அக்கால நடிகை சுஜாதாவும், நடிகர் திலகம் சிவாஜியும் நிஜமான அந்தமான், நிகோபார் தீவின் இயற்கை கொஞ்சும் அழகில் டூயட் பாடியிருப்பார்கள். 

ஆனால் இன்று, ‘அந்தமானைப் பாருங்கள் அசிங்கம்...’ என்ற ரீதியில் விரைவில் பாடவேண்டிய சூழல் ஏற்படலாம் என்று எச்சரிக்கிறார்கள் சுற்றுச்சூழல் நிபுணர்கள். காரணம், ஒன்றிய அரசு 3 ஆண்டுகளுக்கு முன் கொண்டுவந்த ‘கிரேட் நிகோபார் ப்ராஜெக்ட்’ எனும் வளர்ச்சித் திட்டம்.

அந்தமான், நிகோபார் தீவுகள் இந்தியாவின் மிக முக்கியமான ஒரு யூனியன் பிரதேசம். இந்தப் பிரதேசத்தில் சுமார் 836 சிறு சிறு தீவுகள் இருக்கின்றன. ஆனால், மக்கள் வசிப்பது என்னவோ 31 தீவுகளில்தான். மீதமுள்ளவை எல்லாமே இயற்கையின் கொடைகள். 

உதாரணமாக மழைக்காடுகள், மலைகள், ஆறுகள், குளங்கள், குட்டைகள். காடுகள் என்பதால் அரிய வகை விலங்கினங்களும் இங்கு உண்டு. அதிகமான பழங்குடிகள் வசிக்கும் பிரதேசம். மக்கள்தொகையை எடுத்துக்கொண்டால் சுமார் 4 ½ லட்சம் பேர் இருப்பார்கள். இந்தப் பிரதேசத்தில் அந்தமானைவிட நிகோபார் தீவுகளில்தான் மழைக்காடுகள், ஆறு, குளங்களின் எண்ணிக்கை அதிகம்.

இதன்படி உலகத் தரத்தில் துறைமுகம், ஏர்போர்ட், சோலார் மின் திட்டங்களுக்கான ப்ராஜெக்ட் மற்றும் ஒரு புதிய நகரத்துக்கான நிர்மாணத் திட்டத்தை எல்லாம் கொண்டுவந்தது.

முதலில் அரசு அறிக்கை என்ன சொல்கிறது என்று பார்ப்போம்.‘நிகோபார் தீவுகளில் அரசு இந்தத் திட்டங்களுக்காக நிலத்தை கையகப்படுத்துவதற்கான அனுமதியை சுமார் 13,075 ஹெக்டேருக்குக் கொடுத்திருக்கிறது. 

ஆனால், இதில் பாதியான, அதாவது 130 சதுர கிலோமீட்டரில் பரந்திருக்கும் 6,500 ஹெக்டேரில் இருக்கும் 8.5 லட்சம்மரங்களை இந்தத் திட்டங்களுக்காக அப்புறப்படுத்தவேண்டியிருக்கும்’ என்று சொல்கிறது அரசு. இந்தக் கணக்கில்தான் கோளாறு இருப்பதாக ஆதாரம் காண்பிக்கிறார்கள் பழம் தின்று கொட்டை போட்டிருக்கும் சுற்றுச்சூழல் நிபுணர்கள். அவர்கள் என்ன சொல்கிறார்கள்?

ஓர் ஆய்வின்படி குறைந்தபட்சம் 15 சென்டிமீட்டர் மரங்களையும் கணக்கில் கொண்டு எல்லா அளவு மரங்களையும் நிகோபார் தீவில் வெட்டினால்கூட அங்கே சுமார் 65 லட்சம் மரங்கள் சாக நேரும் என்று கணக்கிட்டிருக்கிறார்கள் சூழல்வாதிகள். 

இந்த ஆய்வின்படி எல்லா மரங்களையும் சேர்த்தாலும் நிகோபார் தீவில் ஒரு ஹெக்டேருக்கு சுமார் 996 மரங்களாவது தேறும் என்கிறார்கள் ஆர்வலர்கள்.நிகோபார் தீவு சுற்றுச்சூழல் ரீதியில் பல்லுயிர் பன்மையுடையது. கடல், கடற்கரை, லெதர் ஆமை, பறவைகள், விலங்குகள், பவளப் பாறைகள் மற்றும் மழைக்காடுகளுக்கு முக்கியத்துவமான பிரதேசம் இது.

காலநிலை மாற்றம் பற்றி சிந்திக்கிற இந்தக் காலத்தில் நிகோபார் தீவை அழிக்க வரும் இந்தத் திட்டத்துக்காக அரசு ‘இந்தியாவின் பாதுகாப்புக்காக இந்தத் திட்டம்’ என்று சொன்னாலும் இந்தத் திட்டத்தை இந்திய அரசு சொந்தக் காசில் சூனியம் வைக்கும் திட்டமாகவே பலரும் எண்ணுகிறார்கள். 

இச்சூழலில் நிகோபார் தொடர்பாக ‘பூவுலகின் நண்பர்கள்’ குழுவைச் சேர்ந்த பிரபாகரனிடம் பேசினோம்.‘‘நிகோபாரின் வளர்ச்சித் திட்டங்கள் இந்தியாவுக்கு மட்டுமல்ல, உலகத்துக்கே அச்சுறுத்தலான ஒரு திட்டம். அந்தமான் நிகோபார் தீவுகள் உலகளவில் பல்லுயிருக்கான சுற்றுச்சூழலுக்கான் இடம்.

அண்மையில் ஐ.பி.சி.சி சுமார் 2600 பக்க அளவிலான ஓர் அறிக்கையை சமர்ப்பித்தது. இந்த அறிக்கை காலநிலை மாற்றம் தொடர்பாக உலக நாடுகள் என்ன எல்லாம் வருங்காலத்தில் செய்யவேண்டும் என்று பட்டியலிட்டிருந்தது. 

உதாரணமாக இன்றைக்கு இருக்கும் காடுகளில் சுமார் 50 சதவீதத்தையாவது இன்னும் இரு வருடங்களில் காப்பாற்றினால்தான் காலநிலை மாற்றத்தால் எழும் பிரச்னைகளை ஓரளவுக்காவது சமாளிக்கமுடியும் என்று அந்த அறிக்கை எச்சரிக்கிறது...’’ என்று சொல்லும் பிரபாகரன், இந்தியா இந்த எச்சரிக்கையை பின்பற்றவில்லை என வருத்தப்படுகிறார்.