சவுதி அரேபியா, குவைத், ஓமன்... போன்ற வளைகுடா நாடுகளில் அதிகமாக மலையாளிகள்தான் வேலை செய்து வருகிறார்கள் என்பது பொதுக்கருத்து. உண்மையில் அங்கே தமிழர்களும் அதிகமாக வேலை செய்கின்றனர். இதற்கு சாட்சியாக இருக்கிறது சமீபத்தில் வெளியான ஆங்கிலப் புத்தகம் ஒன்று.

‘தமிழ் மைக்ரன்ட்ஸ்’ ((TAMIL MIGRANTS), அதாவது ‘புலம்பெயர் தமிழர்கள்’ என்பது அந்தப் புத்தகத்தின் பெயர். இதை நான்கு பேர் சேர்ந்து எழுதியிருக்கின்றனர். அதில் ஒருவரான பெர்னார்ட் டி’ சாமி, சென்னை லயோலா கல்லூரியின் சமூக அறிவியல் பயிற்சி மற்றும் ஆய்வு நிறுவனத்தின் பேராசிரியர். வெளிநாடுகளில் வேலை செய்யும் தமிழர்கள் குறித்து அவரிடம் உரையாடினோம்.

அந்த அடிப்படையில்தான் எங்கள் ஆய்வையும் தொடங்கினோம். இதற்காக தமிழகத்தின் 32 மாவட்டங்களில் இருந்து சுமார் 20 ஆயிரம் குடும்பங்களைத் தேர்வு செய்தோம். கிராமம், நகரம், ஆண்கள், பெண்கள் என்று ஒரு கலவையாக ஆய்வு செய்தோம்.

இதற்காக ஒரு வினாத்தாளை தயாரித்தோம். வெளிநாட்டில் வேலை செய்யவில்லை என்று சொன்னால் இலகுவாக முடிந்துவிடும். ஒருவேளை வேலை செய்கிறார்கள் என்றால் அந்தக் குடும்பத்தின் தலைவி மற்றும் முதியோர் தொடர்பான வினாத்தாள்கள் வழங்கப்படும். வெளிநாடு மட்டுமல்ல; வெளிமாநிலங்களில் வேலை செய்பவர்கள் பற்றியும் வினா இருக்கும்...’’ என்கிற சாமி, இந்த சர்வேயில் வெளிநாட்டு வேலை தொடர்பாக கண்டுபிடித்த முடிவுகளைப் பகிர்ந்தார்.

இந்த 54 லட்சத்தில் 22 லட்சம் பேர் வெளிநாடுகளில் மட்டும் வேலை செய்பவர்கள். வெளிநாட்டில் வேலை செய்துவிட்டு வீடு திரும்பியோர் 13 லட்சம். வெளிநாடுகளிலும் சிங்கப்பூரில் 4 லட்சம், ஐக்கிய அரேபிய எமிரேட்டில் (UAE) 4 லட்சம், சவுதியில் 3.5 லட்சம், மலேசியாவில் 1.9 லட்சம், சவுதி, குவைத், ஓமன், கத்தார் ஆகிய வளைகுடா நாடுகளில் வேலைசெய்யும், செய்த தமிழர்கள் சுமார் 10 லட்சம் என இந்தப் பட்டியல் நீள்கிறது.

அதாவது வெளிநாட்டில் வேலை செய்யும் 22 லட்சம் தமிழர்களில் பாதிப்பேர் வளைகுடா நாடுகளில் வேலை செய்கிறார்கள். கேரளாவில் ஐந்து வீடுகளில் ஒருவராவது வளைகுடா நாடுகளில் வேலைசெய்கிறார் என்றால், தமிழகத்தில் பத்து வீட்டில் ஒருவராவது வளைகுடா நாட்டில் இருப்பார்.

‘‘வேலைக்காக வெளிநாடுகளுக்குச் செல்வது பல காரணங்களுக்காக நடைபெறும். ஆனால், எங்கள் ஆய்வில் தெரியவந்தது என்னவென்றால், கல்வி அறிவில்லாத அல்லது ஓரளவு கல்வி பெற்ற மக்களிடையே நிகழ்ந்த வெளிநாட்டு மற்றும் வெளிமாநில வேலைகள் தொடர்பான பிரச்னைகள்தான்.

மூளை வேலைக்காக செல்லும் ஐடி துறை தொடர்பான விஷயங்கள் இந்த சர்வேயில் வெளிப்படவில்லை. காரணம், கிராமம் - நகரம் சார்ந்த கலவையாக இந்த சர்வே இருந்தது. இப்படி கல்வி அறிவில்லாத ஒரு சமூகம் வேலைக்காக வெளிநாடுகளுக்கும், வெளி மாநிலங்களுக்கும் செல்லும்போது குடும்பம் ஓரளவு நிதி ரீதியாக காப்பாற்றப்படலாம்.

ஆனால், ஒரு குடும்பத்தில் உள்ள ஒரு ஆண்மகன் வீட்டில் இல்லாதபோது அந்தக் குடும்பத்தில் இருக்கும் பெண்மணிகளும், முதியோர்களும் அடையும் துன்பத்துக்கு அளவேதும் இல்லை.