பிருத்வி

என் பெயர் பிருத்வி. அப்பா அம்மாவுக்கு அறிவியல் மீது இருந்த வெறியில் எனக்கு எங்கள் இந்திய ஏவுகணையின் பெயரை வைத்தார்கள். அக்னி, ஆகாஷ், பிரம்மாஸ் என்று எல்லாம் ஆண் ஏவுகணைகள். பிருத்வி மட்டும்தான் பெண் பெயர் கொண்ட ஏவுகணை. ஆனால், பிருத்வி என்றால் என்ன  அர்த்தம் தெரியுமா..? பிருத்வி  என்ற வடமொழிச் சொல்லுக்கு பூமி என்று பொருள். மூன்றாம் முறை பிருத்வி ஏவுகணை சோதிக்கப்பட்ட 2004 ஜனவரி 23 அன்று பிறந்தேனாம்.

அம்மா அப்பா இருவருமே இந்திய விண்வெளி ஆய்வு மையத்தில் வேலைபார்த்தவர்கள். அவர்களது ஒரே மகள்... எப்படி அறிவியல் ரத்தம் ஓடாமல் இருக்கும்? இப்போது நான் உங்கள் அர்த்தத்தில் மேலே இருக்கிறேன். உங்களை 92 நிமிடங்களுக்கு ஒரு முறை சுற்றி வந்து கொண்டிருக்கிறேன். யெஸ். நான் எப்படி விண்வெளி வீராங்கனை ஆனேன் என்பது தனிக்கதை.

தரங்கம்பாடிக்கு அருகே தாழைப்பேடு எனும் இடத்தில் ராக்கெட் ஏவுதளம் அமைப்பதாக இருந்தால் தமிழ்ப்பெண் ஒருவரை விண்வெளிக்கு அனுப்ப மத்திய அரசு ஒப்புக்கொள்ளவேண்டும் என்று தமிழகமும் புதுவையும் ஒற்றுமையாக குரல் கொடுத்து அடம்பிடித்த மூன்றாண்டு கழித்து அதற்கு தேர்வான நால்வரில் ஒருத்தியாகி பிறகு கடும் பயிற்சி... வழக்கமான சாதி மத இன மொழி  சிபாரிசு ஊழல் இத்யாதிகளான நமது மண்ணின் அடையாளங்களைக் கடந்து, சென்ற வருடம் விண்ணில் மிதக்க தேர்வானேன்.

சர்வதேச விண்வெளி ஆய்வுமையம்! அங்கே சென்று இணைய வாய்ப்பு கிடைத்தது. ரஷ்ய கூட்டாட்சி விண்வெளி நிறுவனமும், ஐரோப்பிய விண்வெளி நிறுவனமும், ஜப்பான், கனடா, பிரேசில், இத்தாலி ஆகிய நாடுகளும் ஒன்றிணைந்து உருவாக்கிய அந்த பன்னாட்டு விண்வெளி ஆய்வு மையத்திலிருந்து  2020ல் ரஷ்யா விலகிக்கொண்டதால் நமக்கு அதிர்ஷ்டம் அடித்து, எல்லா நாடுகளிலும் நீக்கமற வாழும் உலகளாவிய  தமிழர்களின் அழுத்தம் காரணமாக பிருத்வி எனும் நான் இப்போது அந்த விண்வெளி ஆய்வு மையத்தில் இருக்கிறேன்.

நாங்கள் பதினாறு நாடுகளின் விண்வெளி பிரதிநிதிகள் இங்கே இருக்கிறோம். ஆனாலும் நான் 242வது ஆள். ஒரே சமயத்தில் எல்லாரும் இங்கே இருப்பதாக கற்பனை செய்துவிடவேண்டாம். பலரும் வந்து போய்க்கொண்டு இருப்பார்கள்.நான் விண்வெளி வீராங்கனை ஆவதற்கு அப்பா அம்மா பச்சைக்கொடி காட்டினாலும் அத்தை, தாத்தா, பெரியப்பா எல்லாம் பதறிப் போனார்கள். ‘அது ஒண்ணும் ஆட்டோவில் ஸ்கூலுக்கு போவது போல கிடையாது’ என்று நவீனவாதியான ரமேஷ் மாமா கூட பேசினார்.

காசி தாத்தா, ‘டேய் ராமசாமி (அப்பா பெயர்) அப்புறம் பிருத்வியை யாருடா கட்டிப்பாங்க? யோசிச்சு செய்...’ என்றபோது நான் இரண்டு நாட்கள் சாப்பிடாமல் உண்ணாவிரதம் இருக்க நேர்ந்தது.வானத்தில் பாருங்கள். சந்திரன், வெள்ளி கிரகத்திற்கு அடுத்த படியாக எங்கள் விண்வெளி ஆய்வு நிலையம் பிரகாசமாக இரவில் தெரியும். இது விண்வெளியில் இருக்கும் ஓர் ஆய்வுக்கூடம். புவி ஈர்ப்பே இல்லாத இடத்தில் சில ஆய்வுகளைச் செய்வது வேதியியல் நவீன நேனோ தொழில் நுட்பம் முதல் மருத்துவம் வரை பலவகையில் உதவுகிறது. பல மைல்கள் கீழே நீலப்பந்தாக நம் புவி.

‘பீக்... பீக்...’ சரி எனக்கு வேலை இருக்கிறது. கீழ் ஜன்னல் வழியே வெளியே பார்க்கிறேன். பக்கவாட்டு சிலைடு - தகட்டு சூரிய ஆற்றல் வில்லைகளை மூன்றுபேர் பொருத்திக் கொண்டிருக்கிறார்கள். இடப்பக்கம் - தெர்மோஸ் உடற்பயிற்சிக் கூடத்தில் ஆறு பேருக்குமேல் இருந்தார்கள். ஒரு நாளைக்கு குறைந்தபட்சம் இரண்டு மணி நேரமாவது தசை எலும்பு எடை சேர்க்கவும் மரத்த தன்மையிலிருந்து மீளவும் கண்டிப்பாக உடற்பயிற்சி செய்யவேண்டும்.