3000 ஆண்களுக்கு முன்பே விவசாயம் செய்த...இரும்பை பயன்படுத்திய மக்கள் தென்தமிழகத்தில் வாழ்ந்தார்கள்!

தேர்தல் கலாட்டாவுக்கு இடையில் வெளிவந்திருக்கிறது ஆதிச்சநல்லூர் அகழாய்வு அறிக்கை

அனல் பறக்கும் தேர்தல் களத்திற்கு நடுவே ஆதிச்சநல்லூரில் செய்யப்பட்ட அகழாய்வு அறிக்கை சத்தமில்லாமல் வெளியாகி இருக்கிறது. இதில் சிறப்புவாய்ந்த செய்தி, ‘மூத்த குடி’ என்பதை பறைசாற்றும் வகையில் சான்றுகள் கிடைத்திருப்பதுதான்.தூத்துக்குடி மாவட்டம் ஸ்ரீவைகுண்டம் அருகே தாமிரபரணி நதிக்கரையின் ஓரத்தில் அமைந்திருக்கிறது ஆதிச்சநல்லூர். திருநெல்வேலியில் இருந்து திருச்செந்தூர் செல்லும் பாதையில் 24 கிமீ தொலைவில் வரும் இந்த இடத்தை உலக நாகரிகத்தின் தொட்டில் என்கின்றனர் தொல்லியல் அறிஞர்கள்.

காரணம், இங்கு கிடைத்த பொருட்கள் எல்லாம் மூன்றாயிரம் ஆண்டுகளுக்கு முற்பட்டவை. அதாவது, கிறிஸ்து பிறப்பிற்கு முன்பே ஆதிச்சநல்லூரில் தமிழினம் தழைத்தோங்கி வாழ்ந்து வந்திருக்கிறது. இங்கு முதன்முதலாக 1876ம் ஆண்டு அகழாய்வு நடந்தது. இதை ஜெர்மன் நாட்டைச் சேர்ந்த டாக்டர் ஜாகோர் செய்தார். ஆனால், அதுசம்பந்தமான தகவல்கள் எதையும் அவர் வெளியிடவில்லை.

பிறகு, கால்டுவெல் காலத்தில் பல்வேறு ஆய்வுகள் மேற்கொள்ளப்பட்டன. 1902ம் ஆண்டு இந்திய தொல்லியல் துறையைச் சேர்ந்த அலெக்சாண்டர் ரீ அகழாய்வு மேற்கொண்டார். இதன்வழியாக ஆதிச்சநல்லூர் பற்றிய பல விஷயங்கள் உலகளவில் தெரியவந்தன. பின்னர் 2004ம் ஆண்டு மீண்டும் இந்திய தொல்லியல் துறை ஆய்வை மேற்கொண்டது. ஆனால், அதன் அறிக்கை வெளியிடப்படவில்லை.

இந்நிலையில்தான் கடந்த 2017ம் ஆண்டு எழுத்தாளர் முத்தாலங்குறிச்சி காமராசு மதுரை ஐகோர்ட்டில் அறிக்கை வேண்டி வழக்கு தாக்கல் செய்தார். அப்படியாக இப்போது ஆதிச்சநல்லூரின் அகழாய்வு அறிக்கை வெளியாகியுள்ளது. ‘‘ஆதிச்சநல்லூர் தொல்லியல் ஏரியா மட்டும் 114 ஏக்கர். முதன்முதலா இங்க ஆய்வு செய்த ஜெர்மன் அறிஞர் ஜாகோர் தன்னுடைய அறிக்கையை ஏன் வெளியிடலனு தெரியல.

பிறகு, 1901ம் ஆண்டு திருநெல்வேலிக்கும் திருச்செந்தூருக்கும் இடையே ரயில்பாதை போடுறாங்க. அது ஆதிச்சநல்லூர் வழியாகத்தான் போகுது. அப்ப தோண்டும்போது நிறைய பொருட்கள் கிடைக்குது. உடனே, அக்கம்பக்கத்துல உள்ளவங்க நம்முன்னோர்கள் எதையோ விட்டுட்டு போயிருக்காங்கனு நினைச்சு ேதாண்ட முடிவெடுத்திருக்காங்க. உடனே, இந்திய தொல்லியல் துறை அலெக்சாண்டர் ரீ என்பவரைக் கொண்டு ஆய்வு செய்றாங்க.
வெண்கலம், இரும்பு, முதுமக்கள் தாழி, நெற்றிப் பட்டயம், நெற்றியில் ஓட்டை காணப்பட்ட மண்டை ஓடுகள்னு நூற்றுக்கணக்கான பொருட்கள் கிடைக்குது.

அதை அவர் இருபத்தியொரு மாட்டு வண்டிகள்ல எடுத்திட்டு போய் சென்னை அருங்காட்சியகத்துல வைக்கிறார். இவரை ஆதிச்சநல்லூரின் தந்தைனு சொல்லணும். ஏன்னா, இவர்தான் முதன்முதலா ஆதிச்சநல்லூரில் கிடைச்ச பொருட்களை பட்டியலிட்டு வெளியிட்டவர். இதன்பிறகு பெரிதாக எந்த ஆய்வும் மேற்கொள்ளப்படல.

இதற்கிடையே 1920ல் சிந்து சமவெளி நாகரிகம் பற்றி வங்கதேசத்து தொல்லியல் அறிஞர் ரக்கல்தாஸ் பானர்ஜி ஆய்வு ெசய்கிறார். அவர், சிந்து சமவெளி நாகரிகத்துக்கு முந்தைய நாகரிகம் தாமிரபரணி நதிக்கரையிலுள்ள ஆதிச்சநல்லூர் நாகரிகம்னு ஒரு ஆங்கிலப் பத்திரிகையில் எழுதுறார். மறுபடியும் உலகத்தின் கவனம் ஆதிச்சநல்லூர் பக்கம் திரும்புது. இதை திராவிட நாகரிகம்னு அவர் சொல்றார்.

அடுத்து, எழுத்தாளர் சாத்தான்குளம் ராகவன் ‘ஆதிச்சநல்லூரும் பொருநைவெளி நாகரிகமும்’னு ஒரு புத்தகம் போடுறார். அதுல, இங்குள்ள எலும்புக்கூடு களுக்கும் மெசபடோமியா எலும்புக்கூடுகளுக்கும் ஒத்துப்போகுதுனு சொல்றார். உலகிற்கு நாகரிகமே தாமிரபரணி நதிக்கரையில் இருந்துதான் சென்றதுனு குறிப்பிடுறார். இப்படியாக ஆதிச்சநல்லூர் பற்றிய விஷயங்கள் வெளியே வந்தன’’ என்கிற முத்தாலங்குறிச்சி காமராசு வழக்கிற்குள் வந்தார்.

‘‘2004ல் இந்திய தொல்லியல் துறை அதிகாரி தியாக சத்தியமூர்த்தி தலைமையிலான குழுவினர் மீண்டும் ஆதிச்சநல்லூரில் ஆய்வு செய்தாங்க. அப்ப நான் பத்திரிகை நிருபராக இருந்தேன். அடிக்கடி ஆதிச்சநல்லூர் போய் செய்தி சேகரிப்பேன். ஆனா, அவங்க ஒழுங்கான தகவல்கள் எதையும் சொல்லமாட்டாங்க.

கிடைச்ச பொருட்களை எல்லாம் சென்னை கோட்டையில் உள்ள மத்திய தொல்லியல் துறை அலுவலகத்தில் வச்சாங்க. 2010ல் முதல்வர் கலைஞர் கருணாநிதி உலகத்தமிழ் செம்மொழி மாநாட்டை நடத்தினார். அதுல ஆதிச்சநல்லூர் நாகரிகம் கிமு 3000 ஆண்டுகளுக்கு முற்பட்டதுனு பேசினாங்க. அதாவது, 5000 ஆண்டுகளுக்கு முற்பட்டது! இதன்பிறகு அமைச்சர்கள் எல்லாம் இந்த இடத்தை வந்து பார்வையிட்டாங்க. ஆனாலும், 2004ல் செய்த அகழாய்வின் ஆய்வறிக்கை மட்டும் வரவேயில்ல.

இதற்கிடையே தூத்துக்குடி மாவட்டம் தனியாகப் பிரிக்கப்பட்டு 25 ஆண்டுகள் ஆனதைக் கொண்டாடினாங்க. அப்ப முதுமக்கள் தாழி தகவல் மையம்னு ஒண்ணை ஆதிச்சநல்லூர் பக்கத்திலுள்ள புளியங்குளம் கிராமப் பகுதியில் ஆரம்பிச்சாங்க. அங்க ஆதிச்சநல்லூரின் புகைப்படங்களை வைக்க முடிவெடுக்கப்பட்டது. சில காரணங்களால அந்த ஐடியா செயல்படுத்தப்படலை. இதுக்கிடையில நான் ஆதிச்சநல்லூர் சம்பந்தமா ஒரு புத்தகம் கொண்டு வந்தேன்.

2017ல் இந்தப் பகுதியை பார்வையிட மதுரை ஐகோர்ட் வழக்கறிஞர் அழகுமணி வந்தார். என்னுடன் கலந்து பேசியவர், ‘வழக்கு போட்டால்தான் அறிக்கை வெளியே வரும்’னு சொன்னார். அந்த ஆண்டே வழக்குத் தொடர்ந்தோம்.  வழக்கு எண் 13096/2017.
இதே பெயர்ல இன்னொரு புத்தகமும் கொண்டு வந்தேன். வழக்கு விசாரணைக்கு வந்ததும், முதலாவதா 2004ல் செய்த அகழாய்வு அறிக்கை வேணும்னு கேட்டோம். அடுத்து, ஆதிச்சநல்லூரில் மீண்டும் அகழாய்வு செய்யணும்னும், ஆதிச்சநல்லூரில் உலகத்தரம் வாய்ந்த ஒரு அருங்காட்சியகம் அமைக்கணும்னும் சொன்னோம்.

அப்ப கிருபாகரன், எஸ்.எஸ்.சுந்தர்னு ரெண்டு நீதியரசர்கள், இங்குள்ள ஒரு முதுமக்கள் தாழியை ஆய்வுக்காக அமெரிக்காவிலுள்ள ஃபுளோரிடா மாகாணத்துக்கு அனுப்பி வைச்சாங்க. கார்பன் பரிசோதனை மூலம் ஆய்வு மேற்கொண்டதில் அதன் வயது 2900னு தெரிய வந்துச்சு. மூன்றாயிரம் ஆண்டுகளுக்கு முற்பட்டதுனு நிரூபணமாச்சு. ஆதிச்சநல்லூரை உலகம் முழுவதும் உற்று நோக்கியது. உடனே மாநில அரசு, நாங்களே ஆய்வு களை மேற்கொள்றோம்னு மத்திய அரசுகிட்ட அனுமதி வாங்கினாங்க.  மாநில அரசின் அகழாய்வு தொடங்குச்சு.

இந்நேரம், ஆரம்பத்துல அகழாய்வு செய்த அதிகாரி தியாக சத்தியமூர்த்தி ஒரு முன்னோடி அறிக்கையை கோர்ட்ல சமர்ப்பிச்சார். அப்ப முறைப்படி அறிக்கை வேணும்னு கேட்டோம். இதுக்கிடையில் 2019ம் ஆண்டு பட்ஜெட்டில் மத்திய நிதிஅமைச்சர் நிர்மலா சீதாராமன் உலகத்தரம் வாய்ந்த அருங்காட்சியகம் ஆதிச்சநல்லூரில் அமைக்கப்படும்னு அறிவிச்சார். கொரோனா வந்ததால கொஞ்சம் தடைபட்டுடுச்சு.