பூமிகா மறக்க முடியாத முகம்! ‘ஆப்பிள் பெண்ணே நீ யாரோ...’ என்று தமிழ்நாட்டு இளைஞர்களை முணுமுணுக்க வைத்தவர். பழகுவதற்கு சுவாரஸ்யமானவர். ஒரே சமயத்தில் அமைதி, வசீகரத்தை வெளிப்படுத்துபவர்.பேசும்போது கண்களுக்குப் பின்னால் ஆயிரம் உணர்வுகள் ஒளிந்திருக்கும். 

கூர்மையான பார்வை மிரட்டுவது போல் தெரிந்தாலும், அடுத்த கணம் புன்னகையால் மகிழச் செய்வார். அவருடைய எண்ண ஓட்டம் எப்படி உள்ளது என்பதை யூகிக்க முடியவில்லையென்றாலும் வார்த்தைகள் தடையின்றி புறப்பட்டு வருகிறது.

என்னுடைய அப்பா, அம்மாவுக்கு அதிகமான அன்பு, மதிப்பு, மரியாதை கொடுக்கணும் என்று சொல்லத் தோன்றுகிறது. 30, 40, வயசாகும்போதுதான் அம்மா, அப்பாவின் அருமை, பெருமை தெரிய வரும். எனக்கும் அப்படித்தான். 

ஆனால், அதெல்லாம் நமக்கு பிரியமானவர்கள் இருக்கும்போது தெரிய வராது.கடந்த 6 வருஷத்துக்கு முன் என் அம்மாவை இழந்துவிட்டேன். அம்மா பூமிகா, இள வயது பூமிகாவிடம் சொல்லும் ஒரே செய்தி... ‘அம்மாவிடம் அதிக நேரம் செலவிடு. எவ்வளவு முடியுமோ அவ்வளவு நேசி. பெரிய மரியாதை செய்...’ ஒரு மகளாக என் அம்மாவுக்கு அதிகமான அன்பையும் மரியாதையையும் கொடுத்த திருப்தி எனக்கு உண்டு.

ஒரு நடிகையாக வித்தியாசமான படங்கள் செய்ய வேண்டும் என்பதுதான் என்னுடைய விருப்பம். என்னுடைய ஒவ்வொரு படத்தையும் வித்தியாசமாகத் தான் செய்துள்ளேன். ‘பிரதர்’ படத்தில் வர்ற மாதிரி அக்கா ரோல் இதுவரை பண்ணியதில்லை.‘எம்.எஸ்.தோனி’ படத்தில் அக்காவாக பண்ணியிருந்தாலும் அது வித்தியாசமான படம் என்பதோடு 2015ல் வெளியானது.

 அதன்பிறகு ‘யு டெர்ன்’, ‘மிடில் கிளாஸ் அப்பாயி’ என எல்லாமே வித்தியாசமான படங்கள். இப்போது இந்தியில் ‘கேசர்’ என்ற படம் செய்கிறேன். தம்பதி பற்றிய கதை.‘பிரதர்’ அக்கா, தம்பியைச் சுற்றி நடக்கும் கதை. எனக்கும், ஜெயம் ரவி சாருக்கும் அக்கா, தம்பியாக வாழ்ந்து பார்க்கக்கூடிய ரோல். எனக்கு ஓர் அண்ணன் இருக்கிறார். சகோதர பாசம் எப்படியிருக்கும்னு தெரியும். அந்த பாசப்பிணைப்புதான் இந்தப் படம் செய்யத் தூண்டுச்சு.

ஒரு நடிகையாக நான் செய்யாத, செய்ய வேண்டிய வேடங்கள் ஏராளமாக உள்ளது. அப்படி பல வேடங்களில் நடிக்க ஆர்வமாக இருக்கிறேன். நடிப்பை பொறுத்தவரை வித்தியாசமாக நடிக்க ஏராளமான வேடங்கள் உள்ளன. பயோபிக் கதைகள் ஏராளமாக உள்ளன. நான் இதுவரை ஸ்போர்ட்ஸ் படம் பண்ணியதில்லை. 

முழுக்க, முழுக்க நகைச்சுவை படம் பண்ணியதில்லை. போலீஸ் படம் பண்ணியதில்லை. ஃபன்னி ரோல் பண்ணியதில்லை. சயின்ஸ்ஃபிக்‌ஷன் படம் செய்ததில்லை. ‘அறம்‘ நயன்தாரா மேடம் மாதிரி கலெக்டர் ரோல் பண்ணியதில்லை. பெண் இனத்துக்கு பெருமை சேர்க்கும் விதமாக வாழ்க்கையின் அர்த்தத்தை புரியவைக்கிற மாதிரியான அழுத்தமான வேடம் பண்ணியதில்லை. போதுமா இந்த லிஸ்ட்!

எம்.ராஜேஷ் சார் ரொம்ப அமைதியானவர். அவருடன் வேலை செய்யும்போது நமக்கும் ஸ்ட்ரெஸ் வராது. அவரும் ஸ்ட்ரெஸ்ஸுடன் வேலை பார்க்க மாட்டார். ஒரு தயாரிப்பாளர் படம் எடுக்கிறார். அந்தப் படம் நன்றாக இருந்தால் மட்டுமே அவரால் லாபம் பார்க்க முடியும். அதுதான் அவருடைய எதிர்பார்ப்பும் கூட.

என்னுடைய சினிமா கரியரை பொறுத்தவரை யாருடன் ஒர்க் பண்ணினாலும் அது சந்தோஷமான அனுபவமாக இருக்க வேண்டும் என்று நினைப்பேன். அதுதான் உண்மையான வெற்றி. ‘கையில கிடைச்ச வாழ்க்கையை வாழ்ந்து பார்’ என்பது தான் என்னுடைய பாலிசி. அப்படிதான் நான் வாழ்கிறேன். இந்த தருணத்தில் உங்களுடன் நேர்காணலில் இருக்கிறேன். அது எனக்கு மகிழ்ச்சி.