உலகின் முதல் ஃபிளையிங் டீக்கடை!

‘‘பாஸ் ரெண்டு டீ...’’ என கேட்டதுதான் தாமதம்... கையில் வாக்கி டாக்கி எடுத்து யாருக்கோ ரகசிய தகவல் சொல்வதுபோல் பேசுகிறார் அந்த டீக்கடைக்காரர்.
வேளச்சேரி 100 அடி ரோட்டில் இருக்கிறது அந்த டீ பாய் டீக்கடை. பார்ப்பதற்கு ஒரு மாடல் விமானத்தின் கெட்டப்பில். ஒரே ஒரு நபர் மட்டும் அங்கே நிற்பார்.

 டீக்கடையோ கொதிக்கும் பாய்லர், அனல் கக்கும் அடுப்போ என எதுவும் இல்லாமல் வெறுமனே ஒரு டேபிள் சகிதமாக நிற்கும் அவரிடம்  டீ எனக் கேட்டால் வாக்கி டாக்கி எடுத்து ஆர்டரை வரிசையாகச் சொல்கிறார். சிறிது நேரத்தில் ஒரு லிப்ட் மூலம் மேலிருந்து நாம் கொடுத்த ஆர்டர் கீழே இறங்கி வருகிறது!
ஆம்! உலகின் முதல் ஃபிளையிங் டீ!

 அட  நல்லா இருக்கே என கடையின் உரிமையாளர் ஜோசப் ராஜேஷைச் சந்தித்து முழுக் கதையும் விசாரித்தோம். ‘‘சொந்த ஊர் கரூர். அங்கேயேதான் பிறப்பு, படிப்பு எல்லாமே. என்னுடைய சகோதரர் போலீஸ். காலேஜ் முடித்த உடனேயே சகோதரர் போலவே நானும் போலீஸ் வேலைனு முடிவு செய்துதான் வாழ்க்கையை ஆரம்பிச்சேன். முழுமையாகவே ஒரு போலீஸ்காரனுக்கு என்னென்ன தேவையோ அத்தனை முயற்சிகளும் செய்தேன்.

ஆனாலும் அந்தக் கனவு நிறைவேறவே இல்ல. அடுத்து என்னன்னு தெரியாம மிகப் பெரிய வெறுமை சூழ்ந்து எதைப் பார்த்தாலும் விரக்தி அடைஞ்சேன். ஒரு கட்டத்துல இனி அரசுப்பணி என்கிற எண்ணமே இருக்கக் கூடாதுன்னு முடிவு செய்தேன். வாங்கின அடி என்னை இன்னும் ஸ்ட்ராங்கா அடுத்த கட்டத்திற்கு நகர்த்த ஆரம்பிச்சது. பெரிய அளவில் நேர்மையா பணம் சம்பாதிக்கணும்னு முடிவு செய்தேன். வெளிநாட்டு வேலைக்கு டிரை பண்ணினேன். கிடைக்கலை.

ஒருவழியா ஒரு பேங்க் ஜாப் கிடைச்சது. அதுவும் காலைல ஆரம்பிச்சு சாயங்காலம் வரைக்கும் மார்க்கெட்டிங் வேலை. ஆனா, அந்த வேலைதான் எனக்கு டீ மேலே ஒரு ஆர்வத்தை உண்டாக்கிச்சு. வேலை நேரத்தில் பெரும்பாலும் டீக்கடையில்தான் பொழுது போகும். சொந்தமா என்ன பிசினஸ் செய்யலாம்னு முழிச்சவனுக்கு இப்ப பாதை தெரிஞ்சது. அதேசமயம் சிகரெட், குட்கா மாதிரி விஷயங்களைத் தவிர்க்கணும்னும் முடிவெடுத்தேன். குடும்பப் பெண்களும் தயங்காம என் கடையை நோக்கி வரணும்னு ஆசைப்பட்டேன்.