ஜெயலலிதாவின் கடைசிப் படம்...எனது முதல் படம்..!

தன் ஃப்ளாஷ்பேக்கை அசை போடுகிறார் நளினிகாந்த்

நடிகர் நளினிகாந்தை நினைவிருக்கிறதா? 1970களின் இறுதியில் சூப்பர் ஸ்டார் ரஜினிகாந்த் போலவே அதே தோற்றத்துடன் சினிமாவில் வலம் வந்தவர். ஆனால், காலம் அவரை வில்லன் நடிகராக முன்நிறுத்தியது. தமிழ், தெலுங்கு, மலையாளம், கன்னடம் என தென்இந்திய மொழிப் படங்களில் வில்லனாக நடித்து அசத்தினார் நளினிகாந்த். தமிழில், ‘முந்தானை முடிச்சு’, ‘ராசுக்குட்டி’, ‘ருத்ரா’ என நடிகர் பாக்யராஜின் பல படங்கள் உட்பட ஏராளமான படங்களில் நடித்தார்.

பிறகு 90களின் மத்தியில் நடிப்பிலிருந்து விலகி, சின்னத்திரை தயாரிப்பாளராக கோலோச்சினார். பின்பு அதிலிருந்தும் விலகி பத்து ஆண்டுகள் ரிலாக்ஸாக வெவ்வேறு பணிகளைச் செய்துவிட்டு மீண்டும் நடிப்பிற்குள் வந்திருக்கிறார் நளினிகாந்த்.‘‘நான் பிறந்து வளர்ந்ததெல்லாம் சென்னையில்தான். வண்ணாரப்பேட்டை தியாகராயா கல்லூரியில் பி.எஸ்சி மேத்ஸ் படிச்சேன். காலேஜ்ல படிக்கிறப்பவே ஸ்போர்ட்ஸ் சேர்மனா இருந்தேன். தவிர, நடிப்பு, டான்ஸ்னு போட்டிகள்ல கலக்குவேன். காலேஜில் சிறந்த நடிகர்னு பெயர் வாங்கினேன்.

காலேஜ் முடிச்சதும் எனக்கு போலீஸ் இன்ஸ்பெக்டர் வேலைவாய்ப்பு எல்லாம்  வந்தது. ஆனா, எனக்கு சினிமா மேல் காதல். வீட்டுல நடிக்க எல்லாம் வேண்டாம்னு வற்புறுத்தினாங்க. நான் பிடிவாதமா வேறு வேலைக்குப் போகாமல் சினிமா சான்ஸிற்கு சுத்திட்டு இருந்தேன். இந்நேரம், இயக்குநர் ஏபி நாகராஜனும், தெலுங்கு தயாரிப்பாளர் டிவிஎஸ் ராஜும் தொடங்கின ஃபிலிம் இன்ஸ்டிடியூட்டில் சேர்ந்தேன். என் வீட்டுல பயங்கர எதிர்ப்பு. அப்ப டிவிஎஸ் ராஜ், ‘நீங்கதான் நல்லா நடிக்கிறீங்களே... பிறகு ஏன் இங்க படிக்கணும்னு நினைக்கிறீங்க. டைம் வேஸ்ட் பண்ணாதீங்க’னு அட்வைஸ் பண்ணினார்.

நான் நிறைய கத்துக்கணும்னு சேர்ந்துட்டேன். அப்புறம், அங்கிருந்து வெளியே வந்து சினிமாவுக்கு முயற்சிக்கு பண்ணிக்கிட்டிருக்கிறப்ப ரஜினியும் தமிழ்நாடு ஃபிலிம் இன்ஸ்டிடியூட்ல கோர்ஸ் முடிச்சிட்டு வெளியே வந்தார். அப்ப, நடிச்சா கே.பாலசந்தர் சார் படத்துல நடிக்கணும்னு எல்லோருக்கும் ஒரு ஆசை இருந்தது. இல்லனா சினிமா பக்கமே போகக்கூடாதுனு ஒரு வைராக்கியத்துடன் வாழ்ந்த காலம்.   

பாலசந்தர் சார் பத்து ஆர்ட்டிஸ்ட்ஸை அறிமுகப்படுத்தினார். நானும் எவ்வளவோ முயற்சி பண்ணினேன். நானும் ரஜினியும் மாத்தி மாத்தி பாலசந்தர் சார் அலுவலகம் போவோம். அதுல ரஜினிக்கு லக் அடிச்சு பாலசந்தர் சார் படத்துல நடிச்சார். பிறகு, கொஞ்சநாள் சினிமாவிற்கு முயற்சி செய்தும் எனக்கு சரியா வாய்ப்பு அமையல. நான் சினிமாவுக்கு குட்பை சொல்லிட்டு மெடிக்கல் ரெப்ரசன்டேட்டிவ் வேலைக்குப் போயிட்டேன். பம்பாய், டெல்லி, பெங்களூர், ஆந்திரானு பல ஊர்களைச் சுத்திட்டு மீண்டும் சென்னைக்கு வந்தேன்.

இனி சினிமாவே வேண்டாம்னு வேலை பார்த்திட்டு இருக்கும்போது சில புரொடியூசர்கள் அவங்களே வந்து என்னை அணுகினாங்க. நான் வேண்டாம்னு தவிர்த்தேன். அந்நேரம், மறைந்த முன்னாள் முதல்வர் ஜெயலலிதா மேடம் கூட நடிக்க ஒப்பந்தமானேன். அவங்களுக்கு அது கடைசிப் படம். எனக்கு முதல்படம். ஆனா, அந்தப் படம் அறுபது சதவீதம் ஷூட்டிங் முடிஞ்ச நேரம், அன்றைய முதல்வர் எம்ஜிஆர், ஜெயலலிதா மேடத்தை அரசியலுக்கு வரச்சொல்லி அழைச்சாங்க. அதனால, அந்தப் படம் டிராப் ஆகிடுச்சு. அந்தப் படம் வெளிவந்திருந்தால் எனக்கு ஒரு நல்ல பெயர் கிடைச்சிருக்கும்.