ஜீன்ஸ், பேண்ட், டி சர்ட், ஃப்ராக்... எல்லாம் கலந்து கட்டி சேலை அணியலாம்!

வண்ண வண்ண ஆடைகளில் கல்லூரிப் பெண்கள் சாலையில் நடந்து போனாலே ஏதோ கலர்ஃபுல் பட்டாம்பூச்சிகள் பறப்பது போல் இமைக்காமல் பார்க்கச் சொல்லும். அதிலும் இந்த நவீன காலத்தில் சேலையுடுத்திச் செல்லும் இளைஞிகளைப் பார்த்தால் பேராச்சர்யமாகத் தோன்றும்.

அதுவே ஒட்டுமொத்த கல்லூரியும் விதவிதமாய் சேலை கட்டி ஃபேஷன் பேரேடு நடத்தினால் எப்படியிருக்கும்?

இது ஏதோ மேற்கத்திய கலாசாரத்தை ஒட்டிய ஆடை அணிவகுப்பு அல்ல. சாட்சாத் நம்ம ஊர் சேலையை வைத்து பேண்ட், டிசர்ட், ஜீன்ஸ், சுடிதார் இப்படி அணிந்து கொண்டு அத்துடன் சேலையை எப்படி அணியலாம் என்பது குறித்து ஜகஜ்ஜாலம் காட்டிய ஃபேஷன் பாரேடு என்றால் நம்ப முடிகிறதா?

கோவை ஆர்.எஸ்.புரத்தில் அமைந்துள்ள அன்னை தெரசா பல்கலைக்கழகத்தைச் சேர்ந்த முதுகலை மாணவிகள்தான் இப்படியொரு சிறந்த அணிவகுப்பை நடத்தி அசத்தினார்கள். பக்கத்தில் உள்ள பொதுமக்களும், முதியோர் இல்ல வாசிகளுமே இதில் பார்வையாளர்கள். வித்தியாசமான இந்த நிகழ்ச்சியில் வந்த ஒவ்வொரு மாணவியும் ஒவ்வொரு விதமாக ஆடை அணிந்து சேலை கட்டி அசத்தியிருந்தார்கள். கிட்டத்தட்ட 60 மாணவிகள், அறுபது விதமான மாடர்ன் டிரஸ் வித் சேலை காம்பினேஷனில் ஜொலித்தார்கள்.

‘‘நான் இப்ப வெஸ்டர்ன் ஸ்டைல்ல சேலை கட்டியிருக்கேன். ‘இப்ப சேலைகளுக்கு யாரும் முக்கியத்துவம் கொடுக்கறதில்லை. அதை எல்லோரும் கட்டற மாதிரி மாறுபட்ட வெஸ் டர்ன் ஸ்டைல்ல கொண்டு வரணும்... அதுக்குதான் இப்படி ஒரு முயற்சி’னு எங்க மேடம் சொன்னாங்க. எங்களுக்கும் பிடிச்சிருந்தது. இதுவரைக்கும் நான் அதிகமா சேலை கட்டியதில்லை. இப்ப இந்த சேலை ஃபேஷன் ஷோ மூலம் அடிக்கடி சேலை கட்டிக்கலாம்னு தோணுது..!’’ கண்களைச் சிமிட்டுகிறார் ரோஷிணி.

ஆனால், ரேவதி சற்றே மாறுபட்டார், ‘‘இதுவரைக்கும் சேலை கட்டினதேயில்லை. இதுதான் முதல் முறை. இது ஃபிராக் மாடல் சேலை. நான் பொதுவாகவே ஃபிராக் போடுவேன். அதுதான் ரொம்பப் பிடிக்கும். மேம்கிட்ட சொன்னேன். அதனால் என்னன்னு சொல்லி ஃபிராக்லயே சேலை எப்படிக் கட்றதுன்னு சொல்லிக் கொடுத்து கட்டவும் வச்சுட்டார்!’’ என்று கண்களை விரித்து மகிழ்ச்சி காட்டினார்.