குடியரசுத் தலைவர் தேர்தல் முக்கியத்துவம் மிக்கதா?

குடியரசுத் தலைவர் என்பவர் எதற்காக தேவைப்படுகிறார் என்பதைப் புரிந்துகொண்டால்தான், அந்தப் பதவிக்கான தேர்தலை மதிப்பிட முடியும். அரசு (State) என்பது ஒட்டு மொத்த மக்களின் வெளிப்பாடு; அருவமானது. அனைவரும் ஏற்றுக்கொள்ளும் சட்டங்கள், நெறிமுறைகளின் தொகுப்பு. அரசாட்சி (Governance/ Government) என்பது நாட்டை நிர்வகிக்கும் சக்திபெற்ற நபர் அல்லது நபர்கள் கைவசம் இருப்பது, தூலமானது. மன்னர்கள் காலத்திலேயே கூட அரசு என்ற கருத்தாக்கம் மன்னராக உள்ளவரைவிட முக்கியமானது. மணிமுடி, செங்கோல் தாங்கி அரியணையில் யார் அமர்ந்தாலும் அவர்களுக்கு குறியீட்டு அதிகாரத்தை வழங்குவது அரசு என்ற கருத்தாக்கம்தான்.

மக்களாட்சியில் அரசியல் நிர்ணய சட்டம் என்பது குடியரசின் அடிப்படையாக விளங்குகிறது. அந்த சட்டத்தின், ஆட்சியின் குறியீடாக கட்சிகளுக்கு அப்பாற்பட்டு ஒரு குடியரசுத் தலைவர் தேவைப்படுகிறார். ஆனால், இவரிடம் ஆட்சியதிகாரம் இருக்காது. அது மக்களால் வாக்களிக்கப்பட்டு தேர்தலில் பெரும்பான்மை பெறும் கட்சியின் தலைவர் பிரதமரானால் அவரிடம்தான் இருக்கும்.  

இதனால் குடியரசுத் தலைவர் பதவி என்பது வெறும் அலங்காரப் பதவி, ரப்பர் ஸ்டாம்ப், வெட்டிச் செலவு, மக்கள் வரிப் பணத்தில் ஊர் சுற்றி வருவதற்கானது என்றெல்லாம் பலரும் கடுமையாக விமர்சிப்பார்கள். உண்மையில் அதனை அவ்வளவு பொருளற்றதாகப் பார்க்க முடியாது. ஏதோவொரு அசாதாரண சூழ்நிலையில் மக்களால் தேர்ந்தெடுக்கப்பட்ட அரசு கவிழ்ந்தால், உள்நாட்டில் குழப்பம் மேலிட்டால், குடியரசைப் பாதுகாக்கும் பொறுப்பும், அதிகாரமும் குடியரசுத் தலைவருக்கு உண்டு.

மணிமகுடம், செங்கோல், அரியணை போல இறையாண்மையின் வெளிப்பாடுதான் அவர். அதனால் எப்போதுமே பாராளுமன்றம் இயற்றும் சட்டங்களில் அவர்தான் இறுதியில் கையெழுத்திட வேண்டும். அவருக்கு பாராளுமன்றத்தை மீண்டும் பரிசீலிக்கச் சொல்லி திருப்பி அனுப்பும் அதிகாரம் உண்டு; சட்டத்தை ஏற்றுக்கொள்ளும் முன் பரிசீலிக்கவும் அதிகாரமும், அதற்கான அவகாசமும் உண்டு.  அவரால் பாராளுமன்றம் இயற்றும் சட்டத்தை தன்னிச்சையாக நிராகரிக்க முடியாது என்றாலும், ஒப்புதல் வழங்குவதில் தற்காலிகமாக சிக்கலை உருவாக்கலாம்.

இந்தியாவைப் பொறுத்தவரை இதுவரை அவ்வாறு குடியரசுத் தலைவருக்கும், பிரதமருக்கும் பெரிய பிரச்னைகள் என்று வந்ததில்லை என்றாலும், சில சமயங்களில் சுமுகமற்ற உறவு இருந்துள்ளது. சொல்லப்போனால் முதல் பிரதமர் ஜவஹர்லால் நேருவுக்கும், குடியரசுத் தலைவர் ராஜேந்திர பிரசாத்திற்கும் பல சமயங்களில் உரசல்கள் இருந்தன என்பது பிரசித்தம். அப்போதுதான் குடியரசு உருவானது என்பதால், செயல்முறை வழமைகளும் உருப்பெறாத காலம் என்பதால் அவ்வப்போது சிக்கல் தோன்றியது.

*குடியரசுத் தலைவர் தேர்தல் நடைமுறை