பயோ டேட்டா-ரோலக்ஸ் வாட்ச்

பெயர் : ரோலக்ஸ்.

பெயர்க் காரணம் : இருபதாம் நூற்றாண்டின் ஆரம்ப வருடங்கள். தன்னுடைய கடிகார நிறுவனத்துக்கு ஒரு பெயரைத் தேடிக்கொண்டிருந்தார் ஹான்ஸ்
வில்ஸ்டோர்ஃப்.

மொழியைத் தாண்டி சுலபமாக மக்களைச் சென்றடையக் கூடியதாக அந்தப் பெயர் இருக்கவேண்டும் என்பதுடன் எந்த மொழி பேசுபவர்களாலும் சுலபமாக உச்சரிக்கக்கூடியதாக இருக்கவேண்டும் என்பது அவரது விருப்பம். தவிர, கைக்கடிகாரத்தின் முகப்பில் பெயரைக் கச்சிதமாக பதிவு செய்யும் வகையில் குறைந்த எழுத்துகளுடன் அந்தப் பெயர் இருக்கவேண்டும் என்பது ஹான்ஸ் தனக்குத்தானே விதித்துக்கொண்ட நிபந்தனை. வருடக்கணக்கில் ஆங்கிலத்திலுள்ள எழுத்துகளை விதவிதமாகக் கோர்த்து நூற்றுக்கணக்கான சொற்களை உருவாக்கினாலும் அவர் தேடிக்கொண்டிருந்த பெயர் கிடைக்கவில்லை.

1908ம் வருடம் லண்டன் நகரில் இரண்டு அடுக்கு கொண்ட ஒரு குதிரை வண்டியின் மேல்தளத்தில் இருந்தவாறு பயணித்துக்கொண்டிருந்தார் ஹான்ஸ். அப்போது அவரது காதில் ‘ரோலக்ஸ்’ என்று மெலிதாக அசரீரி கேட்டிருக்கிறது. அதுவே நிறுவனத்தின் பெயராகி, மாபெரும் பிராண்டாகிவிட்டது.

பிறந்த இடம் : 1905-ம் வருடம் இங்கிலாந்திலுள்ள லண்டன் மாநகரம்.

வளர்ந்த இடம் : சுவிட்சர்லாந்தில் உள்ள ஜெனீவா நகரம்.

நிறுவனர்கள்: ஹான்ஸ் வில்ஸ்டோர்ஃப், ஆல்பிரட் டேவிஸ்.

அடையாளம்: உலகின் விலையுயர்ந்த கைக்கடிகாரங்களில் ஒன்று; உலகின் மதிப்புமிக்க பிராண்ட்.

உற்பத்தி : ஒவ்வொரு வருடமும் 8 லட்சம் முதல் 10 லட்சம் கடிகாரங்களைத் தயாரிக்கிறது ‘ரோலக்ஸ்’.

வரலாறு : ஹான்ஸ் வில்ஸ்டோர்ஃப்பின் தொலைநோக்குப் பார்வையும், ரோலக்ஸின் வரலாறும் நெருக்கமாகப் பிணைந்துள்ளன. 24 வயதான ஹான்ஸிற்கு நேர்த்தியான, நெடுங்காலம் உழைக்கக்கூடிய, நம்பகமான ஒரு கைக்கடிகாரத்தை உருவாக்க வேண்டும் என்பது கனவு. அப்போது கைக்கடிகாரம் ஓரளவுக்கு அறிமுகமாகியிருந்த போதிலும், அதன் தரம், டிசைன் என எதுவும் அவ்வளவு சிறப்பாக இல்லை. தவிர, கைக்கடிகாரத்தைக் காண்பதும் அரிதாகவே இருந்தது.

இனிமேல் கைக்கடிகாரம்தான் எதிர்காலம் என்பதை முழுமையாக நம்பினார் ஹான்ஸ். அதனால் 1905ம் வருடம் லண்டனில் தனது மைத்துனர் ஆல்பிரட் டேவிஸுடன் இணைந்து ‘வில்ஸ்டோர்ஃப் அண்ட் டேவிஸ்’ என்ற கடிகாரம் தயாரிக்கும் நிறுவனத்தை ஆரம்பித்தார் ஹான்ஸ். இதுதான் ‘ரோலக்ஸி’ன் ஆரம்பப்புள்ளி. நேர்த்தியான கைக்கடிகாரத்தை உருவாக்க வேண்டுமானால் எல்லா உபகரணங்களும் சிறிய அளவில் இருக்க வேண்டும். இதற்காக சுவிட்சர்லாந்தின் முன்னணி வாட்ச் நிறுவனங்களிடமிருந்து முக்கிய பாகங்களை லண்டனுக்குக் கொண்டு வந்தார். தான், கனவு கண்ட மாதிரி நேர்த்தியான கைக்கடிகாரத்தை வடிவமைத்தார்.