அசத்துது டோலிவுட்...தேயுது கோலிவுட்..?

கடந்த ஆண்டு நவம்பர் 10ம் தேதி ஐம்பது சதவிகித இருக்கைகளுடன் திரையரங்குகள் திறக்கப்பட்டன. சில படங்கள் திரைக்கு வந்தும், எதிர்பார்த்த கூட்டம் வரவில்லை. இதனால் எல்லோரின் கவனமும் டாப் ஹீரோ படமான ‘மாஸ்டரை' நோக்கி நகர்ந்தது. ‘விஜய் படம் ரிலீஸானால்தான் மக்கள் கூட்டம் தியேட்டருக்கு படையெடுக்கும்’ என்ற நம்பிக்கை அதிகரித்தது. அதற்கேற்ப ‘மாஸ்டர்’ வெளியானதும் கூட்டமும் திரையரங்குக்கு படையெடுத்தது.

அதன் பிறகு..? கிட்டத்தட்ட 45 படங்களுக்கு மேல் கொரோனா பொது ஊரடங்குக்குப் பின் தமிழில் வெளியாகியிருக்கின்றன. ஆனால், எந்த படத்திற்கும் தியேட்டர்களில் கூட்டம் இல்லை.  தெலுங்குத் திரையுலகமான டோலிவுட்டில் நிலைமை அப்படியில்லை. அங்கு சினிமா இயல்பு நிலைக்குத் திரும்பிவிட்டது. வாரத்திற்கு மினிமம் மூன்று படங்களாவது ரிலீஸாகின்றன. மூன்றுமே லாபம் பார்க்கின்றன. ஒன்றல்ல இரண்டல்ல... கிட்டத்தட்ட ஆறு படங்கள் கொரோனா பொது ஊரடங்குக்குப் பின் அங்கு வெளியாகி சூப்பர் டூப்பர் ஹிட் அடித்துள்ளன.

இதில் குறைந்த பட்ஜெட்டில் விஜய் சேதுபதி நடிப்பில் உருவான ‘உப்பண்ணா’ நூறு ப்ளஸ் கோடியை ஆந்திராவில் வசூலித்துள்ளது!இதுபற்றி தமிழக திரையுலக ஜாம்பவான்கள் என்ன சொல்கிறார்கள்? ‘‘ஒரு காலத்துல தமிழ்ச் சினிமா ஆரோக்கியமா இருந்துச்சு. ‘காதல்’, ‘வெயில்’னு சின்னச் சின்ன  படங்கள் நல்லா ஓடுச்சு. ஆனா, இனி அப்படி நடக்கறது சிரமம்...’’ என வருத்தத்துடன் ஆரம்பித்தார் முப்பது ஆண்டு அனுபவமிக்க  ஒளிப்பதிவாளர் எம்.வி.பன்னீர்செல்வம்.