மன்னர் மன்னனுக்கு வயது 62. சிவந்த நிறம். ஒடிசலான திரேகம். நெற்றியில் கொத்தாய் வந்து விழும் தலைக்கேசம். மெஸ்மரிஸ கண்கள். தாம்பூலம் தரித்த வாய். வேட்டியும் முழுக்கை சட்டையும் உடுத்தியிருந்தார்.

எந்த நேரமும் சண்டை சேவல் போல தலையைச் சிலுப்பிக்கொண்டுதான் ஆங்காரமாகப் பேசுவார்.ஒரு பத்திரிகை செய்தியாளர் கேட்டார்: ‘‘உள்ளாட்சித் தேர்தலில் உங்க மஞ்சள் கட்சி படுதோல்வி அடைஞ்சிருக்கே... அதுக்கு உங்க பதில் என்ன?’’ கேள்வி கேட்டவரை முறைத்தார்: ‘‘தமிழ்நாட்டு மக்கள் ஆண்மை அற்றவர்கள்!’’ ஒட்டுமொத்த மீடியா மக்களும் அதிர்ந்து போயினர்.

‘‘நான் மிகச் சரியாத்தான் சொல்லிருக்கேன். என் பதிலில் எந்த மாற்றமும் இல்லை!’’மஞ்சள் கட்சி மத்தியில் ஆட்சிக்கு வந்ததிலிருந்து மன்னர் மன்னன் இதுபோன்று சர்ச்சைக்குரிய பேச்சுகளைத்தான் பேசி வருகிறார்.