மினிஸ்டர் ஒயிட் சட்டையும் வேட்டியும் பட்டாபட்டி ட்ரவுசரும் டயர்செருப்பும் அணிந்திருந்தார். சட்டைப்பையில், மறைந்த அவரது கட்சித்தலைவி தெய்வநாயகி புகைப்படம் சிரித்தது. அரைலிட்டர் சென்ட் அடித்திருந்தார்.செய்தியாளர்கள் கேள்விகள் கேட்க ஆரம்பித்தனர்.

“நடிக்காத... உங்களை எல்லாம் நான் ஆட்சியில் இருந்தப்ப எப்டி வச்சிருந்தேன்... பரமார்த்த குருவுக்கு அஞ்சு முட்டாள் சீடர்கள் மாதிரி எனக்கு இருபத்தியைஞ்சு அமைச்சர்கள்... ஒருத்தர் மூஞ்சியாவது மீடியாவுக்கு தெரியுமா? யாராவது தனியா மீடியாவுக்கு குரல் கொடுக்க முடியுமா? அமாவாசை வந்தா உஷ் பௌர்ணமி வந்தா இஷ்னுல அமைச்சர்களை மாத்திக்கிட்டு இருந்தேன்.

பொட்டுப்பூச்சியா முதுகெலும்பில்லாத கொத்தடிமைகளா இருந்த நீங்க எல்லாம் என் மரணத்துக்குப் பிறகு தனித் தனியா ஆட்டம் போடுறீங்க... ஒரு அமைச்சர் ஓசோன் ஓட்டையை தெர்மாகோல் வச்சு அடைக்கலாம்னு ஐடியா குடுக்கிறான்... இன்னொரு அமைச்சர் தன்னோட செருப்பை ஒரு பழங்குடியின சிறுவனை விட்டு கழட்டச் சொல்றான்!”

“என்ன வாய்க்குள்ளயே முனங்கிற!” நங்கென்று தலையில் ஒரு குட்டு வைத்தார் தெய்வநாயகி. துள்ளித்துடித்தார் நாகராஜசோழன்.“இனி நீங்க என்ன செய்யணும்னு தெரியுமா அமாவாசை? ஆளாளுக்கு கருத்துகந்தசாமி ஆகாதிங்க. லஞ்சம் வாங்காதிங்க. மத்திய அரசுக்கு அடிமையாய் இராது, உணவு பாதுகாப்பு சட்டத்திற்கு, நியூட்ரினோ திட்டத்திற்கு, கெய்ல் எரிவாயு திட்டத்திற்கு, ஹைட் ரோகார்பன் திட்டத்திற்கு, புதிய கல்விக் கொள்கைக்கு, முத்தலாக் சட்டத்திற்கு, உயர்சாதி வகுப்பினருக்கான பத்து சதவீத ஒதுக்கீட்டுக்கு, காஷ்மீரின் சிறப்பு அந்தஸ்து ரத்துக்கு, தேசிய மின்கொள்கைக்கு, தேசிய குடிமக்கள் பதிவேடு சட்டத்திற்கு, தேசிய மக்கள் தொகை பதிவேட்டுக்கு, குடியுரிமை திருத்த சட்டத்திற்கு எதிர்ப்பு தெரிவியுங்கள். நீர் மேலாண்மை நிர்வாகம் செய்யுங்கள். தமிழ்நாட்டில் எங்கு காற்றும்

நிலத்தடி நீரும் மாசுபடுதோ அங்கெல்லாம் தயவு தாட்சண்யம் இல்லாம தடை செய்யுங்க.

எதற்கெடுத்தாலும் முந்தைய ஆட்சி மீது பழி போடாதிங்க. தவறு செய்தால் வெளிப்படையா மன்னிப்பு கேளுங்க. மொத்தத்துல தமிழ்நாட்டை சுடுகாடாக்காம பாத்துக்கங்க!” சொல்லிவிட்டு நாகராஜசோழனை மொத்துமொத்து என்று மொத்தி எடுத்தார் தெய்வநாயகி.

பத்திரிகையாளர் சந்திப்பில் ஒரு நிருபர் நாகராஜசோழனிடம், “ஏதோ ரகசியமா யாகம் நடத்தினீங்க போல!”“ஹிஹி! அம்மாவின் புகழ் இந்த பூமி இருக்கும் வரை நிலைக்கணும்னு யாகம் பண்ணினோம்!” வீங்கின கன்னத்தை மறைத்துக்கொண்டார் நா.ரா.சோழன்.அன்றிரவு வழக்கம் போல குடியும் கும்மாளமுமாய் இருந்த சோழன் அயர்ந்து தூங்கிக்கொண்டிருந்தார்.

கனவு வந்தது. எண்ணெய் தடவிய பிரம்புடன் தெய்வநாயகி.“திருந்தச் சொன்னா கனவுல நான் வராம இருக்க பரிகார யாகம் பண்றீங்களா?”உடலெங்கும் கொழுக்கட்டை கொழுக்கட்டையாய் வீங்க விளாசித் தள்ளினார் தெய்வநாயகி. 2021லும் நாகராஜசோழன் ஓடிக் கொண்டிருக்கிறார். யாராவது காப்பாற்றுங்களேன்!