உலகின் முன்னணி ஆடம்பர  ஃபேஷன் நிறுவனங்களில் ஒன்று, ‘பல்கேரி’. இத்தாலியைச் சேர்ந்த இந்த நிறுவனம், 140 வருடங்களுக்கு மேலாக இயங்கி வருகிறது. கைக்கடிகாரங்கள், வாசனைத் திரவியங்கள், தோல் பொருட்கள், நகைகள், ஆடைகள் என பல பொருட்கள் ‘பல்கேரி’ பிராண்டில் கிடைக்கின்றன.

சில வருடங்களுக்கு முன்பு ‘பல்கேரி’யைக் கையகப்படுத்திவிட்டது, ‘லூயி விட்டான்’ நிறுவனம். இந்நிலையில் சமீபத்தில் ‘ஆக்டோ ஃபினிசிமோ அல்ட்ரா சிஓஎஸ்இ’ என்ற கைக்கடிகாரத்தை அறிமுகப்படுத்தியது ‘பல்கேரி’. 

உலகிலேயே மெலிதான மெக்கானிக்கல் கைக்கடிகாரம் என்ற பெருமையைத் தட்டியிருக்கிறது இந்த கைக்கடிகாரம். ஆம்; இதன் டைட்டானியம் கேஸின் கனம் வெறும் 1.70 மில்லி மீட்டர்தான். அதாவது, இரண்டு கிரெடிட் கார்டுகளை ஒன்றன் மீது ஒன்றை அடுக்கி வைத்தால் வருகின்ற கனம் இது.