சமீப நாட்களாக தமிழ்நாடு முழுவதும் அடிக்கடி சிறிய அளவில் மின் தடை ஏற்படுகிறது. புகார் அளித்தால் உடனடியாக சரிசெய்கிறார்கள். பத்து ஆண்டுகளுக்கு முன் பேசுபொருளான மின்வெட்டு, இப்போது மீண்டும் மெதுவாகத் தலைதூக்குவது தற்செயலா அல்லது திட்டமிட்டு செயல்படுத்தப்படுவதா... என்கிற கேள்வியை மின்துறை உயர் அதிகாரிகள் சிலரிடம் முன்வைத்தோம்.

“பொதுவாக நாம் குறிப்பிடும் தமிழ்நாடு மின்சார வாரியம் என்பது -தமிழ்நாடு மின் உற்பத்தி மற்றும் பகிர்மானக் கழகம் (TANGEDCO), தமிழ்நாடு மின் தொடரமைப்பு கழகம்  (TANTRANSCO), தமிழ்நாடு மின்சார வாரியம் என்ற உடைமை நிறுவனம்... என்று மூன்று நிறுவனங்களாக பிரிக்கப்பட்டுள்ளது. இதில் TANGEDCO உற்பத்தி, பகிர்மானம், தமிழ்நாடு டிஸ்டிரிபியூசன், தமிழ்நாடு கார்ப்பரேஷன் ஆகவும் - TANTRANSCO ட்ரான்ஸ்மிஷனாகவும் இருக்கிறது.

இதற்குமேல் இருக்கும் CMDதான் முதன்மையானது. இதில்தான் பாஜக அரசு எல்லா துறைகளிலும் தனது ஆட்களை வைப்பது போல் தங்களுக்கு வேண்டிய நபர் ஒருவரை கடந்த அதிமுக ஆட்சியில் அதிகாரியாக நியமித்தது.இந்த அதிகாரி பிரதமருக்கு வேண்டப்பட்ட ஒரு பெரு நிறுவனத்தின் உரிமையாளரோடு நெருக்கமானவராக இருந்திருக்கிறார்.

அதனோடு தூத்துக்குடி, வடசென்னை, எண்ணூர், மேட்டூர் உட்பட தெர்மல் பிளான்டுகளின் உற்பத்தித்திறனை வேண்டுமென்றே குறைத்தனர். இதன் மூலமாக, தனியார் நிறுவனங்களிடம் இருந்து அதிக அளவு மின் கொள்முதல் செய்யத் தொடங்கினர் என்ற குற்றச்சாட்டை தொழிற்சங்கங்கள் ஆதாரங்களோடு கூறின. இதேபோல் அதிக விலையில் மின்சாரம் வாங்குவதுதான் மின் துறையினர் வைக்கும் மிகப்பெரிய குற்றச்சாட்டு. உண்மையில் மின்துறை கிட்டத்தட்ட 40 - 50 ஆயிரம் கோடி நஷ்டத்தில்தான் இருக்கிறது.

இதைச் சரிசெய்வதற்கு அதிகமான விலை கொடுத்து தனியாரிடமிருந்தும், அண்டை மாநிலங்களிலிருந்தும் மின்சாரத்தை வாங்குகிறார்கள் என்றும், அதை சாக்காக வைத்து சென்ற ஆட்சியில் மிகப்பெரிய அளவில் ஊழல் நடந்திருப்பதாகவும் குற்றச்சாட்டு முன்வைக்கப்பட்டது.தவிர 63 செக்‌ஷனில் AE அளவிலும்; அதேபோல் SC, JE, AEL-இல் இருந்து லைன்மேன் வரை  தோராயமாக 40ஆயிரம் பணியிடங்கள் காலியாக இருக்கின்றன. இதனால் வேலைப்பளு அதிகமாக உள்ளது. காலியிடப் பணியினை ஒப்பந்த ஊழியர்கள் கொண்டு செய்கிறார்கள்.

மின் தயாரிப்பினைப் பொறுத்தவரை நான்கு வகைகளில் இருக்கிறது. அனல் மின் நிலையம், நீர் மின் நிலையம், காற்றாலை, வெப்ப மின் நிலையம் (சோலார், கேஸ் - பெட்ரோலியம்). இதில் கேஸ் - பெட்ரோலில் ஓடக்கூடியதற்கு ஒன்றிய அரசு மானியம் கொடுக்கிறது. இதை நிறுத்திவிட்டு, பிரதமருக்கு நெருக்கமான தனியார் பெருநிறுவனங்களுக்கு கொடுக்க பேச்சுவார்த்தை நடந்து கொண்டிருக்கிறது.

தமிழகத்தில் உள்ள தெர்மல் பிளான்டுகளை குறிப்பிட்ட கால அளவுக்கு ஒருமுறை - அதாவது மூன்று அல்லது ஆறு மாதங்களுக்கு ஒரு முறை - மொத்த உற்பத்தியையும் நிறுத்திவிட்டு பராமரிக்க வேண்டும். அப்படி உற்பத்தியை நிறுத்தினால் மற்றொரு தெர்மல் பிளான்டில் உற்பத்தியை அதிகரிக்க வேண்டும்.

இந்த நடைமுறைக்கு மாறாக 2018 - 19ம் ஆண்டுகளிலிருந்து சரியான முறையில் எங்கும் சர்வீஸ் நடத்தப்படவில்லை. இதனால் திடீர், திடீர் என தெர்மல் பிளான்டுகள் ஷட் டவுன் ஆகின்றன.

இந்த கோடை காலத்தில் மின் தடைக்கு காரணம், நீர் மின் நிலையங்கள் மூலமாக வரக்கூடிய மின்சாரம் தடைப்பட்டிருப்பதுதான். எந்த அணையிலும் நீர் இல்லை. தூத்துக்குடி, மேட்டூர், வட சென்னை, எண்ணூர், வள்ளூர் ஆகிய யூனிட்டுகளில் ஏதாவது இரண்டு யூனிட் கட் ஆகிறது. இதனால் 2000 - 3000 மெகாவாட் பற்றாக்குறை ஏற்படுகிறது.

கர்நாடகா, மும்பைக்கு போகிற நெய்வேலி மெயின் லைனிலிருந்து கணிசமான மின்சாரம்  தமிழ்நாட்டுக்கு கொடுக்கப்படவில்லை. இதே மின் பற்றாக்குறை பிரச்னை அங்கேயும் ஆரம்பித்துள்ளதால், நெய்வேலி லைன் மொத்தமாக மற்ற மாநிலத்திற்கு போகிறது.

“மின்சாரம் தயாரிப்பதற்கான முதலீட்டை தொடர்ச்சியாக செய்யவில்லை. ராமநாதபுரம், சிவகங்கையில் பிரதமருக்கு நெருக்கமான பெரு நிறுவனத்துக்கு ஆயிரக்கணக்கான ஏக்கர் சூரிய மின் சக்திக்கு ஒதுக்கப்பட்டது. அதில் உற்பத்தி ஏதும் தொடங்கப்படவில்லை. அதற்கு ஒதுக்கிய நிதியை காரணம் காட்டி மற்ற இடங்களில் பராமரிப்பு போன்ற மற்ற விஷயங்கள் நடக்கவில்லை.

அதேபோல் நிலக்கரி கொள்முதலில் ஏற்பட்ட பற்றாக்குறை, அனல்மின் நிலையத்துக்கான மிகப்பெரிய சிக்கலாக வெடித்தது. இதனால் ஜெயலலிதா நிலக்கரி சுரங்கங்களை தமிழ்நாடு மின்வாரியம் நேரடியாக துவங்க சில இடங்களை குத்தகைக்கு எடுக்க முடிவு செய்தார். அதுவும் மூன்று நான்கு ஆண்டுகளுக்கானதாக இருந்தது.

நீண்ட கால கொள்முதலுக்கு தமிழ்நாடு அரசு கேட்டபோது ஒன்றிய அரசு மறுத்துவிட்டது. நிலக்கரி டெண்டர் 2020ம் ஆண்டோடு கிட்டத்தட்ட முடிந்துவிட்டது. ஆக, இந்த நிலக்கரி பற்றாக்குறையும் கூடுதல் சிக்கல்.தேர்தலுக்குப் பின் இந்த ஒரு மாத காலத்தில் சர்வீஸ், புரொடக்‌ஷன், மெயின்டனன்ஸ் ஆகிய இந்த மூன்றில் ஏற்பட்ட மிகப்பெரிய கோளாறு இப்போது பிரச்னையாகிக் கொண்டிருக்கிறது.