வாரிசு கதைஇதுதான்! Exclusive

லார்கோ வின்ச்!

இதுதான் விஜய் நடிப்பில் இயக்குநர் வம்சி பைடபள்ளி எழுதி இயக்கி வரும் படத்தின் ஒன்லைன். இந்த கணிப்புக்கு வரக் காரணம், விஜய்யின் பிறந்தநாளை ஒட்டி வெளியான அப்படத்தின் ஃபர்ஸ்ட் லுக் போஸ்டர்ஸ். படத்தின் பெயர், ‘வாரிசு’ என்ற அறிவிப்புடன் ரிலீசான அந்த மூன்று போஸ்டர்களில் கோட் சூட் அணிந்து விஜய் அமர்ந்திருக்கும் விதம்... புல்லட்டின் மேல் அவர் உட்கார்ந்திருக்கும் போஸ்... காய்கறிகளை ஏற்றிவரும் குட்டியானையில் குழந்தைகள் சூழ அவர் படுத்திருக்கும் ஸ்டைல்... ஆகியவை சர்வநிச்சயமாக லார்கோ
வின்ச்சைத்தான் நினைவுபடுத்துகின்றன.

இதற்கு வலுசேர்ப்பதுபோல் அமைந்திருக்கிறது டைரக்டர் வம்சி பைடபள்ளியின் கிராஃப். இவர் எழுதி இயக்கி தமிழில் ‘தோழா’ என்றும் தெலுங்கில் ‘ஊப்பிரி’ என்றும் ரிலீசாகி பாக்ஸ் ஆஃபீசில் பட்டையைக் கிளப்பிய படத்தின் நதிமூலம் ‘The Intouchables’ என்ற ஃபிரெஞ்சு படம்தான்!ஆனால், வம்சி பைடபள்ளி ‘The Intouchables’ஐ திருடவில்லை; சுடவில்லை. மாறாக, முறைப்படி ரீமேக் ரைட்ஸ் வாங்கியே நம் மண்ணுக்கு ஏற்ப அந்த ஃபிரெஞ்சு படத்தை டிங்கரிங் செய்து ‘தோழா’ @ ‘ஊப்பிரி’ என உருவாக்கினார்.

ஸோ, ‘வாரிசு’ படமும் அப்படி ‘லார்கோ வின்ச்’ காவியத்தின் அதிகாரபூர்வமான ரீமேக்காக இருக்க வாய்ப்பு அதிகம். எனவே, ‘வாரிசு’ பாக்ஸ் ஆபீசில் அதிரிபுதிரியாக வெற்றி பெறும் என உறுதியாகச் சொல்லலாம். அந்தளவுக்கு சொல்லி அடிக்கும் கமர்ஷியல் சினிமாவின் ஒன்லைன் ஆக ‘லார்கோ வின்ச்’சின் கதைக்களம் திகழ்கிறது. அதனாலேயே ஹாலிவுட் முதல் உலகிலுள்ள சகல மொழி கமர்ஷியல் திரை உலகமும் ‘லார்கோ வின்ச்’சின் லைனை எல்லா வகையிலும், எல்லா காலத்திலும், அதிகாரபூர்வமாகவோ அதிகாரபூர்வமற்றோ... தழுவியோ சுட்டோ பயன்படுத்தியபடியே இருக்கிறது.

இந்தத் தழுவல் இனியும் தொடரும் என்பதுதான் ஹைலைட். காரணம், எல்லா மொழி மாஸ் ஹீரோக்களுக்கும் மெகா ஹிட்டை தரும் வல்லமை இந்த ஒன்லைனுக்கு உண்டு!
பெல்ஜியம் நாட்டில் காமிக்ஸ் வடிவமாக உருத் திரண்ட லார்கோ வின்ச், பிறகு ஃபிரெஞ்சு மொழி பேசி, ஆங்கிலத்தைத் தழுவி... இன்று தமிழ் உட்பட ஈரேழு உலகிலும் உள்ள பெரும்பாலான மொழிகளில் சித்திரக் கதைகளாக வலம் வருகிறது.  

ரைட். லார்கோ வின்ச்சின் கதை என்ன..?

கல்தோன்றி மண் தோன்றாக் காலத்தே முன் தோன்றிய மூத்த லைன்தான். ஆனால், அதை ஃபைவ் ஸ்டார் ஹோட்டலில் விற்கப்படும் காஸ்ட்லி பழைய சோறாக மாற்றியதுதான் லார்கோ வின்ச் மீதான ஈர்ப்புக்குக் காரணம்.உலகின் மல்டி மில்லினியர்களில் ஒருவர். மிகப்பெரிய பிசினஸ் சாம்ராஜ்ஜியத்தின் அதிபதியும்கூட. அவர் திடீரென ஒருநாள் மர்மமான முறையில் இறக்கிறார். அவர் கொலை செய்யப்பட்டிருக்கலாம் என்ற சந்தேகம் வலுக்கிறது. கொன்றவர்கள் யாரென்று தெரியவில்லை.

அவரது பிசினஸை விழுங்க எதிரிகள் மட்டுமல்ல... உறவினர்களும் முற்படுகிறார்கள்; சதி செய்கிறார்கள். இதனால் சாம்ராஜ்ஜியம் ஆட்டம் காண்கிறது... சரிகிறது.
பிசினஸை தூக்கி நிறுத்த மில்லினியரின் மகன்களாக அறியப்படுபவர்கள் தலைகீழாக நின்று தண்ணீர் குடிக்கிறார்கள். ஆனாலும் அவர்களால் திறம்பட பிசினஸை நடத்த முடியவில்லை. எதிரிகளால் ஏற்படுத்தப்படும் இடையூறுகளை சமாளிக்கும் வல்லமை அவர்களுக்கில்லை.

இறந்த மில்லினியரின் பிசினஸ் சாம்ராஜ்ஜியத்தை நம்பி பல்லாயிரம் குடும்பங்கள் இருக்கின்றன. அவர்கள் அனைவரது எதிர்காலமும் கேள்விக்குறியாகிறது.இந்தச் சூழலில்தான் -அந்த மில்லினியருக்கு ‘அதிகாரபூர்வமாக’ ஒரு மகன் இருக்கும் ரகசியம் வெளிச்சத்துக்கு வருகிறது. ஆனால், அந்த மகன் யார்... எங்கு... எந்த நாட்டில்... எப்படி வசிக்கிறான்... என்ற க்ளூ யாருக்கும் கிடைக்கவில்லை. சொல்லப்போனால் எங்கோ வசிக்கும் அந்த மகனுக்கேகூட தனது தந்தை உலக கோடீஸ்வரர்களில் ஒருவர் என்ற உண்மை தெரியாது.