அணையா அடுப்பு-11

அருட்பெருஞ்ஜோதி
அருட்பெருஞ்ஜோதி
தனிப்பெருங்கருணை
அருட்பெருஞ்ஜோதி

தில்லை அம்பலத்தாருக்கு வைதீகபூஜை ஆகுமா?

சென்னையைத் துறந்த சமயத்தில்தான் உடல் முழுக்க வெள்ளைத்துணி, தலையில் முக்காடு என்று நாமறியும் வள்ளலார் தோற்றத்தை எட்டினார் இராமலிங்கம்.கருங்குழி வேங்கட ரெட்டியாரின் வீட்டில் தங்கியிருந்த காலங்களில் அடிக்கடி சிதம்பரம் சென்று வருவார்.

கைக்குழந்தையாக இருந்தபோதே சிதம்பர ரகசியத்தை தரிசித்தவர் ஆயிற்றே?

அவர் கருங்குழியில் வசித்த சமயத்தில் மட்டுமே சிதம்பரம் தொடர்பாக சுமார் இருநூறு பாடல்களை இயற்றி இருக்கிறார்.
ஒரு முறை கோயில் வாசலில் அழுது தொழுது கொண்டிருந்தபோது, அம்பலத்திலிருந்த இறைவனே இறங்கி வந்து அவரைத் தேற்றியதாகவும் குறிப்பிடுகிறார்.

சிதம்பரம் என்கிற ஊர் எந்தளவுக்கு அவருக்குள் ஊறிப்போய் இருந்தது என்றால், அவர் கையொப்பமிடும் போதெல்லாம் ‘சிதம்பரம் இராமலிங்கம்’ என்றே கையொப்பம் இடுவார்.பொதுவாக தந்தை பெயரை தன் பெயருக்கு முன்பாக இட்டுக் கொள்வார்கள். அல்லது, தான் பிறந்த ஊரின் பெயரை இட்டுக் கொள்வார்கள். இல்லையேல், தான் வளர்ந்த ஊரின் பெயரையாவது தனக்கு அடையாளமாக வைத்துக் கொள்வார்கள்.
வள்ளலார் என்றாலே வடலூர். அவர் பிறந்தது மருதூர். வளர்ந்தது சென்னை.

எனினும் தன்னை சிதம்பரம் இராமலிங்கம் பிள்ளை என்றே வள்ளலார் அடையாளப் படுத்திக் கொண்டார்.முதன்முதலாக அச்சான அவரது நூல்கள் ‘கதர் சரவணப் பத்து’ மற்றும் ‘தெய்வமணி மாலை’. அந்நூல்களில் நூலாசிரியர் பெயராக சிதம்பரம் இராமலிங்கம் பிள்ளை என்றே அச்சானது.எனினும் அந்நாளைய சிதம்பரம் பற்றி வள்ளலாருக்கு ஏதோ மனக்குறை இருந்திருக்க வேண்டும்.சென்னையில் ஆசிரியராகப் பணியாற்றிக் கொண்டிருந்தவர் இரத்தின முதலியார். இவர், வள்ளலாரின் மாணவர்களில் ஒருவர்.

வள்ளலார், சிதம்பரத்திலேயே பெரும் பொழுதைக் கழிக்கிறார் என்பதால், தானும் சிதம்பரத்துக்குக் குடிபெயர விரும்பினார்.அங்கிருந்த பச்சையப்ப முதலியார் பாடசாலையில் பணிபுரியும் வாய்ப்பு கிடைக்கும்போது வள்ளலாருக்கு கடிதமும் எழுதினார்.மார்ச் 20, 1861 தேதியிட்ட கடிதத்தில் வள்ளலார், இவ்வாறாக சிதம்பரம் பற்றி எழுதுகிறார்.“சிதம்பரத்தில் வசிப்பது சம்மதமானாலும், இவ்வியத்தில் வசிப்பது சம்மதமின்று. ஏனெனில் சிதம்பரத்தில் பச்சையப்ப முதலியார் இஸ்கூல் கிராமமல்லாததாக தற்காலத்தில் காணப்படுகிறது.