குருவிகளைப் பாதுகாக்கும் குட்டி பாய்ஸ்!

கீச்… கீச்… கீச்… என இசைக்கும் சிட்டுக்குருவிகளின் சின்ன இறக்கைகளும், குட்டி உடலும் இயற்கையின் படைப்பில் மிக ஆச்சர்யமான ஒன்று.ஆனால், பெருகி வரும் நகரமயமாக்கலால் இந்தச் சின்ன ஜீவன்கள் மெல்ல அழிந்து வரும் நிலைக்கு எப்போதோ தள்ளப்பட்டுவிட்டன.
இயற்கை ஆர்வலர்கள் இதுகுறித்து பலவிதங்களில் விழிப்புணர்வு கொடுத்து வந்தாலும் பயனில்லை. இதையறிந்து புதுச்சேரியைச் சேர்ந்த ஒரு பள்ளிச் சிறுவர்கள் குழு சிட்டுக்குருவிகளை பாதுகாக்க களத்தில் இறங்கி குழுவாக செயல்பட்டு வருகின்றனர்!

‘‘கோடைகாலம் வந்திடுச்சு. குறைந்தபட்சம் உங்க வீட்டு மாடிகள், திட்டுகள்ல எல்லாம் கொஞ்சம் தானியமும், தண்ணீரும் வைங்க. சிட்டுக்குருவி மட்டுமில்லை. ஏதோ சில பறவைகளும் வந்து குடிச்சிட்டு, சாப்பிட்டுட்டு போகும்…’’ ஆரம்பமே பக்குவப்பட்ட மனநிலையில் பேசத்துவங்கியது இந்த சிறுவர் குழு.

‘‘எங்களுக்கு இந்த சிட்டுக்குருவிகள் பத்தி சொல்லிக் கொடுத்தது, அதை எப்படி பராமரிக்கணும்னு பயிற்சி கொடுத்தது எல்லாமே ராமன் அண்ணாதான். பள்ளிக்குப் போன நேரம் போக மீதி நேரம் இங்கதான் இருப்போம். நாங்க மொத்தம் 10 பேர். ராமன் அண்ணாவும், கிஷோர் அண்ணாவும் குருவிக்கான செயற்கை மரக்கூடுகள், தானிய டப்பாக்கள் எல்லாம் ரெடி செய்திடுவாங்க. எந்த கூட்டை எங்கே எப்படி அமைக்கணும்னு எங்களுக்கு சொல்லிடுவாங்க.