‘எங்கு பார்த்தாலும் எங்க டைரக்டர் படம்தான்  எடுக்கப்பட்டுக் கொண்டிருக்கும். ஒரே நேரத்தில் பல படங்கள் எடுக்கப்பட்டதால், வெள்ளிக்கிழமை என்றால் அவர் படம் ரிலீஸாகும்...’ என்று தனது இயக்குநரைப் பற்றி பெருமையாக சொல்கிறார் தேசிய விருது பெற்ற இயக்குநர் கருணாநிதி என்கிற அகத்தியன்.

அவரது குருநாதர்  வேறு யாருமல்ல... கதை, வசனகர்த்தா, தயாரிப்பாளர், இயக்குநர் என பன்முகத்திறன் கொண்ட படைப்பாளி எம்.ஏ.காஜா. தமிழ்த் திரையுலகில் கேப்டன் என அழைக்கப்படும் நடிகர் விஜயகாந்தின் உண்மைப் பெயர் விஜயராஜ். ஆனால், அவருக்கு 1979ம் ஆண்டு, தான் இயக்கிய ‘இனிக்கும் இளமை’ படத்தில் விஜயகாந்த் என பெயர் சூட்டியவரே இந்த காஜாதான்.

தமிழ் சினிமாவின் சிறந்த பாடலாசிரியர், இயக்குநராக அறியப்பட்ட கங்கை அமரனை இசையமைப்பாளராக சினிமாவில் அறிமுகப்படுத்தியதும் எம்.ஏ.காஜாதான். கங்கை அமரன் முதலில் இசையமைத்தது மலேசியா வாசுதேவன் ஹீரோவாக நடித்த ‘மலர்களிலே அவள் மல்லிகை’ படத்திற்குத்தான். ஆனால், படம் பாதியில் கைவிடப்பட்டது.

இதன் பின் எம்.ஏ.காஜா 1979ம் ஆண்டு இயக்கிய ‘ஒரு விடுகதை ஒரு தொடர்கதை’  திரைப்படம் மூலம்தான் கங்கை அமரன் இசையமைப்பாளராக அறிமுகமானார்.தமிழ் சினிமாவில் சுபா போன்று இன்று எத்தனையோ இரட்டையர்கள் கதை, வசனம் எழுதுகிறார்கள். ஆனால், தமிழ் சினிமாவில் அதற்கு பிள்ளையார் சுழி போட்டவரும் எம்.ஏ.காஜாதான். தனது நண்பர் ராம.நாராயணனுடன் சேர்ந்து ராம் - ரஹீம் என்ற பெயரில் பல வெற்றிப் படங்களுக்கு கதை எழுதினார்.

1980ம் ஆண்டு வெளியான ‘வள்ளிமயில்’ படத்தில் சங்கர்- கணேஷ் இசையில்  வாணி ஜெயராம், மலேசியா வாசுதேவன் பாடிய  ‘ஆத்தங்கரை ஓரம் காத்திருக்கும் நேரம்...’ என்ற பாடல் காஜா கற்பனையில் உதித்ததுதான்.