கடந்த 2019ம் ஆண்டின் ஜூலை மாதத்தில் ஒட்டுமொத்த வணிக உலகமும் உறைந்துபோன ஒரு துயரச் சம்பவம் நிகழ்ந்தது. அது, காபி டே குழுமத்தின் தலைவர் வி.ஜி.சித்தார்த்தாவின் தற்கொலை. ஒரு மாலைப் பொழுதில் மங்களூருக்கு அருகில் உள்ள உல்லாலின் எல்லையில் பெரும் சுழிப்போடு பிரவாகிக்கும் நேத்ராவதி ஆற்றின் பாலத்தின் மேல் சென்று கொண்டிருக்கிறது சித்தார்த்தாவின் கார்.

பாலத்தின் ஒரு முனையில் வண்டியை நிறுத்தச் சொல்லிவிட்டு, ‘ஒரு நடை போய் வருகிறேன்’ என்று எதுவும் சொல்லாமல் இறங்கிச் செல்கிறார் சித்தார்த்தா. ஒரு மணி நேரத்துக்கு மேலாகியும் சித்தார்த்தா திரும்பாததால் அங்குமிங்கும் தேடிப் பார்த்துவிட்டு, பதற்றமாய் வீட்டுக்குத் தகவல் சொல்கிறார் வாகன ஓட்டி.

குருவி தலையில் பனங்காயை வைத்தது போல் முழுகிக்கொண்டிருக்கும் கப்பலான காபி டே என்ற பெரும் நிறுவனத்தின் நிர்வாகப் பொறுப்பு மாளவிகாவுக்கு வந்தது.மாளவிகா பொறுப்பேற்ற போது காபி டே நிறுவனத்துக்கு ஒன்றல்ல இரண்டல்ல ஏழாயிரத்து இருநூறு கோடி ரூபாய்க்கு மேல் கடனிருந்தது.

பதவியேற்ற தினத்திலேயே தன்னுடைய அனைத்துத் தொழிலாளர்களுக்கும் ஒரு கடிதம் எழுதினார் மாளவிகா. தான், காபி டே நிறுவனத்தை மீட்டெடுக்க விரும்புவதாகவும், அதற்காக சில துணிச்சலான முடிவுகளை எடுக்க வேண்டியது உள்ளதென்றும், ஊழியர்கள் முழு மனதோடு ஒப்புக்கொள்ள வேண்டும் என்றும் கேட்டுக்கொண்டார். இதே போல் பங்குதாரர்களிடமும் நிறுவனத்தின் மீட்சிக்கு ஒத்துழைக்க வேண்டும் என்று கோரப்பட்டது.

மறைந்த தன்னுடைய கணவர் சித்தார்த்தாவுக்குச் சொந்தமான இரண்டாயிரத்து அறுநூற்று தொண்ணூற்று மூன்று கோடி ரூபாய் மதிப்பிலான ஒரு சொத்தை கைமாற்றினார். நிறுவனத்தின் பெரும் கடன் சுமையைக் குறைக்க மேலும் சில  சொத்துக்களை விற்கவேண்டி இருந்தது. விரைவில் அவை விற்கப்பட்டு கடன் சுமை குறைக்கப்படும் என்று தைரியமாக அறிவித்தார்.

ஏழாயிரம் கோடிக்கு மேல் இருந்த கடன் ஒன்றே கால் வருடத்தில் வெறும் ஆயிரத்து எழுநூற்று முப்பத்தொரு கோடியாகக் குறைந்திருந்தது. அதாவது கிட்டத்தட்ட நான்கில் ஒரு பங்கு அளவுக்குக் கடன் குறைந்திருந்தது. இது நிஜமாகவே இமாலய சாதனை. ஒரு பெண்ணால் என்ன செய்ய முடியும் என்று கேட்டவர்கள் முகத்தில் கரியைப் பூசியிருக்கிறார் மாளவிகா.