உலகளவில் ஆயிரத்தில் ஒருவர்... இந்திய அளவில் பத்தில் ஒருவர்! இந்தத் தமிழரை புகழ்கிறது அமெரிக்க பல்கலைக்கழகம்

உலகளவில் தாக்கத்தை ஏற்படுத்தும் உயிரியல் அறிஞராக மகுடம் சூட்டப்பட்டிருக்கிறார் பாதிரியார் சவரிமுத்து இன்னாசிமுத்து. தமிழகத்தின் கல்வி நிறுவனங்களுக்குப் பெயர்போன இயேசு சபைகளால் நடத்தப்படும் பாளையங்கோட்டை புனித சேவியர் கல்லூரியின் இயக்குனர் இவர். இந்த சபைகளால் நடத்தப்படும் சென்னை லயோலா கல்லூரி உட்பட பல்வேறு கல்வி நிறுவனங்களில் பணியாற்றியவர்.

சுமார் 1 லட்சத்துக்கும் மேற்பட்டவர்களை ஆராய்ந்து, சவரிமுத்துவை ‘ஆயிரத்தில் ஒருவர்’ என்று புகழ்ந்து தள்ளியிருக்கிறது அமெரிக்கப் பல்கலைக்கழகம் ஒன்று. ‘‘அமெரிக்காவின் புகழ்பெற்ற பல்கலைக்கழகம் ஸ்டான்போர்ட். அங்கு பணியாற்றும் மூன்று பேராசிரியர்கள் இணைந்து செய்த ஆய்வின் மூலம் இந்தப் பெயர் கிடைத்திருக்கிறது.

அதாவது உயிரியல் துறையில் செய்யப்படும் ஆய்வுக் கட்டுரைகளைப் பிறர் எந்தளவுக்கு மேற்கோள் காட்டுகிறார்கள் என்பதை கணக்கிட்டும், ஓர் ஆய்வுக் கட்டுரையின் முடிவை பலபேர் சுட்டும்போது அந்த ஆய்வின் சமூக தாக்கம் மிக அதிகமாக இருக்கும் என்று கணித்தும் இந்தப் பட்டத்தைக் கொடுத்திருக்கிறார்கள்.