும்போதெல்லாம் முன்னாள் கணவன் தனது மெக்கானிக் ஷெட்டுக்குச் சென்று இரவு படுத்துக்கொள்ள வேண்டிய சூழல்.

சிலமுறை வரவேற்பறை சோஃபாவில் கணவன் உறங்க முயன்றிருக்கிறான். ஆனால், புதிய காதலர்களுக்கு அவனது இருப்பு இடைஞ்சலாக இருப்பதால் அந்த இரவுகளில் மட்டும் அவனை வெளியேறும்படி மனைவி உத்தரவிட்டிருக்கிறாள். இது மிகுந்த சங்கடத்தையும் அவமானத்தையும் அவனுக்கு உண்டாக்குகிறது. 

நாகரீகமாகவும் கண்ணியத்துடனும் நடந்துகொள்ள வேண்டும் என்பதால் அவர்கள் டேட் செய்யும் இரவுகளில் காதலனுக்கு முகமன் கூறி அவனை வரவேற்கிறான். பின்னர் பொறாமையால் மனம் கூசி, தனது கையாலாகாத்தனத்தால் நிலைகுலைந்து, தனிமையில் வெந்து புழுங்குகிறான்.

காலப்போக்கில் உறவு கசந்து சட்டரீதியில் இணையர் பிரிகின்றனர். ஆனால், மேற்சொன்ன பண வசதியின்மையால் ஒரே வீட்டில் வசிக்கின்றனர். மணமுறிவுக்குப் பிறகு கணவனுக்கு வேறொரு பெண்ணுடன் காதல் மலர்கிறது. அவள் அதே தெருவில் வசிக்கிறவள். இந்தக் காதலை முன்னாள் மனைவி விரும்புவதில்லை. 

‘வேறு எதாவது ஊரிலோ நகரத்திலோ புதிய பெண்ணைத் தேடிக்கொள். இதே தெருவில் இன்னொரு பெண்ணுடன் நீ ஜாலியாகச் சுற்றினால் எனது நட்பு வட்டத்தில் அது எனக்கு அவமானம்’ என்கிறாள். புதிய காதலை முறித்துக்கொள்ளும்படி அழுத்தம் தருகிறாள்.

இந்தப் புதிய காதலி அவனது பள்ளிப் பருவத்துத் தோழி. இருபது ஆண்டுகாலப் பழக்கம். அதனால் அவள் கொஞ்சம் சகிப்புத்தன்மையுடன் நடந்துகொள்கிறாள். இந்தச் சூழலில் முன்னாள் மனைவி வளர்த்த நாய் செத்துவிடுகிறது. 

நாய் மாண்ட சோகத்தில் அவள் மிகுந்த மன உளைச்சலுக்கு உள்ளானதால் கணவன் அவளுக்குப் புதிய நாயைப் பரிசளிக்கிறான். அவன் செய்த பிழை என்னவென்றால் தனது காதலிக்கும் ஒரு நாயை வாங்கித் தந்ததுதான். நாய் வளர்ப்பில் இரு பெண்களும் ராசியாகி விடுகிறார்கள். நாயைக் குளிப்பாட்டுகிறார்கள், ஒன்றாக நடைசெல்கிறார்கள், உல்லாசப் பயணம்கூட மேற்கொள்கிறார்கள்.

இம்மூன்று கதைகளிலும் பொதுவான அம்சம் என்னவென்றால் ‘எக்ஸ்’ ஆன பிறகே தங்களது கணவர்கள் முன்னைவிட நல்ல மனிதர்களாகத் தென்படுகிறார்கள் என எல்லாப் பெண்களும் ஒருமனதாக ஒப்புக்கொள்கிறார்கள். 

ஆனால், கணவர்களது கண்ணோட்டத்தில் மனைவியின் குணாதிசயத்தில் எந்த மாற்றமும் இருப்பதில்லை. ஒவ்வாமையும் வெறுப்பும் வளரவே செய்கிறது. இம்மூன்று கதைகளையும் இணைக்கும் மற்றொரு கண்ணி, ஆண்களின் incompetency. அது ஆளுமையாகவோ வருமானமாகவோ, கற்பொழுக்கமாகவோ இருக்கிறது.