முதல்வராக மு.க.ஸ்டாலின் வர வேண்டும்! தீர்ப்பு எழுத தயாராகும் மக்கள்

தமிழகத்தின் அடுத்த முதல்வராக யார் வர வேண்டுமென விரும்புகிறீர்கள்..? கடந்த மாதம் ஆங்கில மற்றும் தமிழ் ஊடகங்கள் நடத்திய தேர்தலுக்கு முந்தைய கருத்துக் கணிப்பில் மக்கள் முன் வைக்கப்பட்ட பிரதான கேள்விகளில் ஒன்று இது.

இதற்கு பெரும்பான்மையானவர்கள் தந்த பதில்- மு.க.ஸ்டாலின்!ஆம். 2021 தேர்தலில் திமுக கூட்டணி பெரும்பான்மையான இடங்களைக் கைப்பற்றி ஸ்டாலின் தலைமையில் ஆட்சியை அமைக்கும் என்பதே கருத்துக் கணிப்புகளில் கிடைத்திருக்கும் தகவல்கள்.  முதலில் ‘டைம்ஸ் நவ்’ ஆங்கில செய்தி சேனல், ‘சி வோட்டர்’ நிறுவனத்துடன் இணைந்து நடத்திய கருத்துக் கணிப்பு முடிவுகள் பற்றி பார்ப்போம்.

கடந்த மார்ச் மாதம் 17ம் தேதி முதல் 22ம் தேதி வரை நடத்தப்பட்டிருக்கிறது இந்த கருத்துக் கணிப்பு. இதில், தமிழகம் முழுவதிலுமிருந்து 8 ஆயிரத்து 709 பேர் கலந்து கொண்டுள்ளனர்.  இதில் எவ்வளவு சதவீத வாக்குகளை ஒவ்வொரு கூட்டணியும் பெறும் என்கிற கேள்வியில், திமுக கூட்டணிக்கு 46% கிடைக்கும் என்றும், அதிமுக கூட்டணி 34.6% பெறும் என்றும் தெரிய வந்துள்ளது.

கடந்த 2016 தேர்தலில் திமுக கூட்டணிக்கு 39.4% பேர் ஆதரவு தெரிவித்திருந்தனர். இந்த முறை கூடுதலாக 6.6% அதிகரித்திருப்பது பெரிய வாக்கு வித்தியாசம் எனச் சுட்டிக் காட்டுகின்றனர் நிபுணர்கள். தவிர, அதிமுக கூட்டணியின் வாக்கு வங்கி கடந்த தேர்தலை விட மைனஸ் 9.1% ஆக குறைந்திருக்கிறது.

அடுத்ததாக, திமுக கூட்டணி எத்தனை இடங்களைக் கைப்பற்றும் என்கிற கேள்விக்கு 173 முதல் 181 இடங்கள் என கருத்துக் கணிப்பில் தெரிய வந்துள்ளது. அதிமுக கூட்டணிக்கு 45 முதல் 53 இடங்கள் கிடைக்கலாம் என்கிறது கணிப்பு. தவிர, மக்கள் நீதி மய்யமும், அமமுகவும் ஒன்றிலிருந்து ஐந்து இடங்கள் பிடிப்பதற்கான வாய்ப்பு இருப்பதாக கணிப்பில் தெரிவிக்கப்பட்டுள்ளது.

அடுத்ததாக, பாஜ தலைமையிலான மத்திய அரசின் செயல்பாடு திருப்தி அளிக்கிறதா என்கிற கேள்விக்கு 50% பேர் சிறிதும் திருப்தி இல்லை என்று பதிலளித்துள்ளனர். இதேபோல் மாநில அரசின் செயல்பாடுகள் திருப்தியாக உள்ளதா என்கிற கேள்விக்கு 38.8% பேர் சிறிதும் திருப்தி இல்லை என்றுள்ளனர்.

தொடர்ந்து முதல்வரின் செயல்பாடு திருப்தியளிக்கிறதா என்கிற கேள்விக்கு 36.51% பேர் சிறிதும் திருப்தியில்லை என்றே தெரிவித்துள்ளனர். இதில், ரொம்ப திருப்தி, ஓரளவு திருப்தி என்பதை விட சிறிதும் திருப்தி யில்லை என்கிற பதிலையே அதிகம் பேர் தெரிவித்திருப்பது கருத்துக் கணிப்பில் தெரிய வந்துள்ளது.  இறுதியாக, முதல்வராக இருப்பதற்கு மிகவும் பொருத்தமான வேட்பாளர் யார் என்கிற கேள்விக்கு, மு.க.ஸ்டாலினுக்கு 43.1%, பேரும், எடப்பாடி பழனிச்சாமிக்கு 29.7% பேரும் ஆதரவு தெரிவித்துள்ளனர்.

இதைப்போலவே, தமிழகத்தின் செய்தி சேனல்களில் ஒன்றான ‘புதிய தலைமுறை’ நடத்திய கருத்துக் கணிப்பும் திமுக கூட்டணியே வெற்றி வாகை சூடும் என்கிறது. கடந்த பிப்ரவரி மாதம் 18 முதல் மார்ச் 15ம் தேதி வரை இந்த கருத்துக் கணிப்பு நடத்தப்பட்டுள்ளது. இதில், தமிழகத்தில் யாருக்கு எத்தனை இடங்கள் கிடைக்கும் என்கிற கேள்விக்கு திமுக கூட்டணி 151 முதல் 158 இடங்களைப் பிடிக்கும் என்றும், அதிமுக கூட்டணி 76 முதல் 83 இடங்களைப் பெறும் என்றும் தெரிய வந்துள்ளது.