சூப்பர் ஹீரோ(யின்)!

‘சூப்பர் மேன்,’ ‘ஸ்பைடர் மேன்,’ ‘பேட் மேன்’ என்று திரைப்படத்துறைக்கு அசாதாரணமான பங்களிப்பை வழங்கியிருப்பவர்கள் சூப்பர் ஹீரோக்கள்.
தங்களின் உயிரை துச்சமென மதித்து தீய சக்திகளிடமிருந்து அப்பாவி மக்களைக் காப்பாற்ற அரும்பாடுபடும் இவர்கள் பெரும்பாலும் ஆண்களாகத்தான் இருந்து வந்திருக்கிறார்கள்.  

இந்த வரிசையில் மூன்று வருடங்களுக்கு முன் சூப்பர் ஹீரோவாக  களமிறங்கியிருந்தாள் ‘வொண்டர் வுமன்’. சாகசம் செய்தது பெண்ணாக இருந்தாலுமே கூட ஹாலிவுட்டில் சூப்பர் ஹீரோ படம் என்றே அழைக்கப்பட்டது ‘வொண்டர் வுமன்’.  இப்படம் சமீபத்தில் ‘அமேசான் ப்ரைமி’ல் வெளியாகி OTTயிலும் சக்கைப்போடு போடுகிறது. அதுவும் தமிழ் சப்டைட்டிலுடன்.

மனிதர்களின் நிழல் கூட படாத ஒரு ரகசிய தீவு தெமிஸ்கீரா. அங்கே அதீத சக்தி படைத்த அமேசான்ஸ் வாழ்ந்து வருகின்றனர். அவர்களின் இளவரசி டயானா. தீய சக்தியான ஆரிஸை அழித்து அப்பாவி மக்களைக் காப்பாற்றுவது மட்டுமே அவள் வாழ்க்கையின் ஒரே நோக்கம். அதற்காக சிறு வயதில் இருந்தே போர்க்கலையையும், சாகசங்களையும் கற்றுவருகிறாள்.

மற்றவர்களிடம் இல்லாத அமானுஷ்யமான ஒரு சக்தி தன்னிடம் இருப்பதை உணர்கிறாள். அந்த சக்தி கிரேக்க கடவுளால் அவளுக்குப் பரிசாகக் கொடுக்கப்பட்டது. எதிர்பாராத ஒரு சமயத்தில் அமெரிக்க பைலட்டான ஸ்டீவ் வந்த விமானம் நொறுங்கி தெமிஸ்கீரா தீவைச் சுற்றியிருக்கும் கடலில் விழுந்துவிடுகிறது.தன் சக்தியைப் பயன்படுத்தி ஸ்டீவின் உயிரைக் காப்பாற்றுகிறாள் டயானா. அவன் மூலம் வெளி உலகில் நடந்துகொண்டிருக்கும் போரைப் பற்றி தெரிந்துகொள்கிறாள்.