திருவாரூர் மாவட்டம் வலங்கைமான் தாலுகா 50 கிராம ஊராட்சிகளையும், 71 வருவாய் கிராமங்களையும், 15 பேரூராட்சி வார்டுகளையும் உள்ளடக்கியது. கோயில் நகரமான வலங்கைமானில் ஐம்பெரும் சிவாலயங்கள், சக்தி ஸ்தலம் என அழைக்கப்படும் பாடைகட்டி மாகமாரியம்மன் கோயில், நவகிரகங்களில் ஒன்றான குருபரிகார ஸ்தலமான ஆபத்சகாயேஸ்வரர் கோயில்... உள்ளிட்ட பல கோயில்கள் உள்ளன.

அனைத்துக்கும் மேல் பல ஓலைச்சுவடிகளைத் தேடிக் கண்டுபிடித்து அச்சுவடிவம் கொடுத்த தமிழ்த்தாத்தா உ.வே.சா., மற்றும் ஆங்கிலேயர்களால் சில்வர் டங் என அழைக்கப்பட்ட சீனிவாச சாஸ்திரி ஆகியோர் பிறந்தது இங்குதான்.

பட்டாசு செய்வதற்கு முக்கியமாகத் தேவைப்படுவது திரி. இதனைச் செய்வதற்கு முன்னதாக நூலினை ரசாயன கலவையில் கலந்து நிழலில் பந்தல் போன்று அமைத்து உலர வைப்பர். பின்னர் சுமார் 15 சென்டிமீட்டர் அளவுக்கு நூலினை சிறு துண்டுகளாக வெட்டிக் கொள்வர். அதையடுத்து வெட்டப்பட்ட சிறு துண்டுகளில் மெல்லிய காகிதம் சுற்றப்பட்டு பின்னர் தேவைப்படும் அளவிற்கு சிறு சிறு துண்டுகளாக வெட்டி திரி தயாரிக்கின்றனர்.

பின்னர் வெட்டி அவற்றை மெல்லிய கம்பி கொண்டு உருளையாக தயார் செய்து உலர வைக்கின்றனர். உலர வைத்த உருளைகளை வெடியின் அளவுக்கு ஏற்ப துண்டுகளாக நறுக்கிக்கொண்டு ஒவ்வொரு காகித உருளை துண்டின் ஒரு பரப்பில் முன்னதாகத் தயார் செய்யப்பட்ட திரியை இணைத்து நூலினைக்கொண்டு கட்டிக் கொள்கின்றனர் .

பேப்பர் உருளையின் ஒரு பக்கம் திரியும் நடுவில் மருந்துகளும் அடைக்கப்படுகின்றன. அடைக்கப்பட்ட மருந்துகள் கொட்டாமல் இருப்பதற்கு பேப்பர் அடிப் பரப்பில் சிறிய அளவில் பசை கொண்டு அடைக்கின்றனர்.

பின்னர் ஒவ்வொரு உருளையாக எடுக்கப்பட்டு அவற்றில் தேவையான அளவு பேப்பர் சுற்றப்பட்டு இறுதியில் வண்ணக் காகிதம் அல்லது வெடியின் பெயர் அச்சிடப்பட்ட படத்துடன் கூடிய காகிதத்தைச் சுற்றுகின்றனர்.தனித்தனியாகச் சுற்றப்பட்ட வெடிகளை, தேவைப்படின் ஒரு நூலுடன் இணைத்து சரவெடியாக மாற்றுகின்றனர்.