தமிழுக்கு அரும்பணியாற்றிய ஜி.யு.போப் வாழ்ந்த இல்லம்...

தமிழ் சமுதாயத்திற்கும் தமிழ் மொழிக்கும் மகத்தான பணிகளை ஆற்றியவர் தமிழறிஞர் டாக்டர் ஜி.யு.போப். திருக்குறளை முதன்முதலில் முழுமையாக ஆங்கிலத்தில் மொழிபெயர்த்து, உலகம் முழுவதும் எடுத்துச் சென்ற பேராசிரியர் அவர். பிறகு நாலடியார், திருவாசகம் ஆகிய நூல்களையும் ஆங்கிலத்தில் மொழிபெயர்த்துத் தந்தார். இதனுடன் இலக்கண வினா விடை நூலை உரையுடன் வெளியிட்டார். தமிழ்த் தென்றல் திரு.வி.க, ‘தான் முதன்முதலில் பயின்ற இலக்கண நூல் போப்பினுடையது’ என உளம் மகிழ்ந்து பாராட்டியதுடன், 19ம் நூற்றாண்டில் போப்பின் இலக்கண நூல் சீரும் சிறப்புமாக விளங்கியதாகச் சொல்கிறார்.

தன் கல்லறையில் ‘இவன் ஒரு தமிழ் மாணவன்’ என எழுதுமாறு சொன்ன அந்தத் தமிழ்ப் பற்றாளர் வாழ்ந்த இல்லம் இன்றைய தூத்துக்குடி மாவட்டம் சாயர்புரத்தில் இருக்கிறது.
சாயர்புரத்தின் தந்தை என போற்றப்படும் ஜி.யு.போப், ஏழு ஆண்டுகளே அங்கு வாழ்ந்தார். அதற்குள் சாயர்புரத்தை மாற்றியமைத்து கல்வியில் பல அற்புதங்களை நிகழ்த்தினார். அவர் தூவிய கல்வி விதை இன்று சாயர்புரத்தில் பல்வேறு கல்வி நிறுவனங்களாக வேரூன்றி ஆலமரம் போல் நிற்கிறது. சரி, போப் ஏன் சாயர்புரம் வந்தார்?

அந்த வரலாற்றை நம்மிடம் பகிர்ந்தார், சாயர்புரம் போப் கலைக் கல்லூரியின் தமிழ்த்துறைத் தலைவர் பேராசிரியர் வெலிங்டன் பிரான்சிஸ் பிரபாகர். இவர் போப் பற்றி முழுவதும் படித்தறிந்து, அவர் எழுதிய இலக்கணநூலை ஆய்வு செய்து அதில் முனைவர் பட்டம் பெற்றவர். ‘‘போப்பின் பூர்வீகம் இங்கிலாந்தில் உள்ள பிளைமவுத் நகரம். அவர் தந்தை ஜான் போப். தாய் கேத்தரின் உக்ளோ. ஜான் போப் இறைநாட்டம் கொண்டவர். இந்தியாவில் சமயப் பணியாற்ற விருப்பம் தெரிவித்து, மெதடிஸ்ட் எனும் திருச்சபையில் கேட்டிருக்கிறார். அப்போ திருச்சபைக்கு போதிய பணவசதியில்ல. அதனால அவரால் இந்தியா வரமுடியல.