கொரோனாவின் பாய்ச்சலுக்கு முன்பு காற்று மாசுபாட்டால் தத்தளித்தது தில்லி.  வீட்டைவிட்டு வெளியே வரவே மக்கள் பயந்தனர். இதைச் சரி செய்வதற்காக பல திட்டங்கள் தீட்டப்பட்டன. அப்போது தில்லி ஐஐடியில் பயின்ற ஐந்து மாணவர்கள் சேர்ந்து ‘கிரியா லேப்ஸ்’ என்ற ஒரு ஸ்டார்ட் அப் நிறுவனத்தை ஆரம்பித்தனர்.

சுற்றுச்சூழலுக்குத் தீங்கு விளைவிக்காத பொருட்களைத் தயாரிப்பது இந்நிறுவனத்தின் நோக்கம். இதன் முதல் கட்டமாக நெல் வைக்கோல் கழிவுகளைக் கூழாக மாற்றி, அதில் பொருட்கள் தயாரிக்கும் தொழில்நுட்ப இயந்திரத்தை உருவாக்கியுள்ளனர். இந்த இயந்திரத்தின் மூலம் தயாராகும் வைக்கோல் தட்டுகள், குவளைகள் மனதை அள்ளுகின்றன; சூழலையும் பாதுகாக்கின்றன.

இந்த திட்டத்தை தலைமையேற்று வழிநடத்தும் பயோமெடிக்கல் இன்ஜினியரிங் துறையின் பேராசிரியர் நீத்து சிங், ‘‘இந்த தொழில்நுட்பம் விவசாயிகளுக்கும், உணவகம் நடத்துபவர்களுக்கும் அதிக பயன்பாட்டைத் தரும்...’’ என்று உறுதியாகச் சொல்கிறார்.“வேளாண் கழிவுகளில் இருந்து தயாரிக்கப்படும் கூழ், ஒரு கிலோ 45 ரூபாய் வரை விற்கப்படுகின்றது.

இதனால் விவசாயிகள் கழிவுகளை எரிப்பதற்கு பதிலாக கூழாக மாற்றி விற்பனை செய்யலாம். வைக்கோல் கூழ் மூலம் தயாரிக்கப்படும் தட்டுகள், கோப்பைகளை நேரடியாக சந்தையில் விற்கலாம். இதன்மூலம் ஓரளவு மாசைக் கட்டுப்படுத்த முடியும். விவசாயிகளுக்கும் நல்லது நடக்கும். ஆகவே, இந்த தொழில்நுட்பத்தை இந்தியா முழுவதும் கொண்டு செல்ல திட்டமிட்டுள்ளோம்.

ஒவ்வொரு ஆண்டும் பஞ்சாப் மற்றும் அரியானா பகுதிகளில் டன் கணக்கில் வைக்கோல் கழிவுகளை எரிக்கின்றனர். இது காற்று மாசுபாட்டை உண்டாக்குகிறது. அதனால் அந்த வைக்கோல் கழிவுகளை கொள்முதல் செய்து இம்மாதிரி  பொருட்களாக மாற்ற உள்ளோம்.

இரண்டு வருடத்துக்குள் குறைந்தது ஆயிரம் இயந்திரங்களை விவசாயிகளிடமும், புதிதாக ஸ்டார்ட் அப் தொழில் செய்ய நினைப்பவர்களிடமும் கொண்டு சேர்க்க திட்டமிட்டுள்ளோம். ஐந்து வருடத்துக்குள் மற்ற மாநிலங்களையும் தொட்டு விட வேண்டும். குறிப்பாக ஆந்திரா, தமிழ்நாட்டில் கால்பதிக்க வேண்டும் என்ற இலக்கில் வேகமாகச் செயல்பட்டு வருகின்றோம்...’’ என்கிறார் ‘கிரியா லேப்ஸி’ன் நிறுவனர்களில் ஒருவரான அங்கர் குமார்.