‘‘முதல்ல ஐஸ்கிரீமை நான் சொல்ற டாப்பிங்ஸ் எல்லாம் போட்டு ஸ்ட்ராபெர்ரி ஐஸ் கிரீம் ஆர்டர் போடுறீங்களா..?’’இப்படிதான் ஆரம்பமே நமக்கு கியூட்டாக கட்டளை வைத்தார் ‘ரித்து ராக்ஸ்’ யூ டியூப் சேனல் புகழ் ரித்விக்.

ஒரே ஒரு காமெடி செய்தி வாசிப்பு வீடியோ ஓகோவென பட்டி தொட்டி எங்கும் ஃபேமஸாக இந்த சுட்டி குட்டிதான் இப்போது டாக் ஆஃ த டவுன். உலகநாயகன் கமலஹாசனுக்கே சவால் விடும் வகையில் அப்பா, அம்மா, ‘எந்திரன்’ ரஜினி, ஏரியா டெய்லர், கிராமத்து அப்பாவி, சிட்டி அகராதி, ஆபீஸ் மானேஜர்... என அனைத்து கேரக்டர்களிலும் சிங்கிளாக - ஒன் மேன் ஆர்மியாக, தானே நடித்து பார்ப்பவர்களை வாய் பிளக்க வைத்து வெளுத்து வாங்கும் ரித்விக், இப்போது பிசியோ பிசி.

‘‘நான் நிறைய வீடியோஸ் பார்ப்பேன். எனக்கு இந்த கிராஃப்ட் வீடியோஸ் எல்லாம் ரொம்ப பிடிக்கும். அப்பா நிறைய எடிட்டிங் வேலை செய்துட்டு இருப்பாரு. கூடவே நின்னு நானும் அந்த டயலாக்ஸை எல்லாம் சொல்லிக்கிட்டே இருப்பேன். கொரோனா காலத்துல ஸ்கூல் இல்லாம ரொம்ப போர் அடிச்சது.

நானாதான் அப்பா கிட்ட ‘இந்த மாதிரி நாமளும் வீடியோஸ் எல்லாம் போடலாமா’னு கேட்டேன். நான் முதல்ல கிராஃப்ட் வீடியோதான் போடலாம்னு நினைச்சேன்...’’ என ரித்து பேசிக்கொண்டிருக்கும் போதே அவரது அப்பா ஜோதிராஜ், ரித்து ராக்ஸ் சேனல் உருவானது குறித்து சுவாரஸ்ய தகவல்களை பகிர்ந்து கொண்டார்.

 யூ டியூப் சேனல் நடத்துறது அவ்வளவு சுலபமில்ல. மத்த வீடியோஸை எல்லாம் நம்ம பயன்படுத்த முடியாது. காபிரைட் பிரச்னை வரும். அதேபோல சினிமா மியூசிக் வீடியோ கிளிப்பிங்ஸ் பயன்படுத்தினா ஆடியோ வீடியோ ரைட்ஸ் வரும். இப்படி நிறைய பிரச்னைகள் வந்துச்சுன்னா சேனலை முடக்கிடுவாங்க.

இதையெல்லாம் மனசுல வெச்சிதான் சொந்த கான்செப்ட்டா ஆரம்பிக்கணும்னு முடிவு செய்து ‘ரித்து ராக்ஸ்’ சேனலை உருவாக்கினோம். முதல் ரெண்டு வீடியோக்கு தான் கொஞ்சம் கஷ்டப்பட்டான். அதுக்கப்புறம் நாங்க என்ன ஸ்கிரிப்ட் கொடுக்கிறோமோ... எப்படி நடிக்கணும்னு சொல்றோமோ அத அப்படியே உள்வாங்கி நடிக்க ஆரம்பிச்சுட்டான்.

‘‘நான் ஒரு அசிஸ்டெண்ட் டைரக்டர். ரெண்டு சின்ன படங்கள் செய்திருக்கேன். கொரோனா காரணமா அந்தப் படங்கள் இன்னும் வெளியாகலை. இந்த ஊரடங்கு நேரத்துல சேனலைத் தொடங்கினோம். அதுக்கு முன்னாடி யூ டியூப் சேனலுக்கான ரூல்ஸை எல்லாம் பொறுமையா படிச்சு தெரிஞ்சுகிட்டுதான் வீடியோஸை உருவாக்க ஆரம்பிச்சோம்.