சித்ரா ராமகிருஷ்ணா, ஆனந்த் சுப்ரமணியன், ‘மர்ம‘ யோகி... கடந்த இரு வாரங்களாக இந்தப் பெயர்கள்தான் இந்தியாவின் வணிக உலகில் வைரல். குறிப்பாக, இந்த மூன்று பேரும் சேர்ந்து தேசிய பங்குச் சந்தையில் கடந்த இரு தசமங்களாக நடத்தி வரும் குளறுபடிகள், தகிடுதத்தங்கள் பற்றி பக்கம் பக்கமாக எழுதிக்கொண்டிருக்கின்றன வணிக ஊடகங்கள்.

இதில் சுவாரஸ்யம் என்னவென்றால் மூன்றாவது கேரக்டரான ‘மர்ம’ யோகி பற்றி யாருக்குமே தெரியாது. இந்த உலகில் அவரைப் பார்த்தவர்கள் சித்ரா ராமகிருஷ்ணா தவிர யாருமே இல்லை. திகில், மர்மம், அபத்த நகைச்சுவை, ஊழல், க்ரைம் என நவரசங்களும் நிரம்பிய ஒரு நிஜமான நாடகம் இது. இப்படி நடந்திருக்கிறது என்று ஒருவரிடம் சொன்னால் நம்பக்கூட மாட்டார்கள்.

ஏனெனில், இந்த ஆனந்த் சுப்ரமணியன் இந்தத் துறையில் எந்தவித முன் அனுபவமும் இல்லாதவர். இந்த வேலைக்கு அமர்த்தப்படும் முன்பு ஆனந்த் சுப்ரமணியன் மத்திய அரசுக்குச் சொந்தமான பால்மர் லாவ்ரி நிறுவனத்தின் துணை நிறுவனம் ஒன்றில் இடைநிலை அதிகாரி பொறுப்பில் இருந்தவர். அங்கு அவரது சம்பளம் ஆண்டுக்கு பதினைந்து லட்சம் என்பதாக இருந்தது.

அவர் யார் என்று யாருக்குமே தெரியவில்லை. ‘அவர் ஒரு சித்புருஷர், மகாஞானி, காலத்தை வென்றவர், என் அலுவலக சிக்கல்களுக்கு எல்லாம் அவரிடம் தீர்வு கேட்பேன். அவர் சொன்னதைச் செய்தேன். அவரின் கட்டளைப்படியே தேசிய பங்குச் சந்தையின் மிகப் பெரிய பதவியை ஆனந்த் சுப்ரமணியனுக்குக் கொடுத்தேன்...’ என்றெல்லாம் சொல்லியிருக்கிறார்.