மானம் கெட்ட மனிதர்கள் தலை நிமிர்ந்து வாழும் போது, மண்ணுக்காக போராடு பவன் தலைகுனியக் கூடாது என்பதை உணர்த்துகிறான் ‘காடன்’.சூரிய ஒளியே தரையில் பாயாத அளவிற்கு அடர்ந்த காடு அது. ஓங்குதாங்காக உயர்ந்து நிற்கும் மரங்களுடன் யானைகள், பறவைகளென இயற்கையோடு இயைந்து வாழ்பவர் ராணா.

அந்த காடு, அவரது தாத்தா வழி பூர்வீக சொத்து. அந்த காட்டின் மீது வனத்துறை அமைச்சருக்கு ஒரு கண். காட்டை அழித்து அங்கே தனது ட்ரீம் புராஜெக்ட்டாக நகரம் ஒன்றை உருவாக்க நினைக்கிறார். அதன் முதல் முயற்சியாக காட்டில் நீளமான சுவரை எழுப்புகிறார்.

யானைகளை நேசிக்கும் இதயமும், துளிர்த்த செடியைப் பார்த்து பூக்கும் புன்முறுவலும், இயலாமையால் வெறுமையான கண்களுமாக காடனாகவே வாழ்ந்திருக்கிரார் ராணா. கும்கி யானைப் பாகனாக விஷ்ணு விஷால். காடுகளைப் பாதுகாப்பதன் மகத்துவத்தை அறியாத பாகனாக, பணத்திற்காக, தான் நேசிக்கும் யானையின் நலனைக் கூட கண்டுகொள்ளாதவராக கேரக்டரை உணர்ந்து செய்திருக்கிறார்.

அவரது உதவி யாளராக வரும் தெலுங்கு நடிகர் ரகுபாபு, காமெடியும் குணச்சித்திரமுமாக கலந்தடித்திருக்கிறார். ஹீரோயின்களான சோயா ஹூசைன், ஷிரியா பில்கான்கர் இருவருக்கும் அவ்வளவு ஸ்கோப் இல்லை. வனத்துறை அமைச்சராக அனந்த் மகாதேவன் மிரட்டியிருக்கிறார்.