தனுஷின் பிறந்த தினத்திற்கான சிறப்பு வெளியீடாக மாரி செல்வராஜ் இயக்கத்தில், அவர் ஹீரோவாக நடிக்கும் ‘கர்ணன்’ படத்தின் ஃபர்ஸ்ட் லுக் வெளிவந்திருக்கிறது. கோடிக்கணக்கில் செலவு செய்து ஒரு கிராமம் உருவாகிய விதத்தை அழகழகாக எடுத்துரைக்கிறது அந்த வீடியோ. அதிர்ந்து ஒலிக்கும் தென் மாவட்ட மேளத்துடன் தொடங்கும் அதில் அதிகம் கவர்ந்தது அந்த கிராமத்தின் செட் வீடுகள் அடுத்தடுத்து உருவாகி வருகிற விதம்.

மாரி செல்வராஜ் திருநெல்வேலியின் அருகாமையை அப்படியே திரை வடிவத்தில் கொண்டு வந்தார். அவரால் எதையும் சாத்தியப்படுத்த முடிகிறது. திருநெல்வேலிக்கு போறதும் ஒண்ணுதான், மாரி செல்வராஜ் கிட்டே பேசுறதும் ஒண்ணுதான். ‘கிளாக்குளம்’ என்ற ஊரில் எல்லாமே படத்திற்கான அம்சத்துடன் இடம் கிடைத்தது.

கிராமத்திற்கான பொருள்களை சேகரிப்பு செய்தோம். மரங்கள் அடர்ந்திருந்ததால், ஊடாக வீடுகளை நேர்த்தியுடன் அமைக்க முடிந்தது. வீடுகளின் அருகாமை, கலர், அதன் உயிர்த்தன்மைக்குப் பாடுபட்டது அருமையாக வந்திருக்கிறது.