‘ஆசை ஆசையாய்’ படம் மூலம் தமிழ்ச் சினிமாவில் இயக்குநராக அறிமுகமானவர் ரவி மரியா. பிறகு, ‘மிளகா’ படத்தின் மூலம் கவனம் ஈர்த்தார். ஆனால், இதையெல்லாம்விட நகைச்சுவை நடிகர் அவதாரம்தான் அவரை நம் கண்முன்னால் என்றென்றும் நிலைநிறுத்தி அப்ளாஸ் செய்ய வைக்கிறது.

இயக்குநர் எழிலின், ‘தேசிங்கு ராஜா’, ‘வேலைன்னு வந்துட்டா வெள்ளக்காரன்’ ஆகிய இரண்டு படங்களும் ரவி மரியாவை பட்டி தொட்டியெல்லாம் கொண்டு சேர்த்தது. அந்த படங்களில் இவரும் நடிகர் சூரியும் செய்த காமெடி கலாட்டா வயிறு குலுங்கச் சிரிக்க வைப்பவை. இதன் காமெடி இப்போதும்கூட பல செய்திகளுக்கான மீம்ஸ்களுக்குத் தீனி போடுகின்றன. ஷூட்டிங் ப்ரேக்கில் இருந்த ரவி மரியாவிடம் பேசினோம்.  

‘‘சினிமா துறைக்குள் வந்து 25 ஆண்டுகளாகுது. இயக்குநர் ஆகணும்னுதான் வந்தேன். இயக்குநராக படங்களும் பண்ணினேன். ஆனா, இப்போ காலம் என்னை காமெடி வில்லனா கொண்டு போயிட்டு இருக்கு. நான் நடிகன் ஆவேன்னு கனவிலும் நினைச்சுப் பார்க்கல. சந்தோஷமா இருக்கு...’’ கலகலவென சிரிக்கிறார் ரவி மரியா.

 ‘‘சொந்த ஊர் விருதுநகர். இயக்குநர் வசந்தபாலன் என் நண்பர். அவர் படிச்ச கல்லூரியில்தான் நானும் படிச்சேன். அவர் பி.எஸ்சி முடிச்சதும் ஷங்கர் சார்கிட்ட சேர்ந்திட்டார். அப்புறம், நான் பி.காம். முடிச்சிட்டு சென்னைக்கு வந்தேன். நண்பர் வசந்தபாலன் மூலம் இயக்குநர் ஏ.ஆர்.காந்திகிருஷ்ணா சார்கிட்ட சேர்ந்தேன்.

நான் சினி துறைக்குள் வர என் பெற்றோரும் ஒரு காரணம். என் அப்பா சுப்பையா கடின உழைப்பாளி. எப்பவும் உழைச்சிட்டே இருக்கிற மனுஷன். என் அம்மா தாயம்மா. அவங்கதான் என்னை சின்ன வயசுல எம்ஜிஆர், சிவாஜி நடிச்ச படங்களுக்கு எல்லாம் அழைச்சிட்டுப் போய்க் காட்டினாங்க.

அப்பவே டி.ராஜேந்தர் சார் மாதிரி பேசுவேன். டான்ஸ் ஆடுவேன். கல்லூரியில் மேனோ ஆக்டிங் செய்து பாராட்டு எல்லாம் வாங்கியிருக்கேன். வீட்டுல எப்பவும் சப்போர்ட்தான். இப்ப என் அக்கா, தங்கை எல்லாம் ஆசிரியர்களாக இருக்காங்க. என் மனைவி மரியம் புஷ்பமும் குழந்தைகளும் பெரிய சப்போர்ட்டா இருக்காங்க...’’ என்கிற ரவியிடம் இப்ப முழுநேர காமெடியன் ஆகிட்டீங்க போல என்றோம்.