ஜாலியான தீபாவளி ட்ரீட்!

தெலுங்கில் வெளியான ‘ஜதிரத்னலு’ படம் கொடுத்த வெற்றி, நல்ல விமர்சனங்கள் மூலம் தமிழ் சினிமாவையும் தட்டியிருக்கிறார் இயக்குநர் அனுதீப்.
விளைவு-அவருடைய இயக்கத்தில் சிவகார்த்திகேயன், மரியா ரியாபோஷாக்பா, சத்யராஜ், பிரேம்ஜி அமரன் உள்ளிட்ட பலர் நடிப்பில் தீபாவளி பரிசாக வரவிருக்கிறது ‘பிரின்ஸ்’.

‘பிரின்ஸ்’ தீபாவளி பரிசாக என்ன கொடுக்கப் போகிறார்?

காமெடி பிளஸ் காதல் ஜாலியான ஒரு குடும்பப்படம்னு கதை எழுதிட்டேன். சிம்பிளா சின்னதா ஒரு பெயர் வைக்கணும்னு யோசிச்சிட்டு இருந்தப்ப சிவகார்த்திகேயன் சார் சொன்ன பெயர்தான் இந்த ‘பிரின்ஸ்’. தலைப்புக்கும் கதைக்கும் ரொம்ப பெருசா எல்லாம் கனெக்‌ஷன் யோசிக்கல. குடும்பமா உட்கார்ந்து ஜாலியா என்ஜாய் பண்ணிட்டு போகணும் அவ்வளவுதான்.
அப்படியான அனுபவத்தை ‘பிரின்ஸ்’ கொடுப்பார். வெல்கம் to தமிழ் சினிமா ப்ரோ?

ரொம்ப நன்றி. என் குடும்பம் இப்ப ஹைதராபாத்தில் இருக்காங்க. சொந்த ஊர் ‘ஜதிரத்னலு’ படத்தில் வரும் தெலுங்கானா மாநில சங்காரெட்டி மாவட்டம், அந்தோள் ஜோகி பேட்தான்.  
சின்ன வயசுல இருந்து சினிமா ரொம்ப பிடிக்கும். எப்படியாவது தேடிப் பிடிச்சு எல்லா மொழி படங்களையும் பார்த்திடுவேன். பாரதிராஜா சார், பாலச்சந்தர் சார் படங்கள் எல்லாம் ஒண்ணு கூட மிஸ் செய்ததே இல்ல.

என் அப்பா கவர்மெண்ட் டீச்சர். அவருக்கு சுத்தமா இந்த சினிமா ஆர்வம் எல்லாம் பிடிக்கவே இல்ல. இங்க இருந்தா நம்ம சினிமா கனவு கனவாகவே போயிடும்னு ஹைதராபாத்துக்கு வண்டி ஏறினேன். கொஞ்சம் கொஞ்சமா சினிமாவில் சின்னச் சின்ன டெக்னிக்கல் வேலைகள் எல்லாம் செய்து அசிஸ்டெண்ட் டைரக்டர்... அப்புறம் நானே ஸ்கிரிப்ட் எழுதி முதல் படம்... அந்த படத்துக்கு பெரிதா வரவேற்பு கிடைக்கல. அடுத்த படம்தான் ‘ஜதிரத்னலு’. நோட்டபிள் டைரக்டரா மாறினேன். இப்ப ‘பிரின்ஸ்’.

ஸ்டைலிஷ் டீச்சர், பிரிட்டிஷ் பிரின்ஸ் சிவகார்த்திகேயன் என்ன சொல்றார்?

என் அப்பா கவர்மெண்ட் டீச்சர் இல்லையா... அந்த தாக்கம்தான் இந்த படத்தில் சிவகார்த்திகேயன் சாரும் டீச்சர். இந்தப் படத்தை 59 நாட்களில் முடிச்சிருக்கோம். அதுக்கு முதற்காரணம் சிவகார்த்திகேயன் சார்தான். டைமிங் பார்க்காம நடிச்சுக் கொடுத்தார். ஸ்க்ரிப்டுல எங்கயும் எதிலேயும் தலையிடாம எனக்கு என்ன தேவையோ அதை செய்து கொடுத்தார்.  

வெள்ளை வெளேர் மரியா ரியாபோஷாக்பா... யாரு சார் அவங்க?

கதைப்படி ஹீரோயின் வெளிநாட்டுப் பொண்ணா இருக்கணும். அதே சமயம் நம்ம கதையையும் புரிஞ்சு அதுக்கு ஏத்த மாதிரி நடிக்கணும். பார்த்த உடனே சிம்பதி கிரியேட் பண்ற அழகானபொண்ணாவும் இருக்கணும். தவிர எங்களுக்கு நேரம் ரொம்ப குறைவா இருந்துச்சு. ஏகப்பட்ட ஆடிஷன்ஸ் முடிச்சோம். நிறைய வீடியோ கூட பார்த்தோம். நிறைய மியூசிக்கல் வீடியோக்கள், நெட்ஃபிளிக்ஸ்... இங்கே எல்லாம் கூட தேடிப் பார்த்தேன்.

அப்பதான் உக்ரைன் நாட்டு பொண்ணுனு காஸ்டிங் டீம் ஒரு வீடியோ அனுப்பிச்சாங்க. அவங்களுக்கு பாஸ்போர்ட் இருக்கு. ஆனா, விசா பிரச்னையா இருந்துச்சு. எப்படியாவது அவங்களை இங்க கொண்டு வரணும்... நடிக்க வைக்கணும்னு முழுமூச்சா இறங்கி வேலை செய்தோம். அதுக்கேத்த மாதிரியே அவங்களும் வெறும் ரெண்டு நாட்கள் ரிஹர்சல்... பாட்டு சீன்களுக்கு கூட ஒரு நாள் ரிஹர்சல்னு பட்டையை கிளப்பிட்டாங்க. ரொம்ப டெடிகேஷன். அவங்களுக்கு ஆங்கிலம் கூட கொஞ்சம் கொஞ்சம்தான் தெரியும். இத்தனை கஷ்டத்திலும் கூட கதையை புரிஞ்சுகிட்டு ஒவ்வொரு உணர்ச்சியையும் ரொம்ப அழகா ஸ்கிரீன்ல கொண்டு வந்தாங்க. அவங்களே தமிழ் பேசி நடிச்சிருக்காங்க!  

படத்தின் மற்ற நடிகர்கள் மற்றும் டெக்னீசியன்கள் பற்றி சொல்லுங்க?

டிரெய்லரிலேயே பார்த்திருப்பீங்க. சிவகார்த்திகேயன் சாருக்கு அப்பாவா சத்யராஜ் சார். அடுத்து பிரேம்ஜிக்கு ‘சென்னை 28’ டைம்ல இருந்து நான் மிகப்பெரிய ஃபேன்.  எனக்கு வெங்கட் பிரபு சார் படங்கள் எல்லாம் ரொம்ப பிடிக்கும். பிரேம்ஜி அமரனை ஒரு படத்திலாவது நடிக்க  வைக்கணும்னு நினைச்சேன். இந்த கதை எழுதும்போதே இந்த கேரக்டருக்கு பிரேம்ஜிதான்னு முடிவு செய்துதான் எழுதினேன்.

நான் சினிமாட்டோகிராபி, ஃபோட்டோகிராபி பத்தி நிறைய விஷயங்கள் இந்த படத்திலே கத்துக்கிட்டேன்னா அதுக்கு காரணம் மனோஜ் பரமஹம்சா சார்தான். ஒரு லவ் படம் எப்படி எடுக்கணுமோ அப்படி சூப்பரா செய்துருக்கார். மியூசிக் தமன். ஏற்கனவே பாடல்கள் எல்லாம் செம ஹிட் ஆகிடுச்சு. அதைத் தாண்டி இந்த படத்துல வொண்டர்ஃபுல் பிஜிஎம் பேக்ரவுண்ட் ஸ்கோர் செய்திருக்கார். எடிட்டிங், பிரவீன் கே எல் சார். இவங்க கூட எல்லாம் வேலை செய்ததில் நான் நிறைய கத்துக்கிட்டேன்.

‘பிம்பிளிக்கி பிளாப்பி...’ இந்தப் பாடல் எங்கே எந்த சூழலில் உருவாச்சு?

இதுக்கு முன்னாடி சிவகார்த்திகேயன் சாருடைய நிறைய பாடல்கள் கேட்டிருக்கேன். அதிலும் கடைசியா வந்த ‘டான்’ படத்தின் ‘ஜலபுல ஜங்கு...’ பாட்டு செம வைரல். அதை மனசுல வச்சிக்கிட்டு அதே மாதிரி ஒரு ட்ரெண்ட் செட்டிங் பாட்டு உருவாக்கணும்னு முயற்சி செய்தேன். சிவகார்த்திகேயன் சார்தான் இந்த வார்த்தை கவுண்டமணி சாருடைய ஃபேமஸ் காமெடினு சொல்லி ‘பிம்பிளிக்கி பிளாப்பி...’யை சொன்னாரு. தெலுங்கு சினிமா கதை உருவாக்கம்... தமிழ் சினிமா கதை உருவாக்கம்... எது கஷ்டம்?