உணவகங்களில் காலம் காலமாக நமக்குத் தெரிந்தது சைவமும், அசைவமும் மட்டும்தான். ஆனால், இப்போது இதில் வீகன், பாலியோ, கீட்டோ... என பல வகை உணவு முறைகள் வந்துவிட்டன. இதில் குறிப்பாக வீகன் உணவு, அசைவத்தில் இருந்து சைவத்துக்கு மாறுபவர்களுக்கான மாற்று உணவு.

‘‘இறைச்சிகள் மட்டுமில்லாமல் மிருகங்களில் இருந்து பெறப்படும் பால், முட்டை மற்றும் அதிலிருந்து தயாரிக்கப்படும் தயிர், நெய், சீஸ், பனீர் போன்ற எந்த வகை உணவுகளையும் இவர்கள் சாப்பிட மாட்டார்கள். அசைவம் சாப்பிட்டுப் பழகியவர்களாகவே இருந்தாலும், அந்த உணவு இல்லாமல் இருக்க முடியும்...’’ என்று கூறும் மரீன் விஜய், அதற்கு மாற்றான ஆரோக்கியமான வீகன் உணவைத் தயாரித்து வழங்கி வருகிறார்.

நானும் அசைவப் பிரியை. ரொம்பவே விரும்பிச் சாப்பிடுவேன். தட்டுல அசைவம் இல்லைன்னா என்னால சாப்பிடவே முடியாது. ஒரு சிக்கன் பீசாவது கடிச்சாதான் ஒரு உருண்டை சாப்பாடு உள்ள இறங்கும். இப்படி எவ்வளவு அசைவ உணவை விரும்பிச்சாப்பிடறேனோ... அதே அளவுக்கு பல வகை உணவுகளையும் சமைப்பேன்...’’ என்றவர், தான் வீகன் உணவுக்கு மாறியதைக் குறித்தும் அந்த உணவைத் தயாரிக்கத் தொடங்கியது குறித்தும் பேசத் தொடங்கினார்.‘‘அன்று நைட் நடந்த நிகழ்வு இப்பவும் நினைவுல இருக்கு. அந்த ஒரு சம்பவம்தான் மனதை உலுக்கி என் உணவுப் பழக்கத்தையும் மாத்தியது.  எங்க வீட்ல நான் ஒரு நாயை வளர்த்து வந்தேன். அது குட்டிபோடும் நேரம். நைட் அதுக்கு பிரசவ வலி வந்தது. வீட்டிலேயே பிரசவம் பார்த்தேன்.