களிலுமே தமிழர்கள் சார்பாக இடம்பெறுவது ஒரு நடராஜர் சிலையோ அல்லது சோழர் கால சிற்பமாகவோ மட்டுமே இருக்கும்.

இச்சூழலில் ஸ்டட்காட்டில் (Stuttgart) இப்போது நடைபெற்றுக்கொண்டிருக்கும் தமிழர் வரலாறு எனும் பிரத்தியேகமான கண்காட்சியில் சங்ககாலம் முதல் நவீன காலம் வரை, தமிழரின் வரலாற்றில் பின்னிப் பிணைந்த பண்பாட்டு, வரலாற்றுப் பொருட்களை பார்வையாளர்கள் வெறும் 3 மணிநேரத்தில் கண்டு களித்து கற்று பெருமிதம் கொள்ளலாம்...’’ அழுத்தமாக சொல்கிறார் கவிஞரும், எழுத்தாளரும், கோட்பாட்டாளரும், நவீன நாடகங்களை அடுத்த கட்டத்துக்கு நகர்த்தி வருபவருமான எம்டிஎம் என்று அன்புடன் அழைக்கப்படும் எம்.டி.முத்துக்குமாரசாமி.

சென்னையில் இயங்கும் தேசிய நாட்டுப்புறக் கலை உதவி மையம் எனும் தன்னார்வ நிறுவனத்தின் இயக்குனராக இருக்கும் எம்டிஎம் இந்த ஸ்டட்காட் கண்காட்சியின் ஒருங்கிணைப்பாளர்களில் ஒருவர் என்பதாலும் இந்தக் கண்காட்சி உலகத் தமிழர்களிடையே முக்கியத்துவம் பெற்றிருக்கிறது.

‘‘ஐரோப்பிய நாடுகளிலேயே தமிழர்களுக்காக மட்டும் இவ்வளவு விரிவான ஒரு கண்காட்சி நடப்பது தமிழர்களுக்கு கிடைத்த ஒரு நல்வாய்ப்பாகவே கருதுகிறேன். 2005ம் ஆண்டு முதலே ஜெர்மன் நாட்டில் இருந்த பல்வேறு பல்கலைக்கழகங்களில் சொற்பொழிவு ஆற்றி வந்திருக்கிறேன். அதுபோல 2017ம் ஆண்டு ஐயனார் வழிபாடும் அது தொடர்பான சுடு பொம்மைகள் குறித்தும் ஒரு ஆய்வுரை செய்துவிட்டு மேடையில் இருந்து கீழ் இறங்கியபோதுதான் ஜார்ஜ் நோஹாக் என்பவரைச் சந்தித்தேன்.

ஈழத் தமிழர்களும் அந்நகரத்தில் கணிசமாக இருப்பதால் இது ஒரு நல்ல வாய்ப்பு என்று நினைத்த நான் அந்த திட்டதுக்கு ஒப்புக்கொண்டேன்...’’ என்று சொல்லும் எம்டிஎம் கடந்த 5 வருடங்களாக இந்த திட்டத்துக்கான ஒருங்கிணைப்பாளர்களில் (curator) ஒருவராக இருந்து செயல்பட்ட விதத்தையும் பகிர்ந்தார்.

‘‘ஒரு கண்காட்சி என்றால் கையில் கிடைக்கும் அல்லது எல்லோருக்குமே தெரிந்த பொருட்களைக் கொண்டு நடத்துவது அலுப்புத்தட்டக் கூடியது. ஒரு நல்ல கண்காட்சி என்றால் அதற்கு ஒரு அடிப்படையான கருத்து (ஐடியா), அந்தக் கருத்தை சொல்ல ஒரு வரலாறு, வரலாற்றைச் சொல்ல ஒரு கதை, கதையைச் சொல்ல பொருட்கள் அவசியம்.