கடந்த 2020, 2021ம் ஆண்டுகள் கொரோனாவால் முடங்கிப்போயின. இந்த 2022ம் ஆண்டு தொடக்கம் கூட கொரோனா பரவலால் ஸ்தம்பித்தது. ஆனால், பிப்ரவரி மாதத்துக்குப் பிறகு கொரோனா பரவல் குறைந்து, ஒருகட்டத்தில் மாஸ்க் அணிவது கட்டாயமில்லை என்ற நிலை வந்தபிறகே பலரும் ஆசுவாசமாயினர். 

கொரோனாவால் முடங்கிப் போயிருந்த தொழில்கள் கொஞ்சம் கொஞ்சமாக வேகமெடுத்தன. இப்போது நிலைமை ஓரளவுக்கு சீராகியிருக்கிறது. இந்நிலையில் 2022 ம் ஆண்டு பொருளாதார நிலைமையை கொஞ்சம் ரீவைண்ட் செய்தோம். எப்படியிருந்தது? 2023ம் ஆண்டு எப்படியிருக்கும்?

இந்த அடிப்படையில் பார்க்கிறப்ப உலகளவில் 2022ல் எதிர்பார்த்த வளர்ச்சியில்ல. கோவிட் சூழல்ல இருந்து மீண்டு வந்தாலும்கூட எதிர்பார்த்த வளர்ச்சியில்ல. நிறைய நாடுகள்ல 2021, 2022ல் ஓரளவு வளர்ச்சி இருந்தது. ஆனா, அது நாட்டின் மற்றும் மக்களின் தேவைகளைப் பூர்த்தி செய்யும் அளவுக்கான வளர்ச்சியாக இருக்கல.

சீனாவில் கோவிட் தாக்கம் அதிகமாக இருந்தாலும்கூட அவங்க பொருளாதாரத்துல பெரியளவில் பாதிக்கப்படலனு சொல்றாங்க. ஆனா, அங்கிருந்து வரும் தகவல்கள் நம்பகத்தன்மை உடையதா என்பது கேள்வியாக இருக்கு.

நாங்க பகிர்வு பொருளாதாரம் (Distribution Economics)னு சொல்வோம். அது சரியா நடந்திருக்கானு பார்க்க வேண்டியிருக்கு. அதாவது, பெறப்பட்ட மொத்த வருமானம் மற்ற எல்லோருக்கும் சரியா பகிரப்பட்டிருக்கானு பார்க்கணும்.

அதனால, 2023லும் இந்தப் பேச்சு இருக்கும்னு நினைக்கிறேன். ஏன்னா, நீடித்த நிலையான வளர்ச்சி இலக்குகளில் ஒன்றாக, 2030க்குள் உலகில் உள்ள எல்லா நாடுகளும் மிக முக்கிய பொருளாதாரப் பிரச்னைகளைக் களையணும்னு சொல்லப்பட்டிருக்கு. ஆனா, வருமானம் சரியாக பகிரப்படும்போதே பிரச்னைகள் களையும். அதனால, இதை சரியாகக் கையாளவில்லை என்றால் 2023லும் பிரச்னையாக இருக்கும்னு எதிர்பார்க்கிறாங்க.

தட்பவெப்பநிலை மாறுவதால் பாதிக்கப்படுவது மனித வாழ்க்கை மட்டுமல்ல; விவசாயமும், தொழிலும்தான். இது பொருளாதாரத்தைப் பாதிக்கும். இதை 2023ல் கணக்கில் கொண்டு நிறைய நாடுகளும், நம் இந்தியாவும், இங்குள்ள மாநிலங்களும் பேசி முயற்சி எடுப்பாங்கனு நான் நினைக்கிறேன்.

அப்புறம், வயதானவர்கள். இன்னைக்கு நம் நாட்டை நிறைய இளைஞர்கள் உள்ள நாடென சொல்கிறோம். ஆனா, 2047ல் நாம் எப்படி இருக்கணும்... எப்படி இருக்கப் போகிறோம்... அதில் சாதக, பாதகங்கள் என்னனு ஒன்றிய அரசே ஓர் அறிக்கை வெளியிட்டு இருக்காங்க.

இந்தச் சூழல்ல வயதானவர்களின் பொருளாதாரம் என்பது சிக்கலாக இருக்கும். அதனால், வருகிற 2023ம் ஆண்டு அரசு வயதானவர்களுக்கான செலவு திட்டமிடல் செய்யணும். அதாவது, மருத்துவம் உள்ளிட்ட நேரடி செலவுகள் செய்வதும், இன்சூரன்ஸ் போல மறைமுக செலவுகள் செய்வதுனும் இருக்கணும்.

அப்போதுதான் வயதானவர்கள் பொருளாதாரம் சிக்கலாக மாறாது.

அப்புறம், 2023ல் ஜி.எஸ்.டி பெரிய விஷயமாகப் பேசப்படும். இந்த ஜி.எஸ்.டி கவுன்சில்ல பாதகம் என்னனா, எந்த மாநிலங்கள் உற்பத்தி சார்ந்த மாநிலங்களோ அந்த மாநிலங்களுக்கு அது சாதகமாக இல்ல. அதனால, இதை மறுவரையறை செய்யவேண்டியிருக்கு.

அதாவது, மாநிலங்களுக்கு இடையே இருக்கிற பொருளாதார ஏற்றத்தாழ்வு மற்றும் மாவட்டங்களுக்கிடையே இருக்கிற பொருளாதார ஏற்றத்தாழ்வுகளை களைவதுபோல ஜி.எஸ்.டி இருக்கிறமாதிரி 2023ல் பேசுவாங்கனு நான் எதிர்பார்க்கிறேன்.

அடுத்து, 2023ல் இந்தியா ஜி20 மாநாட்டை லீட் பண்ணப் போறாங்க. அதுக்கான முயற்சியா உலக நிறுவனங்கள் இந்தியாவைப் பற்றி சொல்லும் பல குறைகளைக் களைவாங்கனு நினைக்கிறேன். அதனால பாலின பாகுபாடு, சுற்றுச்சூழல் சம்பந்தமான பிரச்னை, இளைஞர்களிடம் உள்ள வேலையில்லா நிலை, வேலையிழப்பு உள்ளிட்டவை கொஞ்சம் சரியாகலாம்னு தோணுது. 

கடந்த பத்தாண்டுகள்ல தமிழக அரசு அதிகமாக செலவு செய்ததால கடன் சுமை கூடியிருக்கு. இப்ப நம்பர் ஒன் மாநிலம்னு இருந்தாலும் கடன் அதிகமிருக்கு. இந்த கடனை அடைக்கும் முயற்சிகள் குறித்து 2023ல் பேசுவாங்கனு நினைக்கிறேன்.அப்புறம், மானியம். இதை ஒழுங்குபடுத்தணும்.

உண்மையில் கொடுக்கவேண்டிய நபர்களுக்கு கொடுக்கணும்னு தமிழக அரசு கொள்கை முடிவு எடுக்கணும். அடுத்து, வரியை ஒழுங்குபடுத்தணும். எந்தெந்த வரியில் ஏமாற்றுதல் இருக்கோ, எந்தெந்த வரியில் தப்பிக்க வழியிருக்கோ அதை சரிசெய்யணும். வரிக் கொள்கை சுமையா இருக்கக்கூடாது. விரும்பிக் கட்டுகிற மாதிரி இருக்கணும். அதேநேரம் வசூலும் அதிகரிக்கணும். 2023ல் இதைப்பற்றியும் பேசுவாங்கனு எதிர்பார்க்கிறேன்.