எங்க 100வது தயாரிப்புல விஜய்தான் ஹீரோ!

தன் 20 வருட திரையுலக வாழ்க்கையை அசைபோடுகிறார் ஜீவா

ஜீவா; கோலிவுட் இயக்குநர்கள் அதிகம் விரும்பி பணியாற்ற நினைக்கும் நடிகர்களில் ஒருவர். இவருடைய ‘கற்றது தமிழ்’ இன்றளவும் பேசப்படுகிறது. ‘ராம்’, ‘ஈ’, ‘சிவா மனசுல சக்தி’, ‘கோ’, ‘நண்பன்’, ‘முகமூடி’, ‘ஜிப்ஸி’ போன்ற படங்கள் ஜீவாவின் சினிமா பயணத்தை அழகாக்கிய படைப்புகள். இவருடைய அப்பா ஆர்.பி.செளத்ரி புகழ் பெற்ற தயாரிப்பாளராக இருந்தாலும் தன்னுடைய உழைப்பை மூலதனமாக்கி கடந்த இருபது வருடங்களாக முன்னணி நடிகராக  வலம் வந்து கொண்டிருக்கிறார். விரைவில் சுந்தர்.சி இயக்கத்தில் நடித்துள்ள ‘காபி வித் காதல்’ வெளிவரவுள்ளது. ‘காபி வித் காதல்’ எப்படி வந்திருக்கு?

சுந்தர்.சி சார் படம் என்றாலே பெரிய நடிகர் பட்டாளம் இருக்கும். நானும் ஜெய்யும் ஏற்கனவே ‘கலகலப்பு 2’ல இணைந்து நடிச்சிருக்கிறோம். இரண்டு, மூணு ஹீரோ சேர்ந்து நடிச்சாலே ஒருவித வைப் இருக்கும். அது இந்தப் படத்திலும் இருந்துச்சு. ஊட்டி பின்னணியில் நடக்கும் கதை. நானும்,ஸ்ரீகாந்த்தும் ‘நண்பன்’ படத்துக்குப் பிறகு சேர்ந்து நடிக்கிறோம். சக நடிகர்களுடன் ஏற்கனவே இணைந்து நடிச்சதாலே படப்பிடிப்பு இடைவெளியில் பழைய நினைவுகளை மீட்டெடுத்து பேசுவோம்.

சாமான்ய மனிதர்கள் எல்லோரும் தங்கள் வாழ்க்கையோடு கனெக்ட் பண்ற மாதிரியான கதைக்களம். சுந்தர்.சி சார் படத்துல பொழுதுபோக்கிற்கு பஞ்சம் இருக்காது. அதை எதிர்பார்த்து இந்தப் படத்துக்கு வரலாம். உங்களுக்கு என்ன கேரக்டர்?

எனக்கு  ஐடி, ஜெய்க்கு ஹோட்டல், ஸ்ரீகாந்த்துக்கு கலைத்துறை. ஒரு குடும்பத்துல கல்யாணம் நடக்கிறது. அதுல நடக்கும் குழப்பத்தை மையமா வெச்சு கதை கலகலப்பா நகரும்.  
மூன்று ஹீரோக்கள் கதையில் உங்களுக்கான முக்கியத்துவம் எந்தளவுக்கு இருந்தது?

படத்துல இவங்க முக்கியம், அவங்க முக்கியம் என்றில்லாமல் கதை என்ன கேட்டதோ அதற்கு ஏத்த ஹீரோவாதான் இருப்பாங்க. சினிமாவுக்கு வந்து இருபது வருடங்களாகிவிட்டது. எனக்கு என்ன மாதிரி கேரக்டர்ஸ் செட்டாகும்னு இயக்குநர்களுக்கு தெரியும். அந்த வகையில் என்னுடைய கேரக்டருக்கு எந்தளவுக்கு முக்கியத்துவம் தர முடியுமோ அந்தளவுக்கு முக்கியத்துவமுள்ள கேரக்டரா இருக்கும்.  

‘வரலாறு முக்கியம்’ டைட்டில் நல்லா இருக்கே?

சூப்பர் குட் ஃபிலிம்ஸ் தயாரித்துள்ளது. சந்தோஷ் ராஜன் இயக்குகிறார். எனக்கு ஜோடியா காஷ்மீரா பர்தேசி நடிக்கிறார். படப்பிடிப்பு முடிந்துவிட்டது. விரைவில் ரிலீஸ். பொன்குமரன் இயக்கியுள்ள ‘கோல்மால்’ படமும் முடிந்துவிட்டது. அதுல சிவா, யோகிபாபு இருக்கிறார்கள். கம்ப்ளீட் காமெடி படமா வந்திருக்கு. அப்புறம் எஸ்.ஆர்.பிரபு கம்பெனிக்கு ஒரு படம் பண்றேன். நாயகியா ப்ரியா பவானி சங்கர் நடிக்கிறார். கே.ஜி.பாலா இயக்குகிறார். பா.விஜய் இயக்கத்தில் ஒரு படம் பண்றேன். வேல்ஸ் புரொடக்‌ஷன்ஸ் ஐசரி கணேசன் சார் தயாரிக்கிறார். பிரம்மாண்டமான படமா இருக்கும். இதில் எனக்கு ஜோடியா ராஷி  கண்ணா பண்றார். இந்தப் படங்கள் எல்லாமே வெவ்வேறு ஜானர்.

‘கற்றது தமிழ்’ ஜீவா சிரீயஸ் படம் பண்ணிய காலம் மாறி இப்போது ஜீவா என்றாலே காமெடி படம் என்றாகிவிட்டதே?

‘கற்றது தமிழ்’ வெளிவந்த சமயத்தில் அன்றைய வாழ்வாதார பிரச்னைகளை பிரதிபலித்தது. ‘83’ படம் பண்ணிய பிறகு பான் இந்தியா படங்கள் பண்ணணும்னு முடிவு செய்தேன். ‘83’ படத்துக்கு இந்திய அளவில் நல்ல வரவேற்பு கிடைச்சது. அந்தப் படத்தின் மூலம் எனக்கு ஒரு இந்திப் பட வாய்ப்பு கிடைச்சது. ஆனந்த் எல்.ராய் தயாரிக்கிறார். ‘கற்றது தமிழ்’ பண்ணி பதினைந்து வருடங்கள் ஆகிவிட்டது. இன்னும் அந்தப் படம் பேசப்படுகிறது. ராமும் என்னிடம் மறுபடியும் வரல. அழுத்தமான கதைகளை எப்போதும்போல் பண்ண முடியாது. சரியான நேரத்தில் பண்ணணும். அந்த மாதிரி படங்கள் பண்ணும்போது நம்முடைய மனநிலை ஒத்துப்போகணும்.

இப்போது ஐந்து படங்கள் வெளிவரவுள்ளது. அந்தப் படங்களுக்குப் பிறகு நீங்கள் சொல்ற மாதிரி அழுத்தமான படம் பண்ணுவதற்கு வாய்ப்பு இருக்கிறது.
இருபது வருட சினிமா வாழ்க்கை என்ன படிப்பினை கொடுத்துள்ளது?

எவ்வளவு புதுசா முயற்சி எடுக்கிறோமோ அவ்வளவு தோல்விகள் வரும். அதையெல்லாம் ஊக்கமா எடுத்துக்கொள்ளணும்னு கத்துக்கிட்டேன். அதைத் தாண்டி வெற்றி அடையும்போது சந்தோஷம் கொடுக்கிறது.

‘83’ பட அனுபவத்தை மீட்டெடுக்க முடியுமா?

எனக்கு கிரிக்கெட் ரொம்ப பிடிக்கும். சச்சின் டெண்டுல்கரின் தீவிர ரசிகன். ‘சிவா மனசுல சக்தி’ பண்ணும்வரை லீக் மேட்ச்களில் விளையாடி வந்தேன். செலிபிரிட்டி கிரிக்கெட்ல நான் அடிச்ச ஒரு ஷாட் பேசப்பட்டது. அதை அடையாளம் வைத்து இந்திய கிரிக்கெட் வீரர் பல்வீந்தர் சந்து என்னுடைய ஷாட் ஸ்ரீகாந்த் சார் ஷாட் மாதிரி இருந்ததுனு சொல்லி ஸ்ரீகாந்த் சார் கேரக்டரில் நடிக்க வைத்தார். ஒன்பது மாதங்கள் பயிற்சி எடுத்தேன்.